Sinchita phiñakuspa hermanonta wañurachirqan

Edén huertamanta lloqsimpusqanku qhepamanmi Adanwan Evawan wawakunayoq kapurqanku. Ñaupaq kaq wawanpa sutinmi karqan Caín. Payqa chajrapin llank’arqan. Iskay kaq wawanpa sutintaq karqan Abel, payqa uywa michiqmi karqan.

Juj p’unchaymi Cainwan Abelwan Jehová Diosman juj ofrendata jaywarqanku. ¿Imataq juj ofrendari? Chayqa Diosman juj regalo qoymi. Jehová Diosqa kusikurqanmi Abelpa ofrendanwan, Cainpa ofrendanwanmi ichaqa mana. Chay jawan Cainqa sinchita phiñakurqan. Jehová Diosqa nirqanmi Cainta: “Sichus phiñasqalla kashanki chayqa, mana allin kaqtan ruwanki”, nispa. Paymi ichaqa mana kasukurqanchu.

Aswanmi Abelta nirqan: “Jaku campota”, nispa. Campopi iskayllanku kashaqtinkutaq Cainqa hermanonta wañuchirqan. ¿Imatan Jehová Dios ruwarqan? Caintan castigarqan, nirqanmi: “Familiaykimanta t’aqakuspan karuta ripunki, manañan jayk’aqpas kutimunkichu”, nispa.

¿Imatan chaymanta yachanchis? Sichus imapas mana munasqanchisman jinachu kashan chayqa, yaqapaschá phiñakusunman. Ichaqa astawan phiñakushallasun chayqa, mana allin kaqtan ruwasunman. Chay mana pasawananchispaqqa yachananchismi controlakuyta.

Abelqa anchatan Jehová Diosta munakurqan, chaymi allinta portakurqan. Chayraykun Diosqa manapuni paytaqa qonqanqachu. Kay jallp’anchis paraíso kapuqtinmi Diosqa kausarichimpunqa.