Masturbación nisqata saqepunapaq yanapaykuna

Masturbación nisqaqa mana allin ruwaymi, runatan apan paypa munasqallanta ruwayman, yuyaynintapas waqllichinmi, chaykunataqmi iñiyninta chiriyachipun.a Chaykunata ruwaqkunaqa yaqapaschá hukkunata qhawarinman pukllanankuta hina, aychankuq munasqanta kusichinapaq hinallata. Chay runakunaqa aychankuq munasqanta kusirichinankuraykullan warmita munanku warmikunapas qharita munanku, manan munakusqankuraykuchu. Kusirikuyta tarisqankuqa chay ratollapaqmi. Masturbación nisqaqa astawanmi runakunata tanqan qhelli ruwaykunaman sinchi millay ruwaykunamanwan (Colosenses 3:5).

Pablo kayta qelqaran: “Munasqa wawqe-panaykuna, [...] tukuy qhelli kaqmanta ch’uyanchakusun aycha cuerponchispipas espiritunchispipas, Diosta manchakuspataq aswan-aswan ch’uyata kawsasun”, nispa (2 Corintios 7:1). Wakin runakunapaqqa sasan chay textoq nisqanta kasukuyqa. Jehová Diosmi ichaqa ‘huchankuta pampachanqa’ yanapanqataqmi kanpas, chaymi mana pisipanankuchu (Salmo 86:5; Lucas 11:9-13). Mayninpiqa yapamantan chaykunaman urmankuman, ichaqa pesapakuspa chay ruwasqankuta saqepunankupaq kallpachakuspan rikuchinku allin sonqoyoq kasqankuta. “Diosqa aswanraqmi sonqonchismantaqa, payqa tukuy imaymanatan yachan”, chaytan manapuni qonqananchischu (1 Juan 3:20). Payqa manan mana allin ruwasqanchistachu qhawan aswanmi allinkuna ruwasqanchista. Payqa yachanmi imaynapi tarikusqanchista chaymi tukuy sonqowan mañakuqtinchisqa khuyapayawanchis. Imaynan huk wawa sasachakuypi tarikuspa taytanpa yanapayninta mañakun, chhaynatan ñoqanchispas k’umuykukuywan tukuy sonqowan Diosninchismanta mañakushanallanchis. Arí, Jehová Diosqa ch’uyanchanmanmi conciencianchista (Salmo 51:1-12, 17; Isaías 1:18). Ichaqa manan mañakunallanchischu aswanmi mañakusqanchisman hina imatapas ruwananchis; pornografía nisqata manaña qhawaspa, mana allin runakunamanta karunchakuspa ima.b

Manapuni atipayta atishankichu chayqa cristiano taytaykiwan otaq mamaykiwan rimay, mana chayqa qanta munakuq espiritualpi allin poqosqa iñiqmasiykiwan (Proverbios 1:8, 9; 1 Tesalonicenses 5:14; Tito 2:3-5).c