¿Yacharankichu?
¿Cheqachu ñaupa tiempopi pi runapas mana allin mujuta t’akanman karan enemigonpa chajranman?
Kaypi kashan Digesto nisqa libromanta jujnin paginamanta copia, chay copian ruwakusqa 1468 watapi. Askhan kan chhayna qelqakunaqa, chaykunapin willakun ñaupa tiempopi leykunamanta jujkunamantawan
MATEO 13:24-26 textopin Jesusqa niran: ‘Janaq pacha gobiernoqa kaymanmi rijch’akun: Juj runan chajranpi allin mujuta t’akaran. Ichaqa paypa enemigonmi jamuspa mana allin qora mujuta trigo t’akasqa pataman t’akaran, jinaspa pasapuran. Trigo wiñamuspa espigamuqtintaq mana allin qorapas rijurimullarantaq’, nispa. Wakin runakunan piensanku chay ejemploqa yanqa cuentolla kananpaq. Roma llaqtapi wakin ñaupa qelqakunaq nisqanman jinan ichaqa Jesuspa chay willasqanqa cheqaqpaq pasanman karan.
Juj importante qelqapi nisqanman jinaqa Roma nacionpiqa prohibisqas kasharan pipas vengakuyta munaspa enemigonpa chajranman mana allin qora mujuta t’akananqa. Karantaq chaypaq juj ley chayqa, chay ruwayqa pasanmanmi karan. Leykunamanta allinta yachaq runan willaran 533 watapi Roma nacionpi Justiniano rey Digesto nisqa librota qelqasqanmanta. Chay libropin chay reyqa pisillapi qelqasqa Roma nacionpi leykunamanta, chaypin qelqallasqataq leykunamanta allin yachaq runakunaq wakin rimasqankumantapas. Chay runakunas kausasqaku 100 watakuna 250 watakuna ukhupi Jesuspa jamusqan qhepata. Jujninsi kasqa Ulpiano sutiyoq. Paysi willasqa juj runa enemigonpa chajranman mana allin mujuta t’akaspa cosechanta pierdechipusqanmanta. Chayta ruwasqanraykus chay runaqa enemigonman qolqeta paganan kasqa.
Rikusqanchis jina, Roma nacionpiqa pasaranmi chay ruwaykunaqa. Chhaynaqa Jesuspa ejemplo willasqanqa manan yanqa cuentollachu karan.