Amapuni iskayasunchu cheqaq religionpi kasqanchismantaqa

1. ¿Imaraykun wakin runakuna religionkunamanta iskayanku?

KAY pachapiqa waranqanpin religionkuna kan. Llapankutaqmi ninku: “Noqaykun cheqaq religionqa kayku, noqaykuqa llapantan Diospa kamachikuyninkunata junt’ayku”, nispa. Chayraykun wakin runakunaqa llapa religionkunamanta iskayanku. Chaymi ninku: “¿Mayqenpunitaq cheqaq religionri? ¿Llapa religiontachu Dios chaskin?”, nispa. Noqanchisrí, ¿imaynapitaq yachasunman cheqaq religionpipuni kashasqanchista? ¿Chaypi yachasqanchispas cheqaqpuni kasqanta? Chaymantapas, ¿imaynapin yachasunman Jehová Dios chaskinpunichus pay servisqanchista icha manachus chayta? Kay yachachikuymi yanapawasunchis Jehová Diospa cheqaq llaqtanpi kasqanchismanta ama iskayananchispaq.

2. ¿Imaraykun apóstol Pablo Bibliapi yachasqankunamanta manapuni iskayaranchu? (1 Tesalonicenses 1:5.)

² Apóstol Pabloqa manan jayk’aqpas Bibliapi allin willakuykuna yachasqanmantaqa iskayaranchu (leey 1 Tesalonicenses 1:5). Payqa allintan Bibliaq nisqanta estudiaran, chaymi yacharan Bibliaqa “Diospa yuyaychasqan” kasqanta (2 Tim. 3:16). Apóstol Pabloqa Bibliata allinta estudiaspan yacharan Jesusqa Diospa kachamusqan Mesías kasqanta. Chay tiempopi umalliqkunan ichaqa mana allintachu Bibliata estudiaranku, chaymi mana creerankuchu Jesús Mesías kasqantapas. Chaymantapas “reqsiykun Diostaqa” nishaspapas manan Diospa kamachikuyninkunataqa kasukurankuchu (Tito 1:16). Apóstol Pabloqa Diospa llapa kamachikuyninkunatan kasukuran, chaykunatataqmi runakunamanpas yachachiran. Payqa manan chay tiempopi runakuna jinachu Diospa kamachikuyninkunataqa munasqallanta kasukuran (Hech. 20:27).

3. Diospa cheqaq llaqtanpi kasqanchismanta ama iskayananchispaq, ¿llapantapunichu Bibliaq nisqanta yachananchis? (Qhaway “Jehová Diospa yachaynintapas kamasqankunatapas manapunin llapantaqa entiendeyta atisunmanchu” nisqata.)

³ Wakin runakunan ninku: “Cheqaq religionqa lliutan imatapas yachanan”, nispa. Ichaqa manan chhaynapunichu. Apóstol Pablon kallpachawaranchis Bibliata allinta t’aqwinanchispaq, ichaqa manan chaywanchu nisharan Bibliaq nisqanta llapantapuni yachananchista (1 Tes. 5:21). Chaymi nillarantaq: “Noqanchisqa wakillantan yachanchis [...]. Kunanqa metalmanta ruwasqa espejopipas qhawakushasunman jinan arphata rikushanchis”, nispa (1 Cor. 13:9, 12). Apóstol Pablopas manan llapantapunichu yacharan, ichaqa allintan Bibliapi wakin yachachikuykunata entienderan. Noqanchispas manan llapantapunichu yachanchis, chaywanpas allintapunin yachanchis Diospa cheqaq llaqtanpipuni kasqanchista.

4. a) ¿Iman yanapawasunman cheqaq religionpi kasqanchismanta ama iskayananchispaq? b) ¿Imakunamantan kay yachachikuypi yachasunchis?

⁴ ¿Iman yanapawasunman cheqaq religionpi kasqanchismanta seguro kananchispaq? Chaypaqqa allintan reparananchis imaynatas Jesús Jehová Diosta yupaycharan chayta, chhaynatachus kay tiempopi Jehová Diospa testigonkunapas Diosta yupaychashanchis chaytapas. Cheqaq cristianokunaqa: 1) manapunin idolokunata yupaychanchischu, 2) Diospa sutintan respetanchis, 3) Bibliaq yachachisqantan valoranchis, 4) anchatapunin munanakunchispas. Chaykunamantan kay yachachikuypi yachasunchis.

MANAPUNIN IDOLOKUNATAQA YUPAYCHANCHISCHU

5. ¿Imaynatan noqanchispas Jesús jina Jehová Diosllata yupaychasunman?

⁵ Jesusqa anchatapunin papanta munakuran, chaymi janaq pachapiña kay pachapiña kashaspapas Jehová Diosllatapuni yupaycharan (Luc. 4:8). Chaytan discipulonkunamanpas yachachiran, chaymi discipulonkunaqa Jehová Diosta yupaychanankupaqqa manapuni ima idolotapas ruwakurankuchu. Jehová Diosqa juj espiritun, chaymi manapuni payman ima rijch’akuq idolotapas imagenkunatapas ruwakusunmanchu (Isa. 46:5). Chhaynaqa, ¿allinchu kanman idolokunamanpas imagenkunamanpas qonqorikuy? Manapunin. Jehová Diosmi Israel runakunata kamachiran: “Aman ima idolotapas, ima rijch’aytapas ruwakunkichu, janaq pachapi kaqman rijch’akuqtapas, kay pachapi kaqman rijch’akuqtapas, kay pachaq ukhun unupi kaqman rijch’akuqtapas. Aman chaykunaman k’umuykukunkichu”, nispa (Éx. 20:4, 5). Cheqaq cristianokunaqa Jesús jinan Jehová Diosllata yupaychanchis.

6. ¿Pikunaq ejemplontan Jehová Diospa testigonkuna qatikunchis?

⁶ Ñaupa tiempopi cristianokunaq vidanmanta estudiaq runakunan ninku: “Chay tiempopi cristianokunaqa Diosllatan yupaychaqku”, nispa. Chay cristianokunamanta willaq libropipas khaynatan nin: “Dios yupaychana wasikunapi idolokunata rikuspaqa phiñakunkumanmi karan”, nispa (History of the Christian Church). Kay tiempopi cristianokunapas ñaupa tiempopi jinan Jehová Diosllata yupaychanchis. Chayraykun manapuni ima idolomantapas, imagenkunamantapas, angelkunamantapas nitaq Jesusmantapas mañakunchischu. Chaymantapas manapunin banderatapas escudotapas napaykunchischu, nitaqmi himno nacionaltapas takinchischu. Chaykunata napaykuyqa adoray jinan kanman. Noqanchisqa Jesús jinan imaña kaqtinpas Jehová Diosllata adoranchis (Mat. 4:10).

7. ¿Imapin Jehová Diospa testigonkuna juj religionkunamanta juj niray kanchis?

⁷ Kay tiempopi runakunaqa Diosta jinaraqmi religionpi umallikunata jatunchanku. Chayraykun iglesiankuman rinku, libronkuta rantinku, qolqetapas qonku. Paykunaqa chay umallikunaq nisqantan llapanta creenku. Manapaschá Jesustapas chhaynataqa uyarinkumanchu karan. Jehová Diospa testigonkunan ichaqa manapuni pi runatapas qatikunchischu. Respetanchisña iñiq t’aqapi umalliqkunata chaypas Jesuspa nisqantan kasukunchis. Paymi niran: “Qankunaqa llapaykichispas wayqe-panallantinmi kankichis”, nispa (Mat. 23:8-10). Chaymantapas manapunin religionpi umallikunatapas kay pachapi kamachikuqkunatapas Diosta jinaqa jatunchanchischu. Manataqmi politicapipas ima ruwasqankupipas chaqrukunchischu. Chaykunapin Jehová Diospa testigonkunaqa juj religionkunamanta juj niray kanchis (Juan 18:36).

JEHOVÁ DIOSPA SUTINTAN RESPETANCHIS

8. ¿Imaraykun Jehová Diospa sutinta jatunchananchis runakunamanpas yachachinanchis?

⁸ Juj kutinmi Jesús taytanmanta mañakushaspa khaynata niran: “Yayáy, sutiykita jatunchay”, nispa. Jinan Jehová Diosqa kutichiran: “Jatunchaniñan, wajmantataqmi jatunchasaqpas”, nispa (Juan 12:28). Jesús kay pachapi kashaspaqa llapa runakunamanmi taytanpa sutinta willaran, chayta ruwaspaqa taytanpa sutintan jatuncharan (Juan 17:26). Cheqaq religionpi kaqkunapas chaytan ruwanchis, manan Diospa sutinmantaqa p’enqakunchischu, aswanpas respetanchismi. Chaymantapas runakunamanmi Diospa sutinta yachachinchis.

9. ¿Imaynatan ñaupa tiempopi cristianokuna Diospa sutinta respetasqankuta rikuchiranku?

⁹ Apostolkunaq tiemponpi chayllaraq iñiq t’aqakuna qallarishaqtinmi Jehová Diosqa ‘waj llaqtayoq runakunata yuyarispa paykuna ukhumanta runakunata sutinpaq ajllakuyta qallariran’ (Hech. 15:14). Chay tiempopi tiyaq cristianokunaqa anchatan Diospa sutinta respetaranku, chaymi mana manchakuspa llapa runakunaman Diospa sutinta yachachiranku, Bibliapipas Diospa sutinta churaranku.b Chhaynapin paykunaqa rikuchiranku Diospa sutinpaq jinapuni kasqankuta (Hech. 2:14, 21).

10. ¿Imaraykun nisunman: “Jehová Diospa testigonkunaqa Diospa sutinpaq jinapunin kanchis”, nispa?

¹⁰ ¿Diospa sutinpa jinapunichu Jehová Diospa testigonkunapas kashanchis? Kay tiempopi religionkunaqa Bibliamantan Diospa sutinta orqopunku, manan munankuchu Diospa sutinmanta runakuna mañakunankutapas.c Jehová Diospa testigonkunaqa Diospa sutintan respetanchis jatunchanchis, chaymi Diospa sutintaqa runakunaman yachachinchis. Chaymantapas kallpachakunchismi ch’uyata kausananchispaq, chhaynapi Diospa sutinta jatunchananchispaq (Isa. 43:10-12). Manan mayqen religionpas Jehová Diospa testigonkuna jinaqa Diospa sutinmantaqa willankuchu. Jehová Diospa testigonkunaqa 240 millones más Biblia ruwasqanchispin maypi kananpi Diospa sutinta churapuranchis, 1.000 más simikunapi qelqakuna ruwasqanchispipas Diospa sutintaqa kashanmi.

BIBLIAQ YACHACHISQANTAN VALORANCHIS

11. ¿Imaynatan ñaupa tiempopi cristianokuna cheqaq yachachikuykunata munakuranku?

¹¹ Jesusqa anchatan Bibliapi kaq yachachikuykunataqa munakuq, chaymi kallpachakuran chayman jina kausananpaq, runakunamanpas chaymanta yachachinanpaq (Juan 18:37). Ñaupa tiempopi cristianokunapas Jesús jinan Bibliapi kaq yachachikuykunataqa munakuranku (Juan 4:23, 24). Chaymi apóstol Pedro paykunata niran ‘cheqaq ñan’ kasqankuta (2 Ped. 2:2). Ñaupa tiempopi cristianokunaqa Bibliapi kaq yachachikuykunatan munakuqku, chaymi paykunaqa allinta cuidakuqku pantasqa yachachikuykunamanta, yanqa engañokunamanta, runakunaq costumbrenkunamantapas (Col. 2:8). Kay tiempopi cheqaq cristianokunapas cheqaq ñanninta purinanchispaqmi kallpachakunchis (3 Juan 3, 4). Chaymi mana kay pachapi costumbrekunaman jinachu nitaq runakunaq munayninman jinachu kausanchis, aswanpas Diospa munayninman jinapunin kausanchis.

12. ¿Imatan Diospa llaqtanta pusariq umallikuna ruwanku ima yachachikuypas sut’inchana kaqtin?

¹² Jehová Diospa testigonkunaqa manan llapantapunichu Bibliaq yachachisqantaqa entiendenchis. Chaymi mayninpiqa ima yachachisqanchistapas askha kutipi cambiaranchis. Ichaqa manan chayraykuchu cheqaq religionpi kashasqanchismantaqa iskayananchis. Bibliaqa willaranñan cheqaq kaqkunaqa pisi-pisimanta entiendekunan kasqanta (Col. 1:9, 10). Jehová Diosqa pisi-pisimantan llaqtanta yachachin, chaymi chay yachachikuykuna sut’inchakunantaqa pacienciawan suyakunanchis (Prov. 4:18). Chayraykun Diospa llaqtanta pusariq umallikunaqa ima yachachikuypas cambiana kaqtinqa mana manchakuspa cambiamunku. Paykunaqa manan religionpi umallikuna jinachu runata kusichinankupaq imatapas cambiamunku, nitaq allin qhawarisqa kayta munaspachu. Diospa llaqtanta pusariqkunaqa ima yachachikuykunatapas sut’inchamunku Diosman astawan achhuykunanchispaqmi, chhaynapi Jesús jina Diosta jatunchananchispaq (Sant. 4:4). Bibliapi kaq yachachikuykunataqa anchatan munakunchis, chaymi ima yachachikuytapas aswan allinta entiendespaqa mana manchakuspa cambianchis (1 Tes. 2:3, 4).

JUJKUNA-JUJKUNAWANMI MUNANAKUNCHIS

13. ¿Imaynan ñaupa tiempopi cheqaq cristianokuna karanku? ¿Imaynan Jehová Diospa testigonkunapas kanchis?

¹³ Ñaupa tiempopi cristianokunaqa anchatapunin munanakuranku. Jesusmi niran: “Qankunapura munanakusqaykichispin lliupas yachanqaku discipuloykuna kasqaykichista”, nispa (Juan 13:34, 35). Kay tiempopi Jehová Diospa testigonkunapas ñaupa tiempopi cristianokuna jinan munanakunchis. Juj llaqtayoqña kanchis, juj simitaña rimanchis, juj colorniyoqña kanchis chaypas juj nisqallan kausanchis. Noqanchisqa manan juj religionkuna jinachu t’aqanasqa kausanchis. Chhayna munanakusqanchismi sut’ita rikukun juñunakuykuna aparisqanchispi, jatun asambleakuna aparisqanchispi ima. Chaypin sut’ita rikukun cheqaq cristianokuna kasqanchista, Jehová Diostapas munayninman jina yupaychasqanchista.

14. Colosenses 3:12-14 nisqan jina, ¿imaynatan jujkuna-jujkunawan munanakusqanchista rikuchisunman?

¹⁴ Bibliapin nin: “Tukuy sonqowan munanakuychis”, nispa (1 Ped. 4:8). Chhayna munanakusqanchistan rikuchinchis jujkuna-jujkunawan sumaqta kausaspa. Juj hermanoña phiñachiwasunman chaypas perdonanakuspa, paciencianakuspa, yanapanakuspa iman kausananchis (leey Colosenses 3:12-14). Chhaynapin runakunaqa yachanqaku cheqaq cristianokuna kasqanchista.

JUJ IÑIYNILLAYOQMI KANCHIS

15. ¿Pikunaq ejemplontan kay tiempopi Jehová Diospa testigonkuna qatikunchis?

¹⁵ Kay tiempopipas ñaupa tiempopi cristianokunaq ejemplontan qatikunchis. Chaymi Diospa llaqtanpiqa kan iñiq t’aqakunata watukuq umallikuna, iñiq t’aqakunata qhawariq umalliqkuna, iñiq t’aqapi yanapakuq kamachikunapas (Filip. 1:1; Tito 1:5). Chaymantapas ñaupa tiempopi cristianokuna jinan qhelli juchapaq qhawarinchis mana casarakuspa tiyaytaqa. Chaymantapas manan qhelli juchakunata ruwanchischu, yawartapas manan mijunchischu nitaq churachikunchischu. Juchankumanta mana pesapakuq hermanokunapas ñaupa tiempopi jinan Diospa llaqtanmanta qarqosqa kapunku (Hech. 15:28, 29; 1 Cor. 5:11-13; 6:9, 10; Heb. 13:4).

16. ¿Imatan yachasunman Efesios 4:4-6 nisqanmanta?

¹⁶ Kay tiempopiqa askha runakunan ninku: “Noqaykun cheqaq religionqa kayku. Noqaykun Jesuspa qatikuqninkunaqa kayku”, nispa. Jesusmi ichaqa niran: “Manan llapa ‘Señor, Señor’ niwaqniychu janaq pacha gobiernomanqa jaykunqa”, nispa (Mat. 7:21-23). Jinaspapas Bibliaqa willaranñan askha runakuna tukukuy p’unchaykunapi ‘Dios sonqo runakunaman rijch’akunankuta’ (2 Tim. 3:1, 5). Askha religionkunaña kay pachapi kan chaypas, jujllan cheqaq religionqa. Chaytan Biblia nin (leey Efesios 4:4-6).

17. ¿Imaynapin yachanchis Jehová Diospa testigonkunalla cheqaq religión kasqankuta?

¹⁷ Kay yachachikuypi yachamusqanchis jina Jehová Diospa testigonkunallan cheqaq religionqa kanku. Paykunallan Jesuspa ejemplontapas ñaupa tiempopi cristianokunaq ejemplontapas qatikunku. May munaymi Jehová Diospa llaqtanpi kayqa, chayllapin Jehová Diosmantapas imachus munasqanmantapas yachanchis. Chayraykun manapuni jayk’aqpas cheqaq religionpi kasqanchismantaqa iskayananchischu.