Profetakunaq ruwasqanqa allinninchispaqmi: Nahúm
1. ¿Imapin Nahumpa willasqan yanapawasunman?
1 Jehová Diosqa llapa enemigonkunamantan vengakun, may atiyniyoqña kaspapas manan pipas paymantaqa ayqeyta atinmanchu. Chaytan rikunchis Nínive llaqtawan sucedesqanpi, kunantaqmi thunisqa kapushan (Nah. 1:2, 6). Chay llaqtamanta Nahumpa willasqanmi predicacionpi allinta yanapawasun.
2. ¿Imayna willakuytan runakunaman willamunchis?
2 Kusikunapaq willakuyta apasun. Nahúm libroqa hatunchakuq Nínive llaqta huchachasqa kananmantan willashan (Nah. 1:1; 3:7). Diospa llaqtanpaqmi ichaqa kusikunapaq willakuy karqan. Nahummi willarqan enemigonku chinkachisqa kananta, ‘llaki-phutiy p’unchaypi llaqtanta’ Dios pakaykunantawan (Nah. 1:7). Kunanpas runakunaman predicaspaqa allin willakuykunatan willanchis, yanapanchistaqmi Diospi confianankupaq (Nah. 1:15).
3. ¿Imakunawan yanapachikuspan Nahúm hina runakunaman predicasunman?
3 Ejemplokunawan yachachisun. Diosmi Nahumwan willachirqan Nínive llaqta thunichisqa kananta, imaynan Asiria llaqta Tebas llaqtata thunirqan hinata (Nah. 3:8-10). 632 watapin (m.J.h.) sinchi paraq kasqanwan Tigris mayu Nínive llaqtaman lloqsimuspa hatuchachaq perqankunata thunirqan. Hinan Babilonia, Media llaqtakunamanta soldadokuna chay llaqtaman phawaykurqanku. Chay hinapin Nínive llaqta atipasqa kapurqan. Ñoqanchispas kay millay pachaq chinkapunanta willaspaqa, chay hina profeciakunatan willasunman. Chaypin runakuna reparanqaku Diospa tukuy willachisqan hunt’akusqanta (Nah. 1:8; 2:6).
4. ¿Imatan ruwananchis runakuna facil-llata entiendewananchispaq?
4 Entiendenankupaq hina rimasun. Nahumqa runakunata entiendechinanpaq hina, rikch’arichinanpaq hinan qelqarqan (Nah. 1:14; 3:1). Ñoqanchispas runakuna facil-llata entiendewananchispaq hinan rimananchis (1 Cor. 14:9). Pitapas visitaspaqa willananchismi imarayku visitasqanchista. Bibliamanta yachachispapas Diospi, Bibliapi confianankupaq hinan yachachinanchis, reparachinanchistaqmi yachasqanku allinninkupaq kasqanta (Rom. 10:14).
5. ¿Imatan yachanchis Nahumpa qelqasqan profeciamanta?
5 Nahumqa qelqasqan libropin rikuchirqan Diospa prometesqanpi confiasqanta. Ñoqanchistapas anchatan kallpachawanchis tukukuy p’unchaykunapaq Diospa prometesqan, paymi nirqan: “Manañan sarunchayqa wakmanta kanqañachu”, nispa (Nah. 1:9).