Ch’askakuna hina k’anchaq wayna-sipaskuna
1. ¿Bibliaq nisqan hina imaynan cristianokuna kananku karan, imaynatataq cristiano wayna-sipaskuna kay p’unchaykunapi chayta hunt’ashanku?
1 Jesusmi qatikuqninkunaman niran: “Qankunan runakunapaq k’anchay kankichis”, nispa (Mat. 5:14, 16). Paykunaqa kananku karan orqo patapi intiwan k’ancharishaq llaqta hina. Kunan p’unchaykunapipas wayna-sipaskunaqa, ‘tutayaq pachapi k’anchaq ch’askakuna hina kanku’ allin kawsayninkuwan, tukuy-sonqo predicasqankupiwan (Fili. 2:15; Mal. 3:18).
2. ¿Imaynata predicawaq escuelapi yachachiqniykikunata, yachaq-masiykikunatapas?
2 Escuelapi. ¿Imaynatan escuelapi predicawaq? Wakin wayna-sipaskunaqa clasenkupi drogamanta, evolucionmanta, awqa-tinkuykunamanta, hukkunamantawan rimaqtinku predicanku. Huk pananchis tareanpi terrorismomanta qelqanan karan, qelqasqanpitaq rikuchisqa Diospa Reinollan runakunapaq cheqaq suyakuy kasqanta. Yachachiqninqa muspharanraqmi pananchispa qelqasqan allin ruwasqa kasqanmanta, kaymi yanaparan astawan predicananpaq.
3. ¿Imaynatan allin puriyniykiwan escuelaykipi k’anchariwaq?
3 K’ancharillawaqtaqmi allin puriyniykiwan, yuyaywan p’achakuyniykiwan, sumaqyachikuyniykipiwan (1 Cor. 4:9; 1 Tim. 2:9). Sichus yachachiqniykikuna, yachaq-masiykikunapas hukniray kasqaykita rikunqaku chayqa, wakinninkuna yaqapaschá allin purisqayki rayku cheqaqmanta yachayta munanqaku, Bibliaq yachachisqanmantapas rimanaykitan munankuman (1 Ped. 2:12; 3:1, 2). Sasapaschá kanman Jehová Diospa munayninman hina puriy, ichaqa chay ruwasqaykimanta saminchasunki (1 Ped. 3:16, 17; 4:14). Samanayki ratokunapi qelqanchiskunata leenki otaq rikunallankupi saqenki chayqa, yaqapaschá allin willakuykunata pillapas yachayta munanman.
4. ¿Imakunapin yanapawasun escuelapi predicasqanchis?
4 K’anchayniykita escuelaykipi k’ancharichinki chayqa, iñiyniyki aswan allinta takyanqa, Jehová Dios servisqaykimantataq umaykita hoqarinki (Jer. 9:24). Waqaychasunkitaqmi. Huk pananchismi niran: “Iñisqaykunata amachaqtiyqa, yachaq-masiykuna manañan mat’ipayawankuñachu Bibliaq contranpi kaqkuna ruwanaypaq”, nispa.
5. a) ¿Imaynatan wakin wayna-sipaskuna yapashanku llank’ayninkuta? b) ¿Llank’ayniykipi ima aypanakunata churakushanki?
5 Llank’ayniykita yapay. Wayna-sipaskunaqa k’ancharillankumantaqmi llank’ayninkuta astawan yapaspa. Huk wayqenchismi escuelanta tukuspa Reinomanta willaqkuna pisichikuq suyuman astakusqa, huk ancianollayoq huch’uy congregacionpitaq huñukusqa. Huknin amigonman qelqaspa niran: “Kunan hinaqa manan hayk’aqpas kusikuranichu. ¡Diospaq llank’ayniyqa anchatapuni llanllachiwan! Rimasqaykutataq runakunaqa uyariyta munanku chaymi, sapanka punkupi yaqa iskay chunka minutota qhepakuyku. Munaymanmi lliw wayna-sipaskuna kay hina ruwanankuta, noqa hina kusisqa kanankupaq. Tukuy kaqniykikunawan Jehová Diosta serviymantaqa manan imapas aswan allinqa kanmanchu”, nispa.
6. ¿Imanaqtinmi anchatapuni q’ochukunki congregacionpi wayna-sipaskunamanta?
6 ¡Maytan q’ochukuyku qanmanta wayna-sipas, tutayaq pachapi k’anchaq kasqaykimanta! (1 Tes. 2:20.) Jehová Diospaq llank’anki tukuy sonqoykiwan, tukuy almaykiwan, tukuy yuyayniykiwan, tukuy kallpaykiwan ima chayqa, ‘pachak kutitaraqmi kay tiempopi chaskinki, qhepa tiempopitaq wiñay kawsayta’ (Mar. 10:29, 30; 12:30).