Escuelapi umallikunapaq

LLAPA iñiq t’aqapin huk umallita akllanku Bibliamanta Allin Yachachiq Kanapaq Escuelata allinta aparinanpaq. Sichus chay escuelata umallinaykipaq akllarqasunkiku chayqa, tukuy sonqowanmi sapanka estudiantekunapi interesakuspa hunt’anayki, chhaynapin iñiqmasikunapas sumaqta kallpachakunqaku.

Sapa semanan chay escuelataqa aparinaykipuni kanqa. Escuelapi discurso qoqkunamantapas kallanqataqmi huk runakuna. Chaymi huñunakuypi llapa kaqkunapaq hina yuyaychanayki, kay libropi 5-8 paginakunapi nisqanman hina.

Interesakunaykin leemuqkunapi, demostracionta ruwaqkunapi discursota ruwaqkunapipas. Hinaspapas allinta qhawarichiy escuelapi discursokuna ruwanankupaq chaskisqankuqa mana yanqa tareakunallachu kasqanta, aswanpas chaykunaqa anchatan yanapanqa allin yachachiq kanankupaq. Sichus astawan ñawpariyta munanqa chayqa, kallpachakunanmi astawan yachananpaq, chaypaqmi ichaqa tukuy sonqowan yanapanayki qhawarichinaykitaq yuyaychasqaykiqa allinninpaq kasqanta, willallaytaq imaynatas ruwanman libropi yuyaychaykunaman hina chayta. Chayraykun makilla uyarinayki leemusqanta, discurso qosqanta, demostración ruwamusqantapas, chhaynapin reparanki imakunapin allinyanan kashan chayta.

Escuela huñunakuyqa tiemponpin qallarinan tiemponpitaq tukunanpas. Ichaqa ruwayniykiwanmi rikuchinayki chaytaqa ruwawaq pisillata rimaspan. Sichus pipas discursota qospa otaq leeshaspapas manaña tiemponta aypachikunchu chayqa, huk señalwanmi willanayki, chhaynapin discurso qoqqa reparanqa plataformamanta uraykunanpaq. Sichus mayqen discursantepas mana tiempollanpichu tukunqa chayqa, pisillatañan rimanayki, huñunakuy tukuytataq chay iñiqmasiwan rimanayki.

Huñunakuypi kaqtiykiqa chay escuelatan aparinayki. Sichus mayninpi manapuni chaypi kayta atiwaqchu chayqa, iñiq t’aqapi umallikunan, huknin umallita akllanan rantiykipi chayta aparinanpaq. Chaymantapas atikuqtinqa huk yanapakuq qharitan (siervo ministerial) akllankuman yanapanasuykipaq, programata ruwananpaq, hoja de asignación nisqata rakinanpaq, qelqananpaq otaq pipas faltaqtin yanapaqta maskhananpaq.

Escuelapi kanankupaq. Llapa predicaqkunata kallpachay Bibliamanta Allin Yachachiq Kanapaq Escuelapi kanankupaq. Sapa kuti huñunakuyman hamuqkunapas atinkumanmi chay escuelapi kayta, ichaqa Bibliaq yachachikuynintan chaskikunanku chayman hinataq kawsanankupas. Pipas chay escuelapi kayta munan chayqa, “allinmi” “kusa” nispa niy. Sichus manaraq predicaq lloqsinraqchu chayqa, escuelapi umalliq hina qhawarinayki chaypaq hinañachus kashan icha manachus chayta, ichaqa chayta ruwanayki yachachiqninpa qhawarisqan (otaq mamanpa, taytanpa qhawarisqan iñiqkuna kanku chayqa). Mana bautizasqa publicadorkunapaq tapuykunallatataqmi escuelapi kaqkunapaqpas ruwakun. Organizados para hacer la voluntad de Jehová nisqa libropin 79-81 paginakunapi kashan. Llapa escuelapi kaqkunata huk listapi churay.

Kusa Rimaq Kanapaq Yachachikuykuna. Escuelapi kaqkunaqa Kusa Rimaq Kanapaq listatan qhawarinanku 79-81 paginakunapi. Chaypiqa colorniyoqmi kashan qhawarinankupaq. Allin leeq kanapaqmi yanapanqa 1-17 t’aqakuna. Demostracionta ruwanapaqtaq llapa listapi kaqta qhawarinayki, 7, 52, 53 t’aqakunallatan manaqa, discursota qonapaqpas llapanta qhawarinayki, 7, 18, 30 t’aqakunatan ichaqa mana.

Escuelapi kaqta imapi llank’ananta ninki chayqa, qanmi umalli hina lapizwan “Hayk’aq qallarisqayki” nisqapi qelqanayki. Discursonta tukusqan qhepaman tapuy llank’asqan yachachikuypi tareata ruwarqanchus icha manachus chayta. Ruwanchus chayqa marcanayki maypis marcana kasqanpi. Sichus imapi llank’ananraq kashan chayqa ama imatapas anotaychu, aswanpas hinallata saqenayki “Hayk’aq tukusqayki” nisqata. Imapis llank’ananta hunt’aqtinñan anotana hukman pasananpaq. Sapanka discursota tukuqtin 82 paginapi kaqta hayk’aq aparisqanta anotanan, chayqa tarikun “Maypichus piwanchus rimanaykita akllay” nisqa ladonpin. Chay listakunapi cuadrokunaqa iskay kutita huk yachachikuyllapi estudiante llank’ananpaqmi, hinallataq “Maypichus piwanchus rimanaykita akllay” nisqa listapas. Llapa estudiantekunan libronkuta escuelaman apananku.

Huk yachachikuyllapi llank’ananpaq churay. Hinaspapas listaq kasqanman hinan ordenpi qonayki. Sichus mayqen estudiantepas ima yachachikuyta allinta ruwan chayqa, kallpachay pay kikin chaykunata estudiananpaq. Chaymanta yanapay imapichus allinta llank’anman allin yachachiq allin discurso qoq kananpaq.

Chaymantapas mayqen iñiqmasipas unay tiempoña chay escuelapi kashan chayqa allinmi kanman libropi kaq yuyaychaykunata yuyarinanqa. Imapis allinyanan kashan chayman hina yachachikuyta akllay hinaspa niy chaypi llank’ananpaq, ichaqa aman ratolla hukpi llank’ananpaq churaychu.

Estudiantekunapaq yuyaychaykuna. Estudiantekunata yuyaychaspaqa Bibliapi yachachikuykunaman hinan ruwanayki. Paykunaqa sut’itan reparananku sumaq sonqowan yuyaychasqaykita, Diospa Siminpi yachachikuykunaman hina yuyaychasqaykitapas.

Manan qonqanaykichu iñiqmasiykikunapaq ‘yanapakuqlla’ kasqaykita (2 Cor. 1:24). Paykuna hinan qanpas escuelapi allin umalli, allin yachachiq kanaykipaq kallpachakunayki. Sapallaykipi kay librota estudiay chayman hina ruwanaykipaqtaq kallpachakuy, chhaynapin hukkunapas ruwasqaykiman hina ruwanqaku.

Ñawpaqmantañan qhawarinayki imaynatas estudiantekunata yanapawaq allin leeq, allin yachachiq kanankupaq chayta. Chaypaqqa allintan entiendechinayki imakunas yanapanqa, imaraykus allinpuni, imaynatas chaykunapi ñawparinkuman chaytapas. Kay libropi yachachikuykunawan yanapachikuy, ichaqa manan leenallaykichu aswanpas wakin simikunataqa allintan sut’inchanayki, imaynatas chayman hina ruwana chaytapas.

Sichus huk estudiante imachus llank’ananpi allinta ruwarqan chayqa, “kusatan ruwarunki”, nispan ninayki. Pisillapi willariy imakuna ruwasqansi yanaparqan, imaraykus chay ruwasqan allinpuni karqan chaytapas. Sichus imapipas kallpachakunanraq kashan chayqa, willariy imaraykus chaypi kallpachakunan imaynatas chayta ruwanman chaytapas. Munakuyllawan niy imapis astawan kallpachakunan kashan chayta.

Askha runakunaq kasqanpi rimayqa sasan. Chaymi wakinqa ninku: “Manachus hina allintachu ruwamuni”, nispa. Hinaspan tapukunku: “¿Kallpachakushanallaychu?” nispa. Jesusqa manan ‘q’echusqa soqostaqa p’akirqanchu’ manataqmi ‘q’osñishaq mechatapas wañuchirqanchu’, chay hinatan qanpas kallpachakunayki (Mat. 12:20). Estudianteta yuyaychaspaqa allinta reparay imayna sientekusqanta qhawariytaq chayllaraq yachaqchus icha unayñachus chaytapas. Sumaq sonqowan nisqaykin yanapanqa tukuy atisqanta kallpachakunanpaq.

Llapa estudiantekunatan munakuywanpuni yanapanayki. Romanos 12:10 textopi nisqanqa ancha allinmi Bibliamanta Allin Yachachiq Kanapaq Escuelapi umallikunapaq, chaypin nin: “Respetanakuspa hukkuna hukkunawan aswan allinpaq qhawanakuychis”, nispa. Sichus mayqen estudiantepas qanmanta kurakña chayqa 1 Timoteo 5:1, 2 textopi nisqanman hinan yanapanayki. Hayk’a watayoqña estudiantenkuna kankuman chaypas, llamp’u simiwan yuyaychaqtiykiqa sumaqtan chaskikunqaku (Pro. 25:11).

Estudianteta yuyaychaspaqa allinta reparachiy imapaqsi allin yachachiq kanan chayta. Paykunaqa manan allin qhawarisqa kanankupaqchu, imapis llank’ashanku chayta hunt’anallankupaqchu nitaq hukkuna imayna yachachisqankuta admirasqa qhawarinankupaqchu ruwananku (Pro. 25:27). Aswanpas chaytaqa ruwanchis Diospa Siminta allinta rimanapaq, Jehová Diosta hatunchanapaq, runamasinchisman yachachinapaq iman. Arí, chay escuelaqa Mateo 24:14; 28:19, 20 textokunapi willasqanta allinta hunt’anapaqmi yanapawanchis. Bautizasqa iñiq qharikunaqa yanapakunkumanmi “Diospa ovejankunata” cuidaypi, allin yachachiq kaspa, allinta discursota qospa, ichaqa chaypaq hina ruwaykunatan hunt’ananku (1 Ped. 5:2, 3).

Llapa estudiantekunata kallpachay, discursota qonankupaq hojata chaskisqanku qhepallaman, kay libropi ima yachachikuypis llank’ananku kashan chayta leenankupaq. Kallpachay chaypi yachasqankuman hinapuni escuelapi rimamunankupaq, huñunakuykunapi comentanankupaq, predicacionpi ruwanankupaq sapa p’unchay parlanankupaqpas.

Discursokuna qonankupaq Programa. Kinsa semana ñawpaqtaraqmi chaytaqa ruwakunan. Atikusqanman hinan llapa discursokunataqa hojachapi qelqasqata willachikunan.

Iñiq t’aqapaq hina kaqtaqa umallikunan ruwananku astawanqa chaypaq hina yachachiqkuna. Hinaspapas allin yachachiq yanapakuq qharikunan ruwallankumantaq.

Imaynatan Escuela Aparikunqa nisqa programapi willakusqanta qhawariy discursokunata demostracionkunata rakinaykipaq warmichus icha qharichus ruwanqa chayta. Sichus qharikuna pisilla kanku chayqa, ama leenallankupaqchu churay, aswanpas discursokunata ruwanankupaqwan.

Discursota qonankupaq programata ruwaspaqa qhawariypuni sapanka iñiqmasiykikuna imaynapi tarikusqankuta. Predicayta Yachanapaq Huñunakuypi otaq chay semanapi huk discursota qonan kashaqtin, ¿atinmanchu huk umalli otaq huk yanapakuq qhari Bibliamanta Allin Yachachiq Kanapaq Escuelapi discurso qoyta? ¿Atinmanchu huk cristiana discurso qoyta chay tuta huch’uyllaraq wawan discursota qonan kashaqtin? Hinaspapas ñawpaqmantan qhawarinayki chay discurso qonanpaq temata, tupashanchus chay iñiqmasinchiswan icha manachus chayta. Astawanqa chayta qhawarinayki huk wawa, huk wayna-sipas otaq mana bautizasqa kaqtin. Hinaspapas allinta qhawariy ima yachachikuypis estudiante llank’ashan tupashanchus discurso qonanpaq yachachikuywan icha manachus chaytapas.

Maypichus piwanchus rimanankupaqqa, hermananchiskunañan akllakunqaku 78, 82 paginakunapi yachachikuykunaq kasqanman hina. Hukllaña yanapaqninku kanqa chaypas atinkumanmi huk iñiqmasipiwan yanapachikuyta. Sichus huk hermana huk yanapaqwan cambiayta munan chayqa, escuelapi umallikunañan qhawarinqaku.

Sapaq salakuna. Escuelapi 50 estudiantekuna masraq kanman chayqa, huk salakunapas kanmanmi discursokunata qonankupaq. Chay salakunapin llapa discursotapas demostraciontapas ruwakunman otaq iskayllapas iñiq t’aqapi estudiantekuna kasqanman hina.

Sapanka salapin huk umallita churakunqa yuyaychananpaq, mana kaqtintaq allin yachachiq yanapakuq qharita. Paykunataqa iñiq t’aqapi umallikunan akllananku. Paykunaq yanapayninkuwan llank’ay estudiantekuna ima salapipas yachachiypi allinta wiñanankupaq.

Allinta leenapaq yanapaykuna. Iñiq t’aqapi umallikunan Bibliamanta Allin Yachachiq Kanapaq Escuelamanta huk escuelata ruwankuman wakin iñiqmasikuna necesitasqankuman hina leeypi allinyanankupaq. Chay escuelapiqa yachachikullanmantaqmi leeyta qelqaytapas.

Chayta ruwanapaqqa askha tiempon necesitakunqa, chaymi Bibliamanta Allin Yachachiq Kanapaq Escuelawan kuskataqa mana ruwakunanchu. Umallikunan decidenqaku hayk’aq ruwakunanta, imakuna yachachikunanta, chaytaqa ruwakunman askhapaq otaq sapankankupaqpas.

Allin yachachiqmi chay huñunakuyta umallinan, chaymi kusa leeq kanan, reqsinantaq rimasqanku simita. Qhari iñiqmasi mana kaqtinqa, umallikunan allin yachachiq warmi iñiqmasita churankuman chay huñunakuyta aparinanpaq ichaqa umantan tapakunanku (1 Cor. 11:3-10; 1 Tim. 2:11, 12).

Askha rimaykunapi Kallpachakuy Leenaykipaq Qelqanaykipaq nisqa folletotaqa utilizakun leeyta qelqayta yachachinapaqmi. Utilizakullanmantaqmi huk yanapaykunata estudiantekuna imayna tarikusqankuman hina. Leeypi qelqaypi allinyaspankuqa Bibliamanta Allin Yachachiq Kanapaq Escuelapiñan kankuman.

Kay escuelapi umallisqaykiwanmi allinta iñiq t’aqapi yanapakuwaq. Romanos 12:6-8 textoq nisqanman hina Diospa qosqasuykita sumaqta qhawarinayki, chaymi tukuy sonqowan Diospaq hina preparakunayki.