Jesusta jatunchakun manaraq naceshaqtin

Ñaupaqpi yachasqanchis jina, ángel Gabrielmi Mariaman willaran: “Juj wawatan onqokunki, paytan sutichanki ‘Jesús’ nispa. Paymi wiñaypaq kamachinqa”, nispa. Jinan Mariaqa chay angelta tapuran: “¿Imaynataq chayri kanman? Manaraqmá noqaqa pi qhariwanpas kaniraqchu”, nispa (Lucas 1:34).

Jinan Gabrielqa niran: “Santo espiritun qanman chayamusunki, ancha jatun Diospa atiynintaq llanthuykusunki. Chaymi naceq wawaqa ‘ch’uya, Diospa Churin’ nisqa kanqa”, nispa (Lucas 1:35).

Chaymantan nillarantaq: “Parienteyki Elisabetpas paya kayninpin soqta killaña onqoq kashan, paytan niqku: ‘Wawayoq kayta mana atiq warmi’, nispa. Diospaqqa manan ima nisqanpas mana junt’ay atinaqa kanmanchu”, nispa (Lucas 1:36, 37). Yaqapaschá chaytaqa niran Mariata astawan creechinanpaq.

Jinan Mariaqa niran: “Jehová Diospa warmi kamachinmi kani, nisqaykiman jina noqawan ruwakuchun”, nispa (Lucas 1:38).

Gabriel ripuqtinmi Mariaqa alistakuran Elisabet-ta watukunanpaq. Elisabetqa qosan Zacariaswanmi tiyaran Judea orqo-orqopi, Jerusalén llaqta cercallapi. Chayqa Mariaq tiyasqan Nazaret llaqtamantaqa kinsa otaq tawa p’unchay puriy jinan karan.

Zacariaspa wasinman chayaspanmi Mariaqa parienten Elisabet-ta napaykuran, jinan Elisabetqa santo espirituwan junt’aykusqa kaspa Mariata niran: “¡Llapa warmikunamantapas ancha sumaq qhawarisqan kanki, wijsaykipi kaq wawapas sumaq qhawarisqa kachun! ¿Pitaq noqari kani Señorniypa maman noqaman jamuwananpaq? Napaykuwasqaykita uyariqtiy jinan wijsaypi kaq wawaqa kusisqa kuyuykacharun”, nispa (Lucas 1:42-44).

Jinan Mariaqa ancha agradecesqa niran: “Jehová Diostan jatunchani, salvawaqniy Diosraykun sonqoyqa anchatapuni kusikun, paymi kay warmi kamachinta qhawarimuwan wajchaña kashaqtiypas. Kunanmantaqa llapa runakunan ‘kusisqa warmin’ niwanqaku, atiyniyoq Dios jatun ruwaykunata noqapaq ruwapuwasqanrayku. Paypa sutinqa ch’uyapunin, tukuy tiempon manchakuqninkunataqa khuyapayan”, nispa (Lucas 1:46-50). Rikusqanchis jina, Mariaqa manan imamantapas jatunchakuranchu, payqa Diostan jatuncharan.

Chaymantan Mariaqa Diosta jatunchaspa nillarantaq: “Ancha jatun ruwaykunatan makinwan ruwan, jatunchakuq sonqoyoqkunatan ch’eqerichin. Tronopi tiyaq atiyniyoq runakunatan k’umuchin, k’umuykukuq kaqkunatataq jatunchan. Yarqasqa kaqkunatan allin kaqkunawan allinta sajsachin, qhapaq kaqkunatataq ch’usaq makita kachapun. Kamachin Israelta yanapaq jamuspan rikuchin promesan yuyarisqanta, paymi prometekuran Abrahanta miraynintawan wiñaypaq khuyapayananpaq, chaytan ñaupa taytanchiskunaman willaran”, nispa (Lucas 1:51-55).

Mariaqa kinsa killa jinan Elisabetwan qhepakuran. Elisabet junt’a onqoqñataq kasharan chayqa, anchatachá Mariaqa chay killakunapi payta yanaparan. Chay Dios sonqo warmikunaqa Diospa yanapayninwanmi onqoq rijuriranku, chayrayku may allinchá paykunapaqqa karan chay killakunapi kuska kasqankuqa.

Kaypi rikusqanchis jina, Jesustaqa manaraq naceshaqtinmi jatuncharanku. Elisabetmi payta “Señorníy” nispa niran, wijsanpi kaq wawachapas ‘kusisqa kuyuykacharan’ María rimariqtin. Qhepamanmi ichaqa wakin runakuna millayta rikuranku Mariata Jesustawan.