QALLARIYPI KAQ | ¿IMAMANTAN JESÚS SALVAWASUN?
¿Imamantan salvasqa kasun?
“Warmimanta paqariq runaqa pisi p’unchaynillayoqmi, askha sasachayniyoqmi, t’ika hina phanchiriq, chaymantataq ch’akirqapuq, llanthu hina chinkaripuq” (Job 14:1, 2)
Job sutiyoq runan chay simikunata nirqan kinsa waranqa wata ñawpaqta hina. Runakunaqa maytan munanchis waynalla sipaslla wiñaypaq kawsayta. Ichaqa Job nisqan hina, llapallanchismi wañupunchis.
Diosmi runaq sonqonman churarqan wiñaypaq kawsayta munananpaq. Chaymi mana wañuyta munanchischu (Eclesiastés 3:11). ¿Llakichiwananchispaqchu munakuq Dios chhaynata kamawarqanchis? Manan. Chaymi Bibliaqa willan wañuyqa enemigonchis kasqanta, hamuq tiempopi ‘ch’usaqyachisqa’ kanantapas (1 Corintios 15:26).
Manan pipas wañuytaqa munanchischu. Chaymi peligropi tarikuspaqa ayqenchispacha, onqoqtinchispas hampichikunchis. Imaymanatan ruwanchis mana wañunanchispaq, chaypin yachanchis wañuyqa enemigonchis kasqanta.
¿Cheqapaqchu wañuy ch’usaqyachisqa kapunqa? Arí. Jehová Diosqa manan wañunanchispaqchu kamawarqanchis. Payqa munarqanmi wiñaypaq kay pachapi kawsananchista. Chaytaqa hunt’anqapunin (Isaías 55:11).
Runaqa imaymanatan ruwarqan wañuyta chinkachinanpaq, ichaqa manan atirqanchu. Kunanpas cientificokunakunaqa imaymana hampikunatan ruwashanku, chaywanmi wakin onqoykunata hampishanku. Estudiashankun genética nisqata runakuna aswan unayta kawsanankupaq. Wakin llaqtakunapiqa aswan unaytan runakuna kawsashanku ñawpaq tiempopi runakunamantaqa. Chaywanpas runaqa manan wañuymanta ayqeyta atinchu. Bibliaq nisqan hina, llapallanchismi ‘hallp’aman tukupunchis’ (Eclesiastés 3:20). Chay hinaqa, ¿imaynatan Dios wañuyta chinkachinqa?
Runaqa manan wañuymanta salvayta atiwasunmanchu. Jehová Diosmi ichaqa imaymanata ruwashan wañuymanta salvawananchispaq. Chaypaqmi Jesucristota kay pachaman kachamurqan.