¿Imaynatan allichana negociopi churanakuykuna kaqtin?

1 Corintios 6:1-8 textopin Pablo rimaran iñiqpurapi churanakuy kasqanmanta. Ñawpaqtaqa, Corinto llaqtapi cristianokuna ‘Diospi mana iñiq juezkunaman quejakuq phawarisqankumanta’ phiñasqa kasqantan willaran (1 versículo). Chaymantataq chay cristianokunata niran sasachakuyninkuta iñiqkuna ukhullapi allichanankupaq ama juezkunaman rispachu. ¿Imarayku chayta niran? Chayta qhawarisun qelqasqan cartapi, chaymantapas yachallasuntaqmi huk sasachakuykunamanta, chaypiqa manañan Pabloq yuyaychasqan yanapawasunmanñachu.

Jehová Diosmi munan cristianopura negocio ruwasqankupi sasachaykuna kaqtin paypa munasqanman hina allichanankuta (Proverbios 14:12). Jesuspa nisqan hina usqhayllan chaytaqa allichananku ama sinchi sasachakuykuna kananpaq (Mateo 5:23-26). Wakin cristianokunan ichaqa k’araq sonqo kaspa juicioman haykunku. Pablon ichaqa niran: “Qankunapura quejanakusqaykichisqa sinchi p’enqaymi”, nispa. ¿Imarayku chayta niran? Chayta ruwaqqa Diospa sutintan pisichan llaqtantapas p’enqaytan qhawarichin. Chaykuna mana kananpaqmi Pablo kayta yuyaychawanchis: “Aswan allinmi mana chanin-kayta muchukuyqa”, nispa (7 versículo).

Pablon willallantaq pikunatan Dios llaqtanpi churan chay churanakuykunata allichananpaq chayta. Willanmi chay churasqan runakuna Bibliata estudiaspa allin yachayta tariq qharikuna kasqankuta. Chay qharikunaqa Diospa llaqtanpi umalliqkunan, paykunan “kay pacha kaqkunamanta” ‘iñiqpura ch’aqwayta juzgay atiq’ kanku (3-5 versiculokuna). Jesuspas willaranmi ch’aqwaykuna kaqtin, yanqamanta tumpay kaqtin, q’otuy kaqtinpas imayna allichanata. Ñawpaqta, phiñachinakusqanku runawanmi sapallankupi allichananku. Iskaypi, sapankupi rimaspa mana allichakuqtinqa huk otaq iskay testigokunaq ñawpaqenpin allichananku. Kinsapi, chaypipas mana allichakuqtinqa congregacionpi umalliqkunamanmi willanan (Mateo 18:15-17).

Umallikunaqa manan abogadoraqchu kananku nitaqmi chay negociokunamantaraqchu yachananku chaykunata allichanankupaq. Manataqmi paykunaqa chay cristianokunata ninkumanchu imayna allichanankuta. Aswanmi ch’eqmipi kaqkunata yanapanku Bibliaq yachachisqanman hina sumaqllata allichanankupaq. Allichanapaq sasa kanman chayqa yaqapaschá iñiq t’aqakunata watukuq umalliqta otaq sucursalmanta yanapayta mañakunkuman. Ichaqa kanmi hukniray sasachakuykuna, chaykunapiqa manañan Pabloq yuyaychasqan yanapawasunmanñachu. Chaykunamanta yachasun.

Juezkunaman quejakuyqa manan huchachu. Yaqapaschá juezkunaman risunman imatapas chaninpi ruwananchisrayku otaq piwanpas sumaqta allichapunanchisrayku. Wakinqa rinkumanmi: divorciakapuna kaqtin, wawawan qhepakapuna kaqtin, wawakunapaq mantencionta mañakuna kaqtin, asegurachikusqanmanta qolqeta chaskikapuna kaqtin, llank’asqanpi empresa wisq’akapuqtin juiciota ruwaspa pagachikuna kaqtin, testamentota legalizachina kaqtinpas. Hinaspapas pipas huk cristianota quejamuqtinqa paypas abogadota hap’ispan abogadowan yanapachikunman.a

Chhaynakunapi tarikuspa quejakuq cristianoqa manan Pabloq yuyaychasqan contrachu ruwashan, ichaqa manan k’araq sonqo kasqanraykuchu chaykunata ruwanan.b Cristianokunaqa kaykunatan mana qonqananchischu: Jehová Diospa sutin hatunchayta, thakpi kawsayta, llapa wayqe panakunawan hukllachasqa kaytawan. Cristianokunaqa munakuq kasqanchispin reqsisqa kanchis, munakuqqa “manan payllapaq kanantachu munan” (1 Corintios 13:4, 5; Juan 13:34, 35).