¿Iman pasan wakmanta naceqkunata?

¿IMARAYKUN Jesús santo espirituwan bautizachikuyta huk naceywan rikch’anachiran? (Juan 3:5.) Nacey nisqa simiqa yaqa kaqllan “qallariy” nisqa simiwan. Chayraykun nisunman: “Wakmanta naceqkunaqa hukniray kawsaytan qallarinku Diospa ñawpaqenpi”, nispa. ¿Imaynapitaq chayri suceden?

Chayta allinta entiendenapaqmi apóstol Pablo rimaran wawa adoptaymanta. Paymi hanaq pachapaq akllasqa cristianokunata niran: ‘Diospa adoptasqan wawankunan kankichis’, chaymi payqa ‘wawankunata hina rikusunkichis’, nispa (Gálatas 4:5; Hebreos 12:7). Chay rikch’anachiymi entiendechiwanchis santo espirituwan bautizakuq imayna runamanchus tukupun Diospa ñawpaqenpi chayta. Chaymi wakmanta rimasunchis ñawpaqpi rimasqanchis wakcha wawamanta.

¿Iman suceden adoptasqa wawata?

Ñaqha nisqanchis hina, chay wakcha wawaqa manan uywaqninmanta herenciata chaskiyta atiranchu mana legítimo wawan kasqanrayku. Ichaqa, sichus chay uywaqnin tayta mosoq partida de nacimiento nisqata horqospa chay wawata adoptanman chayqa, legítimo wawan hinan kapunqa, chhayna kaqtinqa wakin wawankuna hinan derechoyoq kanqa herenciata chaskinanpaq.

Chay adoptasqa wawa hinan kanku wakmanta naceqkunapas. Chay adoptasqa wawaqa herenciata chaskinanpaqqa autoridadkunamantan qochikunan karan mosoq partidata, chaytaqa manan payllamantachu ruwayta atinman karan. Chhaynallataqmi Diospa gobiernonman haykunapaqqa wakmanta nacena. Ichaqa manan pipas payllamantaqa chay ruwayta atinmanchu, aswanpas Dios akllaqtillan chay runaqa wakmanta nacenman.

Chay rimasqanchis wakcha wawaqa adoptasqa kasqanraykun herencianta chaskinqa. Chhaynaña kaqtinpas payqa manan hukniraymanchu tukupun, aswanpas kaqllan kashan. Ichaqa derechonpin kashan herenciata chaskikunanpaq, legítimo wawa hina uywaqninkunawan tiyananpaqwan.

Jehová Diospas wakin runakunatan adoptaran wawankuna kanankupaq. Paykunamanta hukninmi karan apóstol Pablo, chaymi akllasqamasinkunata niran: “Diospa wawankuna nisqa kaytan chaskirqankichis, chaymi Diosmantaqa mañakunkichis: ¡Yayalláy! nispa. Santo Espiritullataqmi espiritunchiswan kuska willakun Diospa wawankunapuniña kasqanchista”, nispa (Romanos 8:15, 16). Chaypi rikusqanchis hina, chay cristianokuna adoptasqa kasqankuraykun “Diospa wawankuna” kapunku, familiantaq kapunkupas (1 Juan 3:1; 2 Corintios 6:18).

Ichaqa manan adoptasqa kasqankuraykuchu mana huchayoqman tukupunku (1 Juan 1:8). Chhaynaqa, ¿imallan paykunapi cambiarun? Apóstol Pabloq nisqan hina, Diospa espiritunpa kallpachasqan kaspan paykunaqa allinta yachanku Cristowan kuska hanaq pachapi kamachimunankuta (1 Juan 3:2). Chayta yachasqankuraykun hukniray suyakuyniyoq kanku, chayman hinataq kawsankupas (2 Corintios 1:21, 22). Huk rimaypi nisunman: “Paykunaqa wakmantan nacenku, otaq hukniray kawsayta qallarinku”, nispa.

Bibliaq nisqan hina, Diospa adoptasqan wawakunaqa “Diospa sacerdotenkunan Cristoq sacerdotenkunan kanqaku, Cristowantaqmi waranqa watata kamachikunqaku” (Apocalipsis 20:6). Arí, Cristo hinan Diospa Gobiernonpi reykuna kanqaku. Chaymanta rimashaspan apóstol Pedro niran: “Chay hinapin mana ismuq, mana qhellichakuq, mana tukukuq herenciata chaski[sun]chis. Chaytan Diosqa [ñoqanchis]paq hanaq pachapi waqaychashan”, nispa (1 Pedro 1:3, 4). ¡Ima munaymi chayqa!

Chaymantapas tapukullasunmantaq: “¿Pikunatataq gobiernanqaku wakmanta naceq cristianokunari?” nispa. Chaymantan qatiqninpi yachasunchis.

[10 paginapi dibujo]

¿Imaniranmi apóstol Pablo adoptasqa kaymanta?

Pisillan kamachimunqaku askha runakunaq allinninpaq

APÓSTOLKUNAQ tiemponmantapachan Diosqa wakin serviqninkunata adoptaran paypa wawankuna kanankupaq. Paykunaqa wakmantan nacenku, chaymi hanaq pachaman rinqaku reykuna kanankupaq (2 Timoteo 2:12). Chaypaqmi ichaqa ñawpaqta wañunanku, hanaq pachapitaq kawsarichisqa kananku (Romanos 6:3-5). Chay qhepamanñan paykunaqa “kay pacha[ta] kamachikunqaku” (Apocalipsis 5:10; 11:15).

Ichaqa manan paykunallachu salvasqa kanqaku. Bibliaq nisqan hinaqa iskay t’aqa runakunan salvakunqaku. Huknin t’aqapiqa pisillan kanqaku, hanaq pachamantataq kamachimunqakupas; huknin t’aqapitaq ichaqa askha kanqaku, paykunaqa kay pachapin tiyanqaku ñawpaq t’aqapi kaqkunaq gobiernasqan. Apóstol Juanmi wakmanta naceq cristianokunaman khaynata qelqaran: “[Jesusmi] huchanchiskunata pampachachiwananchispaq wañurqan, manataqmi ñoqanchispa huchallanchismantachu, aswanpas lliw runakunaq huchankumantawanmi wañurqan”, nispa (1 Juan 2:2). Chaypi rikusqanchis