1. ¿Imaraykun casarakuspa tiyana?

Allin willakuykunaqa ‘kusisqa Diosmantan’ hamun, paymi munan familiakuna kusisqa kawsanankuta (1 Timoteo 1:11, NM). Paymi casado kawsayta qallarichirqan. Casarakuyqa tayta-mamakunata wawakunatawanmi yanapan munasqa sientekunankupaq kusisqa kawsanankupaqwan.

Diosmi munan casado warmi-qhari pasaqpaq tiyanankuta. Cristianokunaqa autoridadkunaq kamachisqanman hinan casarakunanku (Lucas 2:1, 4, 5). Jehová Diosqa munanmi paykunapura hunt’aq kanankuta (Hebreos 13:4). Payqa cheqnikunmi t’aqanakuyta (Malaquías 2:16). Ichaqa piqpa qosanpas otaq esposanpas wasanchay huchaman urmanman chayqa, atinmanmi divorciakuspa hukwan casarakuyta.​—Leey Mateo 19:3-6, 9.

2. ¿Imaynatan warmi-qhari kawsananku?

Jehová Diosqa qharitapas warmitapas kamarqan casarakuspa yanapanakunankupaqmi (Génesis 2:18). Qosaqa familiapi uma kananpaqmi churasqa karqan, chaymi pay familianta uywanan Diosmantapas yachachinan. Esposanta munakuspan payrayku allinkunata ruwanan. Casado warmi-qhariqa munanakuspa respetanakuspan kawsananku. Hinaspapas huchayoq runa kasqankuraykun pantasqankuta pampachanakunanku, chhaynapi sumaqta kawsanankupaq.​—Leey Efesios 4:31, 32; 5:22-25, 33; 1 Pedro 3:7.

3. ¿T’aqanakapunachu sasachakuykuna kaqtin?

Sasachakuykuna kaqtinqa, kallpachakunaykichismi munakuywan qhawarinakunaykichispaq (1 Corintios 13:4, 5). Bibliaqa manan ninchu sasachakuykuna kaqtin t’aqanakunaykichista.​—Leey 1 Corintios 7:10-13.

4. Wawakuna, ¿imatan qankunapaq Dios munan?

Jehová Diosqa kusisqa kawsanaykichistan munan. Chaymi yachachisunkichis wayna-sipas kasqaykichis tiempopi kusisqa kanaykichispaq. Payqa munanmi tayta-mamaykichispa yachasqankumanta experienciankumantapas yachanaykichista (Colosenses 3:20). Munanmi payta Churintawan servispa kusisqa kanaykichista.​—Leey Eclesiastés 11:9–12:1; Mateo 19:13-15; 21:15, 16.

5. Tayta-mama, ¿imaynatan wawaykita yanapawaq kusisqa kawsananpaq?

Kallpachakunaykichismi wawaykichisman mikhunata, wasita, p’achata ima qonaykichispaq (1 Timoteo 5:8). Yachachinaykichismi Dios munakuyta, payman rikch’akuq kaytapas (Efesios 6:4). Dios munakusqaykichista rikuspan paykunapas qatikusunkichis. Bibliawan yachachisqaykichisqa yanapanmanmi allinta yuyaykunankupaq.​—Leey Deuteronomio 6:4-7; Proverbios 22:6.

Wawakunaqa necesitankun kallpachanata, allinkuna ruwasqankumanta “kusa” ninanchistapas. Mayninpin ichaqa necesitanqaku wanachinata, chaymi hark’aykunqa mana allinkunaman urmanankumanta (Proverbios 22:15). Ichaqa manan hayk’aqpas sinchi k’araktaqa wanachinachu.​—Leey Colosenses 3:21.

Jehová Diospa testigonkunan askha qelqakunata ruwarqanku tayta-mamakunapaq wawakunapaqpas. Chay qelqakunaqa Bibliaq nisqanman hinan ruwasqa kashan.​—Leey Salmo 19:7, 11.

1. ¿Hukllachu cheqaq religión?

Jesuspas qatikuqninkunapas huk religionllamantan yachachirqanku. Chay religiontan rikch’anachirqan wiñay kawsayman apaq ñanwan, nirqantaqmi chay ñanninta puriqkuna pisilla kasqankuta (Mateo 7:14). Diosqa Bibliaq nisqanman hina yupaychaqkunallatan chaskin, paykunaqa iñiyninkupin hukllachasqa kashanku.​—Leey Juan 4:23, 24; 14:6; Efesios 4:4, 5.

Qhaway ¿Llapa religionkunatachu Dios chaskin? nisqa videota

2. ¿Pikunamanta cuidakunapaqmi Jesús willarqan?

Jesusmi cristianokunaman willarqan llulla profetakuna hamuspa pantasqata yachachinankumanta. Chay runakunan ninku: “Cristianon kayku” nispa, ichaqa pantasqatan yachachinku. Chhaynaqa, ¿imaynatan tarisunman cheqaq religionta? Chay religionpi kaqkuna imayna kawsasqankuta qhawarispan.​—Leey Mateo 7:13-23.

3. ¿Imaynapin tariwaq cheqaq religionta?

Chaypaq phisqamanta yachasun:

• Diospa Simin Qelqatan respetanku. Cheqaq cristianokunaqa kallpachakunkun Bibliaq nisqanta kasukunankupaq, manan runakunaq yachachisqanman hinachu imatapas ruwanku (Mateo 15:7-9). Hinaspapas yachachisqankuman hinan kawsanku.​—Leey Juan 17:17; 2 Timoteo 3:16, 17.

• 

  Diospa sutintan hatunchanku. Jesusmi chayta ruwarqan Taytanpa sutinta runakunaman yachachispa. Jehová Diosmantan runakunaman willarqan, yachachirqanmi sutin hatunchasqa kananpaq mañakuytapas (Mateo 6:9). ¿Mayqen religionmi tiyasqayki llaqtapi Diospa sutinta yachachin?​—Leey Hebreos 13:15; Romanos 10:13, 14.

• Diospa Gobiernonmantan willanku. Diosmi Jesusta kay Hallp’aman kachamurqan Gobiernonmanta allin willakuykunata willananpaq. Chay Gobiernollan runakunapaq allin kawsayta apamunqa. Chaymi Jesusqa wañupunan p’unchaykama chaymanta willarqan (Lucas 4:43; 8:1; 23:42, 43). Hinaspapas willarqanmi chay Gobiernomanta qatikuqninkuna yachachinankuta. Pipas Diospa Gobiernonmanta willasunkiman chayri, ¿ima religionmantan kashanman?​—Leey Mateo 24:14.

• Manan kay millay pachamantachu kanku. Jesusta qatikuqkunaqa manan política nisqapi nitaq runakunaq ch’aqwayninpi chhaqrukunkuchu (Juan 17:16; 18:36). Manan runakunaq millay ruwasqankuta yuyaykusqankutapas qatikunkuchu.​—Leey Santiago 4:4.

• Munanakuyninkun sut’ita rikukun. Paykunaqa Diospa Simin Qelqapin yachanku llapa llaqtakunapi tiyaq runakuna respetayta. Pantasqa religionkunaqa sapa kutillanmi yanapakunku guerrakunapi; cheqaq cristianokunan ichaqa manapuni chayta ruwankuchu (Miqueas 4:1-3). Aswanmi ima kaqninkutapas tiemponkutapas t’aqaspa runamasinkuta yanapanku.​—Leey Juan 13:34, 35; 1 Juan 4:20.

4. ¿Imaynapin tariwaq cheqaq religionta?

¿Mayqen religionmi Bibliaq nisqanman hina yachachin, Diospa sutinta hatunchan, Diospa Gobiernollan runakunapaq allinkuna apamunantapas yachachin? ¿Mayqen religionpin cheqaqta munanakunku, manataq guerrakunapi yanapakunkuchu? ¿Ima niwaqmi?​—Leey 1 Juan 3:10-12.

1. ¿Imaraykun necesitanchis yanapanata?

Kamaqninchis, Taytanchis Jehová Diosqa ancha hatun yachayniyoqmi. Payqa munakuwanchismi interesakuntaqmi ñoqanchispi. Manan paymanta t’aqakuspa kawsananchispaqchu kamawarqanchis (Jeremías 10:23). Imaynan wawakunapas tayta-mamankuq pusarinanta necesitanku, chay hinatan runakunapas Diospa pusariwananchista necesitanchis (Isaías 48:17, 18). Chaymi payqa huk sumaq regalota qowanchis: Bibliapi tarikuq kamachikuykunata.​—Leey 2 Timoteo 3:16.

Jehová Diospa kamachikuyninkunan yanapawanchis sumaqta kawsanapaq, willawanchismi qhepa tiempoman wiñay kawsayta tarinapaq imachus ruwananchistapas. Diostaq kamawarqanchis chayqa, tukuy sonqowanmi paywan pusachikunanchis.​—Leey Salmo 19:7, 11; Apocalipsis 4:11.

2. ¿Imaynatan Diospa Simin pusariwanchis?

Bibliapin tarikun ancha importante yachachikuykuna, chaykunan imaymana ruwaykunapi yanapawanchis. Kallantaqmi huk kamachikuykunapas, chaykunaqa huk ruwayllapin yanapawasunman (Deuteronomio 22:8). Huk importante yachachikuywan imapipas yanapachikunapaqqa allin reparaqmi kana (Proverbios 2:10-12). Chayta entiendenapaq kaypi yuyaykusun: Biblian yachachin kawsayqa Diospa regalon kasqanta. Chay importante yachachikuymi yanapawanchis wasipi kaspa, llank’anapi kaspa otaq viajaqtinchis allinta cuidakuspa imatapas ruwanapaq.​—Leey Hechos 17:28.

3. ¿Mayqenkunan aswan hatun kamachikuykuna?

Jesusmi willarqan iskay kamachikuykunamanta. Ñawpaq kaqqa kaymi: Diostan reqsinanchis, munakunanchis, tukuy sonqowantaq servinanchis. Chaypaqmi runakunaqa kamasqa karqanchis. Chaytan yuyarinanchis imatapas decidinanchis kaqtin (Proverbios 3:6). Chayta kasukuqkunaqa Diospa amigonmi kanqaku, qhepamantaq wiñaypaq kusisqa kawsanqaku.​—Leey Mateo 22:36-38.

Iskay kaq kamachikuyqa hukkunawan allinta kawsanapaqmi yanapawanchis (1 Corintios 13:4-7). Chay kamachikuyta kasukuspaqa, Dios hinan runakunata sumaqta qhawarisun.​—Leey Mateo 7:12; 22:39, 40.

4. ¿Imaynatan yanapawanchis Diospa kamachikuyninkuna?

Familiapi munanakuspa huk nisqalla kawsanapaqmi yanapawanchis (Colosenses 3:12-14). Casarasqakuna pasaqpaq kawsanankumanta kamachikuypas familiaq allinninpaqmi.​—Leey Génesis 2:24.

Diospa kamachikuyninkunaqa yanapawanchismi llank’ayninchispi, kawsayninchispipas. Askha llank’anakunapin honrado, allin llank’aq runakunata astawanqa contratanku (Proverbios 10:4, 26; Hebreos 13:18). Yanapawanchismi necesitasqanchis kaqkunallawan kusisqa kawsanapaq, qhapaq kaykuna maskhaymantaqa Dioswan allinpi kayta ñawpaqman churananchispaqpas.​—Leey Mateo 6:24, 25, 33; 1 Timoteo 6:8-10.

Diospa kamachikuyninkunaqa yanapawanchismi qhalilla kananchispaqpas (Proverbios 14:30; 22:24, 25). Rimasun machaymanta. Diosqa onqoykunamanta accidentekunamanta pakaykuyta munaspan kamachiwanchis ama machanapaq (Proverbios 23:20). Ichaqa manan hark’awanchischu pisilla ukyaytaqa (Salmo 104:15; 1 Corintios 6:10). Bibliapi kamachikuykunaqa yanapawanchismi imayna kawsasqanchista imakuna yuyaykusqanchistapas allinta qhawarikunapaq (Salmo 119:97-100). Ichaqa manan allinninchispaq kasqanraykullachu kasukunchis, aswanpas hanaq pacha Jehová Taytanchista hatunchanapaqmi.​—Leey Mateo 5:14-16.