Askha runakunan manaña religionninkupi huñunakuyman ripunkuchu, chaypi mana imatapas yachamusqankurayku nitaq ima kallpachaytapas chaskisqankurayku. Chhaynaqa, ¿imaraykun Jehová Diospa testigonkunaq huñunakuyninman rinayki? ¿Imatan chaypi tarinki?

Munakuq sumaq sonqo runakunatan tarinki. Ñawpa tiempopi cristianokunaqa t’aqa-t’aqapin huñunakuqku Diosta yupaychanankupaq, chaypin Diospa Qelqanta t’aqwiqku kallpachanakuqku ima (Hebreos 10:24, 25). Iñiqmasinkuwan sumaqta huñunakuspan cheqaq amigontin hinapuni kawsaqku (2 Tesalonicenses 1:3; 3 Juan 14). Ñoqaykupas chay hinatan huñunakuyku, paykuna hinataqmi kusisqa kawsayku.

Bibliapi yachasqaykita kasukunaykipaqmi yanapasunki. Ñawpa tiempopi hinan qharikuna, warmikuna, wawakuna ima huñunakuyku experienciayoq umallikunaq yachachisqanta uyarinaykupaq. Paykunan yachachiwanku Bibliapi yachasqaykuman hina kawsanaykupaq (Deuteronomio 31:12; Nehemías 8:8). Chaypi llapa huñunakuqkunan tapuykunaman kutichiyku takikunatapas takiyku, chaywanmi rikuchiyku Diospi iñisqaykuta (Hebreos 10:23).

Diospi iñisqaykin wiñanqa. Apóstol Pablon huk iñiq t’aqaman qelqarqan: “Qankunawan tupaykuytaqa munashanipunin, [...] iñiyniykichismi kallpachawanqa, ñoqaq iñiyniytaq qankunata kallpachasunkichis”, nispa (Romanos 1:11, 12). Iñiqmasiykuwan huñunakusqaykun yanapawanku iñiyniykupi qaqata sayanaykupaq, cristiano hinapuni kawsanaykupaqpas.

Qan kikiykin huñunakuyman rispa chaykunata rikumuwaq. Sumaqtan chaskisaykiku. Huñunakuykunaqa gratisllan manan qolqetaqa mañasaykikuchu.

• ¿Imaynatan huñunakuyniykuta apariyku?

• ¿Imakunapin cheqaq cristianokunaq huñunakuynin yanapawanchis?

Jehová Diospa testigonkunaqa manapunin huñunakuyniykuta saqeykuchu monte ukhuntaña, ruphaypiña, parapiña purinayku kaqtinpas. ¿Imaraykun sasachakuykunapiña tarikuspapas, llank’anamanta sayk’usqaña kutipuspapas kallpachakuyku iñiqmasiykuwan huñunakunaykupaq?

Allinniykupaqmi. Huñunakuyman riymanta rimaspan apóstol Pablo nirqan: “Hukkuna hukkunawan kallpachanakusunchis”, nispa (Hebreos 10:24). Chay simikunaqa hukkunawan reqsinakuymantan rimashan. Arí, apóstol Pabloqa kallpachawashanchismi hukkunawan reqsinakunapaq, paykunapi interesakunapaq ima. Hukkunawan reqsinakuspan yachanchis sasachakuyninkuta imayna atipasqankuta, chaymi yanapawasunman chay hina sasachakuyninchista atipanapaq.

Allin amigokunatan tariyku. Huñunakuykunapiqa manan yanqa-yanqallatachu reqsinakuyku, aswanmi allin amigokunata tariyku. Mayninpiqa kusirikunaykupaq pukllanaykupaq iman huñunakuyku. ¿Imapin yanapawanku chhayna kawsasqayku? Astawan munanakunaykupaq sumaqta qhawarinakunaykupaq ima. Cheqaq amigontin kasqaykuraykun ima sasachakuypas kaqtinqa usqhaylla yanapanakuyku (Proverbios 17:17). Huñunakuykunapi llapallayku reqsinakuspan ‘huk-nisqalla yanapanakuyku’ (1 Corintios 12:25, 26).

Qanpas kallpachakuy Diospa munayninta ruwaq runakunawan amigontin kanaykipaq. Chay amigokunataqa Jehová Diospa testigonkuna ukhupin tarinki. Imaña otaq piña hark’asunkiman chaypas, amapuni huñunakuyman riytaqa qonqaychu.

• ¿Imapin yanapawanku iñiqmasiykuwan huñunakusqayku?

• ¿Hayk’aqmi reqsiyta munawaq iñiq t’aqapi iñiqmasikunata?

Ñawpa cristianokunaqa huñunakuyninkupin takiqku, Diosmanta mañakuqku, Diospa Simin Qelqata leeqku, t’aqwiqku ima (1 Corintios 14:26). Chay hinatan rikunki huñunakuyniykuman hamuspapas.

Bibliamanta allin yachachikuykunan kan. Sapa semana tukuytan sapanka iñiq t’aqakuna huñunakunku Bibliamanta discursota uyarinankupaq. Chayqa 30 minuton aparikun, chaypin willakamun imayna tiempopi kawsasqanchista, imaynatan Biblia yanapawasunman kawsayninchispi chaytapas. Chaypiqa llapa uyariqkunatan kallpachakun textokunata Bibliankupi maskhanankupaq. Chay qhepamanmi Qhawaq Revistata Estudianapaq Huñunakuy kan, chayqa huk horan aparikun, chaypiqa llapankun invitasqa kanku revistapi tapuykunaman kutichinankupaq. Chaypin yachayku Bibliapi yachachikuykunata imayna kasukuyta. Hallp’antinpi kaq 110.000 más iñiq t’aqakunapin kaqllata yachayku.

Allin yachachiq kanaykupaqmi yanapawanku. Chaypaqmi huk ch’isintan huñunakuyku, chay huñunakuypa sutinmi Diospaq kausasunchis nisqa, chayqa apakun Diospaq kausasunchis, juñunakuypi yachanapaq nisqa folletoq nisqanman hinan. Kinsapin t’aqasqa kashan. Huk kaq parteqa Bibliapi qori jina yachachikuykuna nisqan, chaymi yanapawanku Bibliapi yachachikuykunata astawan entiendenaykupaq, chaytan ñawpaqmantaña leemurayku. Iskay kaq partepiqa Allin yachachiq kasun nisqan, chaypin demostracionkunata rikuyku imaynatachus hukkunawan Bibliamanta parlaykuman chaymanta. Consejota qoq iñiqmasin yanapawanku imaynatachus leesqaykuta, hukkunawan parlasqaykutapas mejoraykuman chaykunapi (1 Timoteo 4:13). Kinsa kaq partetaq Cristiano kausayninchis nisqa, chaypin yachayku imaynatachus Bibliaq yachachisqanman hina kawsaykuman chayta, chaymantataq uyariqkunaq yanapayninwan aswan allinta Bibliata estudiayku

Huñunakuyniykuman hamuspan anchata admirakunki allin yachachikuykunata uyarispa (Isaías 54:13).

• ¿Imatan rikunki Jehová Diospa testigonkunaq huñunakuyninpi?

• ¿Mayqen huñunakuyniykumanmi ñawpaqta riyta munawaq?