16 YACHACHIKUY
Jesusqa noqanchisraykun wañuran
“Runaq Churinpas manan servichikuqchu jamuran, aswanpas jujkunata servinanpaqmi, vidanwan pagaspa askha runakunata kacharichinanpaqwan” (MAR. 10:45)
18 TAKI Gracias librawasqaykikumanta
KAYKUNAMANTAN YACHASUNa
1, 2. ¿Imatan Jehová Dios ruwaran juchamanta kacharichiwananchispaq? ¿Imaraykun Jesús wañunanpuni karan?
JEHOVÁ DIOSQA ch’uya runatan Adantaqa kamaran, wiñaypaqtaqmi payqa kausananpas karan. Ichaqa mana kasukusqanraykun wañupuran, noqanchispas wañuyman vendesqan kapuranchis (Rom. 5:12, 14). Jehová Diosmi ichaqa Adanpa juchallikusqan qhepaman willaran imaynata wañuymantapas juchamantapas librawananchista (Gén. 3:15). Jehová Diosqa tiempollanpin chay nisqanta junt’aran, chaymi Jesusta kachamuran ‘vidanwan pagaspa askha runakunata kacharichinanpaq’ (Mar. 10:45; Juan 6:51).
2 ¿Imamanta kacharichiwananchispaqmi Jesús wañunanpuni karan? Jehová Diosqa Adanpa juchanmanta librawananchispaqmi Jesuspa vidanwan pagaran (1 Cor. 15:22). Adanqa ch’uya kausaytan chinkachiran. Ch’uya runataq wañuran chayqa ch’uya runan necesitakuran chay juchamanta salvawananchispaq (Rom. 5:17). Jinaspapas Jehová Diospa kamachikusqanman jinaqa ‘kausaymanta kausaytan’ pagakunan karan (Éx. 21:23, 24). Chhaynapin señorninchis Jesucristoqa juchamanta kacharichiwaqninchis “Wiñay Yaya” kapun (Isa. 9:6; Rom. 3:23, 24).
3. Juan 14:31; 15:13 nisqan jina, ¿imaraykun Jesús wañuran?
3 Jesusqa anchatan taytanta munakuran, chaymi wañupunankama paytaqa kasukuran. Noqanchistapas munakuwanchismi, chaymi vidantapas qoran (leey Juan 14:31; 15:13). Kasukusqanraykun jamuq tiempopipas wiñay kausayta chaskikusunchis. Kay yachachikuypin yachasunchis imaraykun Jehová Dios jinallata qhawaran wawan ñak’arispa wañunanta chayta. Yachallasuntaqmi imaynatan apóstol Juan Jesuspa wañusqanmanta agradecekuran chayta, imaynatas noqanchispas agradecekusunman chaytawan.
¿IMARAYKUN JEHOVÁ DIOS JINALLATA QHAWARAN JESUSPA ÑAK’ARISQANTA?
Noqanchisrayku Jesuspa ñak’arisqanpin yuyaykunanchis (4 parrafota qhaway)
4. ¿Imaynatan Jesusta wañuchiranku?
4 Manaraq wañupushaqtinqa Jesustaqa imaymanatan ruwaranku. Paytan Roma soldadokunaqa soq’aranku k’amiranku ima, chay soq’asqanku jasut’iqa aycha qarantaraqmi llik’irpariran. Jesusqa atinmanña karan millonninpi angelkunata wajakuyta chaypas, payqa jinallatan aguantaran (Mat. 26:52-54; Juan 18:3; 19:1). Jesusqa sinchi k’irisqan kasharan, chaywanpas k’aspitan q’epichiranku. Manaña atiqtintaq Simón sutiyoq runawan yanapachiranku (Mat. 27:32). Wañuchinanku pataman chayaspataq q’epichisqanku k’aspiman makinta chakinta clavaranku, jinaspataq warkuranku. K’aspita sayachiqtinkuqa astawanraqchá k’irinkunaqa llik’irikuran, chayta rikuspan mamitanpas qatikuqninkunapas waqaranku. Wakin runakunan ichaqa Jesusta asipayasharanku (Luc. 23:32-38; Juan 19:25). Jesusqa manañan samayta atiranñachu, kallpanpas manañan karanñachu. Chaywanpas Jesusqa taytanpa kamachikuyninkunataqa llapantan kasukuran, chayraykun fuerteta wajakuspa niran: “Yayáy, makiykimanmi vidayta jap’ichiyki”, nispa. Chayta nispataq wañupuran (Mar. 15:37; Luc. 23:46; Juan 10:17, 18; 19:30). Jesusqa maytachá ñak’ariran chhaynata wañuchishaqtinkuqa.
5. ¿Imaraykun Jesús ancha llakisqapuni kasharan?
5 Imaymanataña Jesusta ruwaranku chaypas, manan chaywanchu llakisqa kasharan, aswanpas “¡Diostan k’amishan!” nispa tumpasqankumantan llakisqa kasharan (Mat. 26:64-66). Chayraykun niran: “Yayáy, munanki chayqa kay copata noqamanta karunchay”, nispa (Mat. 26:38, 39, 42). ¿Imaraykun Jehová Dios Jesuspa wañunanta jinallata qhawaran? Kinsamanta yachasunchis.
6. ¿Imaraykun Jesús p’enqayta k’aspipi wañunan karan?
6 Juj) judío runakunaqa manan Diospa kamachikuyninkunata kasukurankuchu, chaymi paykunaqa ñakasqa karanku. Chayraykun Jesusqa k’aspipi wañunan karan, chhaynapi ñakasqa kasqankumanta salvananpaq (Gál. 3:10, 13). Chaymantapas judiokunaqa Adanpa juchanraykun juchayoq kallarankutaq, chayraykun Jesusqa wañunallantaq karan (Rom. 5:12). Jehová Diosmi niran pipas kamachikuyninkunata mana kasukuqpas mana junt’aqpas ñakasqa kananta. Chhayna ñakasqa runakunataqa wañuchinankun karan, jinaspataq mayninpiqa k’aspipi warkunanku karan (Deut. 21:22, 23; 27:26).b Jesusqa judío runakunaraykun k’aspipi clavasqa p’enqayta wañuran, chhaynapi paypi iñiq judío runakuna salvasqa kanankupaq.
7. ¿Imaraykun Jehová Dios jinallata qhawaran Jesús ñak’arispa wañunanta?
7 Iskay) Jehová Diosmi Jesustaqa uma sacerdote kananpaq preparasharan, chaymi jinallata qhawaran ñak’arispa wañunanta. Jesusqa alto kunkawan waqasparaqmi Jehová Diospa yanapayninta mañakuran. Kikin Jesusmi imaymana pruebakunapi ñak’ariran, chaymi payqa preparasqa kashan ima pruebapipas tarikuqtinchis yanapawananchispaq. Jesusqa uma sacerdotenchismi kapun, payqa allintan yachan mayninpi pisipananchista, chaymi payqa pisipaqtinchispas khuyapayawasunchis. ¡May kusikunapaqmi chayta yachayqa! (Heb. 2:17, 18; 4:14-16; 5:7-10.)
8. ¿Imatan Jesús rikuchiran ñak’arispa wañusqanwan?
8 Kinsa) Jehová Diosqa jinallatan qhawaran Jesús ñak’arinanta, chaywanmi rikuchisharan Saqraqa yanqamanta runakunata tumpasqanta. Saqraqa piensanmi ima pruebapipas tarikuspaqa Diosta saqerparinanchista, Adán Eva jina mana kasukuq kananchista (Job 1:9-11; 2:4, 5). Jehová Diosqa yacharanmi wawan ima pruebapiña tarikuspapas junt’aq sonqo kananta. Chaymi jinallata qhawaran ñak’arispa wañunanta, chaywanmi Jesusqa rikuchisharan Saqraqa llulla kasqanta.
JESUSPA WAÑUSQANMATAN APÓSTOL JUAN AGRADECEKURAN
9. ¿Imatan apóstol Juan ruwaran 60 watakuna masraq?
9 Jesuspa wañupusqanpi iñisqanchisraykun ima pruebapiña tarikuspapas Diosmanta willashallanchis. Chaytan apóstol Juanpas ruwaran, payqa 60 watakuna masmi runakunaman yachachiran pichus Jesús kasqanta, noqanchisrayku wañusqantapas. Apóstol Juanqa Diosmantan willashallaran, chaymi paytaqa Patmos islaman apaspa carcelpi wisq’aranku 100 watayoqña karan chaypas (Apo. 1:9). ¡Maytan Apóstol Juanpa ruwasqanqa kallpachawanchis Diosmantapas Jesusmantapas willashanallanchispaq!
10. ¿Imakunatan apóstol Juan qelqaran Jesuspa wañusqanmanta agradecido kasqanta rikuchinanpaq?
10 Apóstol Juanmi qelqasqan librokunapi rikuchiran Jesuspa wañusqanmanta may agradecido kasqanta. Chaymi 100 kutita jina rimaran imarayku Jesús noqanchisrayku wañuran chayta. Juj cartanpin khaynata qelqaran: “Pipas ima juchamanpas urman chayqa, kashanmi yanapaqninchis, payqa Jesucriston, payqa chaninmi”, nispa (1 Juan 2:1, 2). Chaymantapas niranmi Jesusmanta cheqaq kaqta willayqa ancha allinpuni kasqanta (Apo. 19:10). Chaykuna qelqasqanpin reparanchis apóstol Juanqa Jesuspa wañusqanmanta ancha agradecido kasqanta.
¿IMAYNATAN NOQANCHISPAS JESUSPA WAÑUSQANMANTA AGRADECEKUSUNMAN?
Jesuspa wañusqanmanta agradecekusun chayqa manan jatun juchakunamanqa urmasunchu (11 parrafota qhaway)c
11. ¿Imatan ruwananchis juchaman ama urmananchispaq?
11 Amapuni juchaman urmasunchu. Noqanchisqa manapunin juj runakuna jinaqa ninanchischu: “Kunan juchaman urmarusaq chayqa, Jehová Diosqa perdonawallanqan”, nispaqa. Aswanpas ima juchamanpas urmananchispaq jina kashasunman chayqa, ninanchismi: “Jehová Diosqa noqaraykumá riki wawan Jesustaqa kachamuran, jinaspa Jesusqa khuyayta ñak’arispa wañuran. Chhaynaqa manapunin noqaqa kay juchataqa ruwaymanchu”, nispa. Chaymantapas Jehová Diosmantan mañakusunman: ‘Yanapaykuway tentacionkunaman ama urmanaypaq’, nispa (Mat. 6:13).
12. ¿Ima ruwananchispaqmi kallpachawanchis 1 Juan 3:16-18 textoq nisqan?
12 Iñiqmasinchiskunatan munakunanchis. Jesusqa anchatapunin iñiqmasinchiskunata munakun, chaymi vidantapas paykunarayku qoran. Chaymi noqanchispas iñiqmasinchiskunata munakunanchis, chhaynapin rikuchisunchis Jesuspa wañusqanmanta agradecido kasqanchista (leey 1 Juan 3:16-18). Chhaynaqa sumaqtan iñiqmasinchiskunawan kausananchis (Efes. 4:29, 31–5:2). Onqosqaña kaqtinkupas, ima sasachakuypiña tarikuqtinkupas sumaqtan paykunataqa yanaparinanchis. ¿Imatan ruwasunman mayqen iñiqmasinchispas sonqonchista k’iriwaqtinchis?
13. ¿Imaraykun jujkunata perdonananchis?
13 ¿Usqhayllachu phiñarukunchis mayqen iñiqmasinchispas mana allinta ruwawaqtinchis? (Lev. 19:18.) ¿Iman yanapawasunman paykunata perdonananchispaq? Biblian nin: “Qankunapura paciencianakuychis, perdonanakuychis razonwanña pipaqpas phiñasqa kashankichis chaypas. Imaynan Jehová Diospas tukuy sonqowan perdonarasunkichis chhaynallatataq qankunapas ruwaychis”, nispa (Col. 3:13). Chhaynaqa, iñiqmasinchiskunata perdonaspaqa Jehová Diostan agradecekushanchis noqanchisrayku Jesuspa wañusqanmanta.
¿IMAYNATAN KAUSAYNINCHISPI RIKUCHISUNMAN AGRADECIDO KASQANCHISTA?
14. ¿Imatan sapa p’unchay ruwananchis?
14 Jehová Diostan agradecekunanchis Jesús noqanchisrayku wañusqanmanta. India nacionmanta 83 watayoq Joanna hermananchismi nin: “Sapa kuti Jehová Diosmanta mañakuspaqa yuyarinipunin Jesús noqanchisrayku wañusqanta. Chaymi Jehová Diosta ‘gracias’ nini chay ruwasqanmanta”, nispa. Noqanchispas hermananchis Joanna jinan sapa p’unchay Jehová Diosmanta mañakunanchis juchanchiskunamanta perdonawananchispaq. Sichus ima jatun juchamanpas urmaranchis chayqa umalliqkunaq yanapaynintan mañakunanchis. Paykunan sumaqta Bibliawan yuyaychawasunchis, Jehová Diosmantapas mañapuwasunchis juchanchiskunamanta perdonawananchispaq. Jehová Diosqa perdonawasunmi ima juchanchismantapas señorninchis Jesucristo wañusqanrayku (Sant. 5:14-16).
15. ¿Imaraykun tiempota t’aqananchispuni Jesusmanta yachananchispaq?
15 Sapa p’unchay yuyarisun Jesús noqanchisrayku wañusqanta. 73 watayoq Rajamani hermananchismi nin: “Bibliapipas qelqanchiskunapipas imaynata Jesús ñak’arisqanmanta leespaqa sonqoyraqmi ‘ch’allaq’ nin”, nispa. Noqanchispas Jesuspa ñak’arisqanmanta leeqtinchisqa sonqonchisraqmi nanan, waqaytaraqmi munanchispas. Chaymi yuyaykunanchis noqanchisrayku Jesuspa wañusqanpi, chaymi yanapawasunchis Jehová Diostapas Jesustapas astawan munakunanchispaq. Chaypaqmi ichaqa tiempota t’aqananchis Jesusmanta astawan yachananchispaq.
Jesusmi discipulonkunata yachachishan imaynata wañupusqan p’unchayta yuyarinankupaq (16 parrafota qhaway)
16. ¿Imaynatan yanapawanchis Jesuspa wañusqanmanta runakunaman yachachisqanchis? (Qhaway tapanpi kaq dibujota.)
16 Jesuspa wañusqanmanta jujkunaman yachachisun. Jesuspa wañusqanmanta runakunaman yachachiqtinchisqa astawanmi Jesuspa wañusqanta valoranchis. Jehová Diosqa imaymana qelqakunatan qowanchis runakunaman Jesuspa wañusqanmanta yachachinanchispaq. Juj kaqmi kashan ¡Diosmanta hamuq allin willakuykuna! nisqa folleto, 4 willakuypin nishan “¿Pitaq Jesucristori?” nispa. Juj kaq qelqanchistaq ¿Imatan Biblia yachachin? nisqa libro, 5 capitulopin willashan “Jesusmi noqanchisrayku sacrificakuran” nispa. Chaykunawanmi runakunata yachachisunman, chhaynapin paykunapas Jesuspa wañupusqanta valoranqaku. Chaymantapas sapa watanmi runakunaman willamunchis Jesuspa wañusqanta yuyarinanchispaq, chaykunata ruwaspan rikuchillanchistaq Jesuspa wañupusqanta valorasqanchista.
17. ¿Imaraykun allinpuni karan noqanchisrayku Jesuspa wañusqan?
17 Kaypin yacharunchis imarayku Jesús wañusqanta. Kunanqa Jesuspa wañusqanraykun Jehová Diosman achhuykuyta atinchis, paywan allin amigontin kaytapas atinchis. Jesuspa wañusqanraykun Saqrapas imachus ruwasqankunapas wiñaypaq chinkachisqa kapunqa (1 Juan 3:8). Chaymantapas kay allpapin sumaq paraisopi tiyasunchis, chaytan Jehová Diosqa Adanpaqpas Evapaqpas munaran. Chaytan Jehová Diosqa qonqa payta kasukuq payta munakuq runakunaman. Chhaynaqa sapa p’unchaymi rikuchinanchis Jesuspa wañusqanmanta agradecido kasqanchista.
20 TAKI Munasqa wawaykitan qowarankiku
a ¿Imaraykun Jesús sinchita ñak’arispa wañuran? ¿Imaynatan chay ruwasqanmanta agradecekusunman? Chaykunamantan kay yachachikuypi yachasunchis.
b Roma llaqta runakunaqa kausashaqllatan juchallikuq runakunataqa k’aspipi warkuqku. Chhaynatan Jesustapas wañuchiranku, Jehová Diosmi ichaqa jinallata chhayna wañuchinankuta qhawaran.
c FOTOMANTA WILLAKUY: Juj hermanonchismi juj ladoman kutirin qhelli ruwaykunata ama qhawananpaq, juj wayna hermanotaq cigarrota mana chaskikunchu, juj kaq hermanomantaq jefen qolqeta pagashan mana allinkunata ruwananpaq, paymi ichaqa mana chaskikunchu.