Biblian askha kutita willan Bernabemanta apóstol Pablomantawan. Paykunaqa iñiq t’aqakunata watukuq umallikunan karqanku. ¿Iman paykunata kallpachaq chayta ruwanankupaq? Iñiqmasikunapi tukuy sonqowan interesakusqankun. Pabloqa sinchi karutaña viajanan karqan chaypas, watukusqan iñiqmasikunamanmi kutiyta munarqan imaynachus kashasqankuta yachananpaq, kallpachananpaq ima (Hechos 15:36). Pablo hinan kay tiempopi watukuq umallikunapas iñiqmasinkupi interesakunku.

Kallpachawanankupaq hamunku. Watapi iskay kutitan iñiq t’aqakunata watukuq umalli watukamuwanku. Paykunaqa 20 iñiq t’aqakunata hinan watukunku sapankawantaq huk semana kanku. Paykunaqa experienciayoq cristianokunan kanku, chaymi imaymanata paykunamanta yachayku hinallataq esposankumantapas, casado kaqtinkuqa. Paykunaqa kallpachakunkun wayna-sipaskunata kurakkunatapas reqsinankupaq, kusikunkun ñoqaykuwan predicaspa, Bibliamanta yachachisqayku runakunaman visitaspapas. Paykunaqa huk umallikunawan kuskan iñiqkunata kallpachanankupaq wasinkuta visitanku, hinaspapas huñunakuykunapi hatun huñunakuykunapipas sumaq discursokunatan qonku (Hechos 15:35).

Llapaykupin interesakunku. Watukuq umallikunaqa iñiyniykupi allin kanaykutan munanku. Paykunaqa umallikunawan yanapakuq qharikunawan iman huñukunku iñiq t’aqa imayna wiñarisqanta qhawarinankupaq, chaypitaqmi yanapayta qonku ruwanankuta allinta aparinankupaq. Chaymantapas precursorkunatan yanapanku aswan allin predicaq kanankupaq, anchatataqmi kusikunku chayllaraq hamuqkunata reqsispa, iñiyninkupi wiñasqankuta qhawarispa ima. Chay umallikunaqa iñiqkunata ‘serviypi llank’aqkunan’ kanku, tukuy atisqankutataqmi ruwanku (2 Corintios 8:23). Ñoqanchispas kallpachakusun paykuna hina allin iñiyniyoq Dios sonqo runakuna kananchispaq (Hebreos 13:7).

• ¿Imaraykun watukuq umallikuna iñiq t’aqakunata visitanku?

• ¿Imatan ruwawaq chay visitakuna kaqtin?

Huk llaqtakunapi terremotokuna, lloqllakuna otaq imapas kaqtinqa, necesitaq iñiqmasikunatan usqhaylla yanapayku. Chaypin rikuchiyku cheqaqtapuni munanakusqaykuta (Juan 13:34, 35; 1 Juan 3:17, 18). ¿Imaynatan yanapanakuyku?

Qolqewan yanapayku. Ñawpa cristianokunaq tiemponpin Judea llaqtapi sinchi yarqay karqan, chaymi Antioquía llaqtapi iñiqkuna qolqeta apachirqanku Judeapi tiyaq iñiqmasikunaman (Hechos 11:27-30). Chay hinatan ñoqaykupas kay tiempopi ruwayku. Huk llaqtakunapi tiyaq iñiqkuna ima ñak’ariypipas tarikuqtinkuqa, sapanka iñiq t’aqan atisqaykuman hina qolqeta apachiyku (2 Corintios 8:13-15).

Imachus necesitasqankupi yanapayku. Umalliqkunan imapas sucedesqan cheqaspi iñiqmasikunata maskhaspa yanapanku. Yanapayta apaqkunan qhawarinku mikhuykunata, unuta, p’achata rakikunanpaq, maypi alojakunankupaq, k’irisqakunata hampinankupaqpas. Askha Testigokunan qolqenkuwan viajaspa, imapas necesitakusqanpi yanapanku otaq iñiqkunaq wasinta Huñunakuna Wasitapas allichanku. Huk familia hinalla kawsasqayku, huk kutikunapi kuska llank’asqaykun yanapawanku imapas kaqtin usqhaylla yanapanakunaykupaq. ‘Iñiqmasiykutaña’ yanapayku chaypas, huk religionniyoq runakunatapas atikuqtinqa yanapaykun (Gálatas 6:10).

Bibliawan llakisqakunata sonqochayku. Ima ñak’ariypipas tarikuqkunaqa kallpachanatan astawanqa necesitanku. Chaymi chhaynapi tarikuqkunata ‘tukuy imapi sonqochakuq Dios’ kallpachan (2 Corintios 1:3, 4). Chayraykun Bibliapi tarikuq sumaq suyakuymanta paykunaman willayku, chaypin yachanku pisi tiempollamanta Diospa Gobiernon ñak’ariytapas nanaykunatapas tukuchipunanta (Apocalipsis 21:4).

• ¿Imaraykun Testigokuna imapas kaqtinqa usqhaylla yanapanakuyku?

• ¿Imaynatan llakisqakunata sonqochayku?

Wañupunanpaq pisillaña kashaqtinmi Jesusqa Pedro, Santiago, Juan, Andrés apostolninkunawan sapaqllapi parlarirqan. P’uchukay p’unchaykunapi chayamuqtin señalkuna kananmanta rimaspan, tapurqan: “¿Pipunitaq kanman allin yuyayniyoq hunt’aq kamachiri? Paytan Patronninqa churanqa wasinpi kamachinkunata qhawarinanpaq, tiempollanpi mikhunata qonanpaqwan”, nispa (Mateo 24:3, 45, NM; Marcos 13:3, 4). Chaypiqa manan mikhunamantachu rimasharqan, aswanmi Diosmanta yachachikuyta mikhunawan rikch’anachisharqan, paytaqmi Patronqa karqan. Chaypin Jesusqa willasharqan, tukukuy p’unchaykunapi qatikuqninkunaman tiempollanpi Diosmanta yachachinankupaq huk t’aqa runakuna akllananta. ¿Pikunan kanku?

Santo espirituwan akllasqakunamanta huk t’aqa cristianokunan kanku. ‘Kamachi’ nispaqa nikun Jehová Diospa testigonkuna Umalliq T’aqatan. Paykunan espiritual mikhunata ruwanku hinaspa ‘tiempollanpi [chay] mikhunata qowanku’ (Lucas 12:42).

Patronninkuq tukuy kaqnintan qhawarinku (1 Timoteo 3:15). Jesusmi paykunata churarqan kay Hallp’api Jehová Diospa llaqtanta qhawarinanpaq. Chaymi paykunaqa tukuy kaqninta qhawashanku, predicacionta umallishanku, iñiq t’aqakunawantaq yachachiwashanku. Chaymi ‘allin yuyayniyoq hunt’aq kamachiqa’ necesitasqaykuta tiempollanpi qowanku qelqakunapi, huñunakuykunapi, hatun huñunakuykunapipas, apachimuwasqanku qelqakunawanmi predicaykupas.

‘Kamachitan’ allin yuyayniyoq nikun kay Hallp’api Cristoq kaqninkunata allin yuyaywan qhawarisqanrayku. Chaymantapas hunt’aq runakunan kanku Bibliaq nisqanman hinapuni yachachisqankurayku, allin willakuykunata willasqankurayku ima (Hechos 10:42). Jehová Diosqa t’ikarichishanmi llank’asqankuta, chaymi aswan askha Testigokuna yapakushan, askha qelqakunatan apachimuwashankupas (Isaías 60:22; 65:13).

• ¿Pikunatan Jesús akllarqan qatikuqninkunaman Diosmanta yachachinanpaq?

• ¿Imaraykun santo espirituwan akllasqakunamanta huk t’aqa cristianokunata nikun “allin yuyayniyoq hunt’aq kamachi” nispa?