¿Imataq jatun Babilonia llaqtari?

Imaninmi Bibliapi

Apocalipsis libropin willashan “juj ramera warmimanta”. Willallantaqmi chay warmiq sutinqa mana entiendey atina kasqanta, “Jatun Babilonia” nisqa (Apocalipsis 17:1, 3, 5). Chay warmimanta rimaspaqa rimashanchis kay pachantinpi llapa pantasqa religionkunamantan, chay religionkunaqa “Diosmanta cheqaq yachachikuypi creenankumantaqa pantasqa yachachikuykunapin creerqanku”a (Romanos 1:25). Chay religionkunapiqa manan kaqllatachu yachachinku, chhaynaña kaqtinpas runakunatan t’aqanku Jehová Diosta reqsinankumanta (Deuteronomio 4:35).

¿Imaynapin yachasunman jatun Babilonia llapa pantasqa religionkuna kasqanta?

1. Jatun Babiloniamanta rimaspaqa juj rijch’anachiymantan rimashanchis. Apocalipsis libropiqa imaymanamantan willan rijch’anachiykunawan, chhaynaqa jatun Babiloniapas juj rijch’anachiyllan, manan cheqaq warmipunichu (Apocalipsis 1:1). Chaymantapas chay warmiqa askha unukunapis tiyaykun, chay unukunamanta rimaspaqa pachantinpi runakunamanta, llaqtakunamanta rimaykunamantawanmi rimashan (Apocalipsis 17:1, 15). Cheqaq warmiqa manayá chaytaqa ruwayta atinmanchu riki.

2. Jatun Babiloniaqa pachantinpin kashan. Chay warmimantan Bibliapi nin: “Allpa pacha reykunata kamachiq ancha jatun llaqtatan representan”, nispa (Apocalipsis 17:18). Chaymi chay warmiqa pachantinpi runakunata kamachin.

3. Jatun Babiloniaqa manan kay pachapi gobiernokunachu nitaq jatun negociokunapaschu, aswanpas llapa pantasqa religionkunan. Ñaupaq tiempopi jatun Babilonia llaqtapin askha religionkuna tarikuran, chay llaqtapiqa layqa ruwaykunapas junt’an karan (Isaías 47:1, 12, 13; Jeremías 50:1, 2, 38). Chay llaqtapiqa manan Jehová Diostachu adoraranku, aswanpas yanqa dioskunatan adoraranku (Génesis 10:8, 9; 11:2-4, 8). Chay llaqtapi kamachikuqkunaqa nishu jatunchakuqmi karanku, chaymi niranku: “Jehová Diosmantapas aswan atiyniyoqmi kayku”, nispa. Pisicharankutaqmi Jehová Diosta adoraqkunata (Isaías 14:4, 13, 14; Daniel 5:2-4, 23). Kunan tiempopipas jatun Babiloniaqa layqa ruwaykunawanmi junt’a kashan, chaywanmi yachanchis pantasqa religionkuna kasqanta (Apocalipsis 18:23)

   Kay pachapi kamachikuqkunan waqanqaku jatun Babilonia chinkachisqa kaqtin, chaywanmi reparanchis jatun Babiloniaqa mana gobiernokunachu kasqanta (Apocalipsis 17:1, 2; 18:9). Manataqmi jatun negociokunachu kanmanpas, ¿imarayku? Pachantinpi negociokunata ruwaqkunapas chinkachisqa kasqanmanta waqasqankurayku (Apocalipsis 18:11, 15).

4. 

   Photograph taken by courtesy of the British Museum

   Jatun Babiloniaq ruwasqanqa tupanmi pantasqa religionkunaq ruwasqanwan. Pantasqa religionkunaqa manan runakunata yanapankuchu Jehová Diosta servinankupaq, aswanmi runakunata tanqanku juj dioskunata adoranankupaq. Chay ruwaspankun Jehová Diosta wasanchashanku (Levítico 20:6; Éxodo 34:15, 16). Chay religionkunaqa ñaupa tiempopi Babilonia llaqtapi paqarisqan yachachikuykunatan yachachinku. Ñaupaq Babilonia llaqtapiqa trinidad nisqapin creeqku, creerqankutaqmi almaqa manan wañunchu nisqapi, askha idolokunatataqmi adoraqkupas. Chaytan kunan tiempopipas pantasqa religionkunaqa ruwashanku. Chay religionkunapi kaqkunaqa ninkun: “Diostan adorayku”, nispa. Ichaqa Satanaspa munayninman jinan kausanku. Chayta ruwaspan Jehová Diosta qhepaman churaspa waj dioskunata adorashanku (Santiago 4:4).

   Bibliapin nin: “Chay warmiqa pukaniraq azul p’achawan, k’anchaq puka p’achawan p’achasqa kasqa; chaymantapas qoriwan, sumaq qespi rumikunawan, perlakunawan iman adornasqa kasqa”, nispa. Chaypi nisqanqa allintan tupan pantasqa religionkunawan chay religionkuna qhapaq kasqankurayku (Apocalipsis 17:4). Chaymantapas Bibliapiqa ninmi jatun Babiloniaqa millay qhelli jucha ruwaykunawan junt’a kasqanta, chaykunaqa llulla yachachikuykunata runakunaman yachachisqankun, chayta ruwaspan Jehová Diosta pisichallankutaq (Apocalipsis 17:5). Chaymantapas Bibliapin nin: ‘Jatun Babiloniaq makinpin tarikunku llaqtakuna, runakuna, nacionkuna, rimaykunapas’, nispa. Chaytaqa nishan pantasqa religionkunapi kaq runakunamantan (Apocalipsis 17:15).

Chaymantapas Bibliapin nin: “Chay llaqtapin tarisqa karan allpa pachapi mana khuyapayaspa wañuchisqa runakunaq yawarninpas”, nispa (Apocalipsis 18:24). Qallariymantapachan pantasqa religionkunaqa runakunata tanqaranku juj llaqtankunawan guerraman jaykunankupaq. Chaymantapas mana cheqaqtachu Jehová Diosmanta runakunaman yachachiranku (1 Juan 4:8). Chaykunata ruwasqankuraykun askha runakuna wañuranku.

¿Imaynatan Dios qhawarishanman Jatun Babiloniata?

Bibliaq nisqanman jinaqa, Jatun Babiloniaq “jucha ruwasqanqa janaq pachakamaraqmi tauqasqa kashan” (Apocalipsis 18:4, 5). Chayraykun Jehová Diosqa may phiñasqa pantasqa religionkunawan kashan. Paykunan Diosta millaypaq qhawarichirqanku chaymantanpas serviqninkunata qatiykacharqanku.

¿Iman kanqa Jatun Babiloniawan?

Jehová Diosqa ñan “juiciota apamun” Jatun Babilonia contra, chaytan Bibliaqa willan (Apocalipsis 18:20). Rijch’anachiykunawanmi Jehová Diosqa willawanchis llapa pantasqa religionkuna tukuchisqa kanankuta (Apocalipsis 18:8). Paymi juj k’anchaq puka colorniyoq manchay phiña animalwan llapa pantasqa religionkunata chinkachinqa. Chay manchay phiña animalqa juj atiyniyoq organizacionmi (Apocalipsis 17:16, 17). Biblian nin: “Chhayna wijch’uykusqan kanqa chay jatun Babilonia llaqtaqa, manataqmi jayk’aqpas tarisqachu kanqa”, nispa (Apocalipsis 18:21). Chayraykun Diosta kasukuyta munaq runakunaqa usqaylla chay pantasqa religionkunamanta lloqsipunanku (2 Corintios 6:14-17).