Profetakunaq ruwasqanqa allinninchispaqmi: Oseas
1. ¿Ima ruwananchispaqmi kallpachawanchis Diospa khuyapayakuynin?
1 Jehová Diosqa anchatan khuyapayawanchis, chaypi yuyaymanaymi kallpachawanchis imaymanata saqesparaq Diospa munayninta ruwanapaq (Sal. 103:2-4; 116:12). Profeta Oseaspas Jehová Diosta kasukusqanraykun sonqomanta imaymanata ruwarqan. ¿Imaynatan paypa ruwasqanta qatikusunman?
2. ¿Imaynatan Oseaspa ruwasqanta qatikusunman?
2 Predicashallasun “atikuqtinpas mana atikuqtinpas”. Oseasqa Israelpa chunka ayllunkunamanmi astawanqa Diospa nisqanta willarqan. Chaypiqa yaqa llapankun Diosta mana kasukurqankuchu. Ñawpaq kaq Jeroboammi qorimanta torillokuna yupaychayta hatarichirqan, iskay kaq Jeroboampas runakunata tanqarqan chayta ruwashanallankupaq, payqa ‘manapuni Señor Diospa munayninman hinachu ruwarqan’ (2 Rey. 14:23, 24). Chay qhepanman reykunapas manan imatapas ruwarqankuchu runakuna Diosman kutirikunankupaq, chaymi 740 watapi (m.J.h.) llaqtanku thunisqa kapurqan. Oseasmi ichaqa millay runakuna ukhupiña tarikuspapas 59 watata Jehová Diosta servirqan. ¡Chay ruwasqanqa ancha allinpunin karqan! Ñoqanchispas Oseas hinan predicashanallanchis runakuna mana uyarikuqtinpas hark’akuqtinkupas (2 Tim. 4:2).
3. ¿Imaynatan Oseaspa ruwasqan rikuchin Diospa khuyapayakuyninta?
3 Diospa khuyapayakuyninta rikuchisun. Jehová Diosmi Oseasta nirqan: “Rabona warmiwan casarakamuy”, nispa (Os. 1:2). Esposanqa huk wawatan paypaq onqokurqan, chay qhepamantaq iskay wawata onqokurqan, yaqachus hina chay qhepa wawakunaqa hukpa karqan. Oseasmi ichaqa warminta huchanta pampacharqan, chay hinatan Jehová Diospas Israel llaqtata pampacharqan Payman kutirikusqankurayku (Os. 3:1; Rom. 9:22-26). Ñoqanchispas imaymanata saqesparaqmi ‘lliw runakunaman’ yachachimunanchis Jehová Dios khuyapayakuq kasqanta (1 Cor. 9:19-23).
4. Jehová Diosta agradecekusqanchista rikuchinapaq, ¿imakunatan ruwasunman?
4 Askha iñiqkunan astawan predicanankurayku profesionninkuta allin llank’anankutapas saqepurqanku; hukkunataq mana casarakurqankuchu otaq mana wawayoq karqanku. Yaqapaschá yuyaykusunman: “Ñoqaqa manachus hina Oseaspa ruwasqanta hinaqa ruwaymanchu”, nispa. Ichaqa sichus Diosta agradecekunchis khuyapayawasqanchismanta, santo espiritunwantaq yanapachikunchis chayqa, yaqapaschá Oseaspa ruwasqanta hinaraq ruwasunman (Mat. 19:26; Filip. 2:13).