Allin tapuykunawan yachachiy

TAPUYKUNATAQA kutichinapunin rimaspapas otaq sonqonchis ukhullapipas. Uyariqninchiskunaqa tapusqanchista uyarispankun yuyayninkuta churanku imamantachus rimasqanchispi. Tapuykunawanmi piwanpas rimayta qallariwaq, chhaynapi sumaqta parlata tupachinaykipaq. Discursota qoshaspapas pita yachachishaspapas tapuykunawanmi hukkunata kallpachanki allinta uyarinankupaq, allinta entiendenankupaqpas. Allin kaqkunata tapuqtiykiqa manan uyariyllachu uyarisunkiku, aswanpas allintan yuyaymananqaku. Chhaynaqa allinta yuyaykuy imapaqchus imaynatachus imatapas tapunaykita.

Pitapas tapuspan rimapayayta qallariwaq. Predicacionpiqa tapuykunawan runakunata kallpachay imachus yuyaykusqankuta rimanankupaq, ichaqa ama rimachiychu mana munaqtinqa.

Askha Testigokunan piwanpas rimayta qallarinankupaq khaynata tapunku: “¿Hayk’aqllapas kayta tapukurqankichu?” nispa. Sichus qanpas runakunaq yachay munasqanmanta chhaynata tapunki chayqa, sumaqtan parlata tupachinki. Manaña chay runa hayk’aqpas chayta tapukurqanchu chaypas, munanmanmi yachayta. Chaymantapas imamantapas rimanaykipaqqa khaynatan tapuwaq: “¿Ima niwaqtaq kaymanta?” nispa.

Etiopía llaqtayoq runan profeta Isaiaspa qelqasqanta kunkayoqta leesharqan, hinan Felipeqa qayllaykuspa tapurqan: “¿Entiendenkichu leesqaykita?” nispa (Hech. 8:30). Chhayna tapusqanwanmi Felipeqa chay runaman allinta sut’incharqan pichus Jesucristo kasqanta. Kay tiempopipas chay hina tapuykunawanmi wakin Testigokunaqa Bibliamanta yachay munaq runakunata askhata tarirqanku.

Imamantapas imachus yuyaykusqankuta rimanankupaq runakunata tapunki chayqa, allintan uyarisunkikuman. Chhaynaqa, tukuy yuyaywan uyariy runakunaq imachus nisqankuta. Sumaqta kallpachay kutichisqanmanta, amataq niychu: “Chayqa manan chhaynachu”, nispaqa. Huk kutinmi, Kamachikuy Simita yachachiq runa ‘yachaywan kutichirqan’ Jesuspa tapusqanta, hinan Jesusqa payta nirqan: “Diospa qhapaqsuyunmantaqa manan karupichu kashanki”, nispa (Mar. 12:34). Manaña kutichisuqniykiq nisqanman hinachu yuyaykunki chaypas, agradecey kutichisqanmanta. Kutichisqanpin reparawaq imamantapas imachus yuyaykusqanta, chayman hina Bibliamanta yachachinaykipaq.

Tapuy allin yachachikuykunata willanaykipaq. Discursota qoshaspapas otaq piwan parlashaspapas tapuykunawanmi qhawarichiwaq allin yachachikuykunataqa. Chay tapuykunaqa kanan uyariqniykikuna imamantachus yachay munasqankumantan. Tapullawaqtaqmi sasa sut’inchana tapuykunatapas, chay qhepamantaq huk chhikanta samariwaq, chhaynapin uyariqniykikuna chaymanta astawan yachayta munanqaku.

Huk kutinmi profeta Miqueas askha tapuykunawan Israel runakunata rimaykurqan. Ñawpaqtan tapurqan imatachus Jehová Dios yupaychaqninkunamanta mañasqanta, chaymantataq astawan tapuykurqan imatachus Payman qonkuman chaypi yuyaymananankupaq. Chay tapuykunawanmi qhawarichirqan imatapunichus Jehová Dios munasqanta (Miq. 6:6-8). Qanpas chay hina tapuykunawanmi allinta yachachiwaq.

Imatapas allinta sut’inchanapaq hina tapuy. Uyariqniykikunataqa tapuykunawanmi imatapas allinta entiendechiwaq. Jehová Diospas chhaynatan tapurqan Israel runakunata anyashaspa (Mal. 1:2-10). Ñawpaqtan nirqan: “Ñoqan munakurqaykichis”, nispa. Paykunataq nirqanku: “¿Imaynatataq munakuwarqankiku?” nispa. Hinan Jehová Diosqa tapurqan: “¿Manachu Esauqa Jacobpa wawqen karqan?” nispa. Chaymantataq willarqan Esaupa miraynintaqa mana allin ruwaqkuna kasqankurayku mana munakusqanta, chayrayku ch’usaqyachisqantapas. Hinaspataq rikch’anachiy simikunawan tapuykunawan ima sut’ita reparachirqan Israel runakunapas mana tukuy sonqochu payta munakusqankuta. Wakin chay tapuykunaqa mana allin ruwaq sacerdotekunaq tapusqanmi kashan, wakintaq llapan Israel runakunata Diospa tapusqan. Chhaynapin Jehová Diosqa sut’ita rikuchirqan mana allin ruwaqkunaqa paypa mana allin qhawarisqan kasqankuta.

Wakin discurso qoqkunaqa chay hina tapuykunawanmi yachachinku. Chhaynapin parlashankumanpas hina uyariqkunata kallpachanku tapusqankuta umallankupi kutichinankupaq.

Estudiota qoshaspaqa tapuykunawanmi yachachinchis. Sichus estudiante hap’isqan qelqaq nisqallanta kutichinman chayqa, manapaschá allintachu entiendenqa estudiasqanta. Chaymi sumaqllata huk tapuykunawan allinta yuyaymanachinanchis. Allin kaq yachachikuykunata qhawarichishaspaykiqa kallpachay Bibliaq nisqanman hina kutichinanpaq, niwaqmi: “¿Imaynatan kayta aswan allinta entiendenchis huk kaq yachasqanchiswan? ¿Imaraykun allinpuni? ¿Imaynatan chayman hina kawsasunman?” nispa. Chhaynata tapuspan estudianteta yanapanki allinta ‘yuyaykuspa’ Diosta yupaychananpaq, manataq imaymanataraqchu willanayki kanqa (Heb. 5:14).

Estudianteyki imatapas mana entiendeqtinqa pacienciakuy, chayraqpaschá reparashan ñawpaq watakunapi yachasqankuna mana nisqaykiman hinachu kasqanta. Chaymi ima yachachikuytapas huk-hinamanta qhawarichispa sut’inchawaq. Wakinmanta yachachinaykipaqqa imapas fácil entiendesqanmantan rimawaq, chayman hina sut’inchanaykipaq. Chaymantapas qhawachinaykipunin Bibliapi textokunata, rikch’anachiykunatapas tapu-tapurispan willawaq, chhaynapin allinta yuyaykuspa ima sut’inchasqaykitapas entiendenqa.

Tapuy imachus yuyaykusqankuta willanasuykipaq. Runakunaqa manan uyaykusqankuman hinapunichu imatapas kutichinku. Wakinqa “allinmi” ninanchisraykullan imatapas kutichinkuman. Chaymi allin yuyaywan chayta reparana (Pro. 20:5). Chaypaqqa Jesús hinan tapusunman: ‘¿Iñinkichu chaypi?’ nispa (Juan 11:26).

Huk kutinmi Jesuspa askha yachachisqankuna qhepaman kutipurqanku huk yachachisqanta mana allinpaq qhawarisqankurayku, hinan Jesusqa apostolninkunata tapurqan: “¿Qankunapas kutipuytachu munankichis?” nispa. Chaymi Pedroqa llapankuq rantinpi nirqan: “Señor, ¿pimantaq risaqku? Qanpa rimasqaykikunaqa wiñay kawsay simikunan. Chaymi ñoqaykuqa iñiyku hinaspan yachayku qanqa Diospa Ch’uya Churin kasqaykita”, nispa (Juan 6:67-69). Huk kutinpas tapurqanmi: “¿Runakunari pin ninkutaq Runaq Churinmanta?” nispa. Chaymantataq yachachisqankuna imachus yuyaykusqankuta yachananpaq nirqan: “Qankunari, ¿pin niwankichistaq?” nispa. Pedrotaq kutichirqan: “Qanqa kawsaq Diospa Churin Criston kanki”, nispa (Mat. 16:13-16).

Estudiota qoshaspaqa chhayna tapuykunawanmi estudianteta allinta yanapawaq. Tapuwaqmi: “¿Ima ninkun compañeroykikuna kaymanta?” nispa. Chaymantataq tapuwaq: “Qanri, ¿ima ninkitaq?” nispa. Chhaynapin yachanki estudianteykiq imachus yuyaykusqanta, chayman hina yanapanaykipaq.

Tapuy imatapas allinta reparachinaykipaq. Wakin yachachikuykunataqa tapuykunawanmi allinta reparachiwaq. Chaytan apóstol Pablopas ruwarqan imamantachus rimashasqanta reparachinanpaq, nirqanmi: “Chay hinaqa, ¿imanisunmanñataq? Diostaq ñoqanchiswan kashan chayqa, ¿pitaq imanawasunmanpas? Diosqa kikin Churintapas mana hark’akuspan llapanchisrayku wañunanpaq entregarqan chayqa, ¿manachu Churintapas qoshawaspanchisqa paywan kuska tukuy imatapas mana imaraykulla qowasunchis?” nispa (Rom. 8:31, 32).

Jehová Diosqa suwakusqanku hawan Israel runakunata profeta Miqueaswan khaynata anyarqan: “Ñoqaqa cheqnikunin waqllisqa tupunaykichista. ¿Manachu huchachasaq waqllisqa balanzayoqta? ¿Manachu huchachasaq waqllisqa pesokuna churaq runata?” nispa (Miq. 6:10, 11). Chay tapuykunawanmi Jehová Diosqa sut’ita rikuchirqan suwakunata huchachananpuni kasqanta.

Tapuy huk yachachikuy pantasqa kasqanta rikuchinaykipaq. Tapuykunaqa allinpunin pantasqa yachachikuykunata sut’iman horqonapaq. Manaraq huk runata qhaliyachishaspan Jesusqa fariseokunata Kamachikuy Simi yachachiqkunatawan tapurqan: “¿Atikunmanchu samana p’unchaypi qhaliyachiy icha manachu?” nispa. Chay runata qhaliyachispataq nirqan: “Mayqenniykichispa wawaykichispas wakaykichispas t’oqoman urmaykuqtinqa, ¿manachu horqowaqchispacha samana p’unchayña kashaqtinpas?” nispa (Luc. 14:1-6). Paykunaqa manan imatapas kutichirqankuchu, nitaq Jesuspas suyarqanchu kutichinankuta. Chay tapuykunawanmi rikuchirqan chay runakuna pantasqata yuyaykusqankuta.

Mayninpiqa cristianokunapas pantasqatan imatapas yuyaykunkuman. Corinto llaqtapin wakin cristianokuna sasachakuyninkuta allichanankupaq Diospi mana iñiq juezkunaman rirqanku. ¿Ima nirqanmi apóstol Pablo chaymanta? Askha tapuykunawanmi qhawarichirqan chay mana allin ruwasqankumanta kutirikunankupaq (1 Cor. 6:1-8).

Practicaspaykiqa yachallankin tapuykunawan allin yachachiyta. Ichaqa imatapas tapunaykipaqqa respetowanmi rimaykunayki kurak runakunata, mana allin reqsisqaykikunata, umalli kaqkunatapas. Chhaynaqa, kallpachakuy tapuykunawan Bibliamanta sumaqta yachachinaykipaq.