¿Imaynatan sasachakuypi tarikuqkunata yanapasunman?

FRANÇOIS sutiyoq umallin nin: “Nacionniykupi votación kasqan qhepamanmi maqanakuykuna karqan, chayraykun waranqanpi Jehová Diospa testigonkuna wasinkumanta ripurqanku. Mikhunapas hampikunapas pisiyapurqanmi chaymi imatapas askha qolqewan rantina karqan. Bancokunatapas wisq’apurqankun, qolqe horqona cajakunapas ch’usaqmi karqan otaq mana funcionarqanchu”, nispa.

Askha Testigokunan huñunakunanchis wasikunapi qorpachakurqanku, paykunamanmi sucursalpi kaq iñiqmasikuna usqhaylla apachirqanku qolqeta hukkunatapas. Iskaynin partidokunamanta ch’aqwata hatarichiqkunan carreterakunata wisq’arqanku, ichaqa yacharqankun Testigokuna mana pimanpas sayapakusqankuta chaymi sucursalpa carronkunataqa pasachillaqku.

François nillantaq: “Huk huñunakuy wasiman rishaqtiykun carroykuta baleamurqanku. Balakunaqa qhetuspa hinaraqmi pasarqowarqanku. Chayllamanmi rikurqayku pistolantin soldado ñoqaykuman phawamushaqta, chaymi usqhaylla sucursalman kutiripurqayku. Anchatan Jehová Diosta agradecekurqayku mana wañusqaykumanta. Qhepa p’unchayñan chay huñunakuy wasipi 130 iñiqmasikunataqa yanapakurqan. Wakinqa sucursalmanmi chayamurqanku, chaypin yanaparqayku iñiyninkupi, qorqaykutaqmi ima necesitasqankutapas chay sasachakuy tiempo pasanankama.

”Chay qhepamanmi nacionnintinmanta iñiqmasikuna askha cartakunata sucursalman apachimurqanku yanapasqankumanta agradecekuspa. Huk ladokunamanta iñiqmasikuna yanapasqankun anchata kallpacharqan Jehová Diospi confianankupaq”, nispa.

Pacha chhaphchiykuna otaq huk sasachakuykunawanpas iñiqmasinchiskuna llakipi tarikuqtinkuqa manan simillawanchu ninchis: “Allinta p’istukuychis, saksaykuychis”, nispa (Sant. 2:15, 16). Aswanpas kaqninchiskunawanmi yanapanchis imaynan ñawpa tiempopi cristianokuna ruwarqanku hinata. Paykunaqa yarqay kananmanta yachaspankun “sapankanku imachus kapusqanman hina Judea provinciapi tiyaq wawqe-panakunaman yanapayta apachinankupaq rimanakurqanku” (Hech. 11:28-30).

Jehová Diospa testigonkunaqa anchatan munanchis pisichikuqkuna yanapayta, ichaqa runakunaqa necesitallankutaqmi Diosmanta yachaytapas (Mat. 5:3). Chaypaqmi Jesusqa qatikuqninkunata kamachirqan Bibliamanta yachachinankupaq (Mat. 28:19, 20). Chayraykun sapanka Testigo tiemponchista, kallpanchista, kaqninchiskunatapas qonchis chayta hunt’anapaq. Donacionkuna churasqanchiswantaqmi pisichikuqkunata yanapanchis, ichaqa astawanqa chaykunaqa Diospa Gobiernonmanta pachantinpi predicakunanpaqmi. Chayta ruwaspan rikuchinchis Diostapas runamasinchistapas munakusqanchista (Mat. 22:37-39).

Pachantinpi predicanankupaq donacionkunaqa allintan utilizakun, manan usuchikunchu. ¿Yanapawaqchu pisichikuq iñiqmasiykikunata? ¿Munankichu pachantinpi predicakunanpaq yanapakuyta? Chhayna kaqtinqa kasukuy Proverbios 3:27 textoq nisqanta: “Yanapayta atispaykiqa yanapana runata yanapaykuy”, nispa.