¿Imaraykun Dios hinallata qhawan millay ruwaykunata ñak’ariykunatapas?

1. ¿Imaynapin millay ruwaykuna paqarirqan?

Millay ruwaykunaqa Satanaspa llullakusqanwanmi paqarirqan. Payqa allin angelmi karqan, ichaqa manan ‘cheqaq-kaypi’ takyarqanchu (Juan 8:44). Dioslla yupaychasqa kananta yachashaspan Saqraqa sonqonpi munapayarqan yupaychasqa kayta. Llullakuspan Evata tentarqan Diosta mana kasukunanpaq. Adanpas esposanta uyarispan Diosta mana kasullarqantaqchu. Chhaynapin ñak’ariypas wañuypas paqarimurqan.​—Leey Génesis 3:1-6, 19.

Evata tentaspan Satanasqa Diospa contranpi hatarirqan. Payqa Jehová Dios kamachinanpaq derechoyoq kasqantan pisicharqan. Yaqa llapa runakunan Diospa kamachikuyninta pisichaspa Saqrata qatikurqanku, chhaynapin payqa ‘kay pacha kamachiq’ kapurqan.​—Leey Juan 14:30; 1 Juan 5:19.

2. ¿Mana allintachu Dios imatapas kamarqan?

Jehová Diosqa tukuy imatapas allintan kamarqan. Qallariypi runakunapas angelkunapas atirqankun Diosta tukuypi kasukuyta (Deuteronomio 32:4, 5). Diosqa allin kaqta otaq mana allin kaqta ñoqallanchismanta akllakunanchispaqmi kamawarqanchis. Chhaynapin payta munakuspa kasukusqanchista rikuchiyta atinchis.​—Leey Santiago 1:13-15; 1 Juan 5:3.

3. ¿Imaraykun hinallata qhawan ñak’ariykuna kananta?

Manan mayqen gobiernopas payllamantaqa allinta kamachikuyta atinmanchu. Chayta rikuchinanpaqmi Diosqa kamachikuynin contra hatariq runakunata hinallata qhawashan (Eclesiastés 7:29; 8:9). Kay 6.000 wata pasasqanpin sut’ita yachakun gobiernokuna manapuni guerrakunata, mana chanin ruwaykunata, onqoykunatapas chinkachiy atisqankuta.​—Leey Jeremías 10:23; Romanos 9:17.

Diospa Gobiernonta kasukuymi ichaqa allinninchispaq kanqa (Isaías 48:17, 18). Jehová Diosqa ñan runaq kamachikuyninta chinkachinqaña. Diospa Gobiernonta suyakuqkunallan kay Hallp’apiqa tiyanqaku (Isaías 11:9).​—Leey Daniel 2:44.

Qhaway ¿Imaraykun Dios jinallata qhawan ñak’ariykunata? nisqa videota

4. ¿Imapin yanapawanchis Dios pacienciayoq kasqan?

Satanasmi nirqan runaqa imatapas chaskinanraykulla Dios servisqanta. Ichaqa Diosmi pacienciayoq kayninpi tiempota qowanchis, paypa Gobiernon suyakusqanchista imayna kawsasqanchiswan rikuchinapaq, Satanaspa llulla kasqanta sut’iman horqonanchispaqwan.​—Leey Job 1:8-12; Proverbios 27:11.

5. ¿Imatan ruwana Diospa ladonmanta kanapaq?

Ñawpaqtaqa yachananchismi imaynatan pay munan yupaychananchista, Bibliaq nisqanman hina yachachiq cheqaq religionta maskhaspataq chaypi yachasqanchisman hina kawsana (Juan 4:23). Hinaspapas Jesús hinan karunchakuna política nisqamanta, guerrakunamantapas, chaypin rikuchisun Satanaspa kamachikusqan contrapi kasqanchista.​—Leey Juan 17:14.

Satanasmi runakunata tanqan millay ruwaykunapi purinankupaq. Chaykunamanta karunchakuqtinchismi wakin familianchiskuna amigonchiskunapas burlakuwasunman, otaq sasachakuykunaman churawasunman (1 Pedro 4:3, 4). Chaykuna kaqtinqa, Diosta munakuq runakunatan maskhananchis, Diospa kamachikuyninkunatataq kasukunanchis. Chayta ruwaspan rikuchisun Satanás llulla kasqanta, paymi nirqan: “Sasachakuykunapi kaspaqa manan pipas Diosta kasukunqachu”, nispa.​—Leey 1 Corintios 6:9, 10; 15:33.

Diosqa munakuwasqanchisraykun chinkachinqa millay ruwaykunata ñak’ariykunatapas. Diospa ladonmanta kaqkunaqa kay Hallp’apin wiñaypaq tiyanqaku.​—Leey Juan 3:16.