¿Imaynatan kusikuwaq sasa llank’anawan?
Biblian nin: ‘Diospa qosqanmi mikhunchis, ukyanchis, tukuy llank’asqanchiswanpas q’ochukunchis’, nispa (Eclesiastés 3:13). Diosqa munanmi llank’ananchiswan kusikunanchista. Chaymi willawanchis imaynata llank’aspa kusikunanchista (Isaías 48:17). Chaytan Bibliapi willan. Qhawarisun ima consejokunan Bibliapi tarikun llank’ananchiswan kusikunapaq chayta.
LLANK’ANAYKI ALLINNIYKIPAQ KASQANTA QHAWARIY
Imapiña llank’anchis chaypas, “tukuy llank’asqanchismantan allinkunata tarinchis” (Proverbios 14:23, NM). ¿Ima allinkunatan tarinchis? Ñawpaqtaqa, chaywanmi mikhunchis, p’achakunchis, ima necesitasqanchistapas rantikunchis. Prometenña Dios serviqninkunata cuidananpaq chaypas, sapankanchismi k’uchi llank’aq kananchis (Mateo 6:31, 32; 2 Tesalonicenses 3:10).
Chay hinapin llank’asqaykiwan imachus ruwanaykita hunt’ashanki. Joshua nin: “Sichus llank’asqaykiwan ima necesitasqaykitapas rantikunki chayqa, allinpunin”, nispa.
Hinaspapas tukuy sonqowan llank’aspaqa allinmi sientekunki. Mayninpi sasaña otaq aburrikunapaqña kanman chaypas, kusisqan sientekunki sichus tiempollanpi ordenpi imatapas ruwanki chayqa. Chhaynapin mana qellamanchu tukupunki (Proverbios 26:14). Aaronmi nillantaq: “Yaqapaschá hukkunaqa mana reparankuchu tukuy sonqowan llank’asqayta, mayninpitaq sayk’usqa sientekuni ch’isiyaqta llank’asqaymanta. Chhaynaña kaqtinpas sonqoypin kusisqa sientekuni tukuy atisqayta ruwasqaymanta”, nispa.
ALLIN LLANK’AQ KANAYKIPAQ KALLPACHAKUY
Bibliaqa sumaqtan riman allin llank’aq runamanta, k’uchi ruwaq warmimantapas. Chaywanpas manan pipas ratollaqa allin llank’aqman tukunmanchu (Proverbios 22:29; 31:13). Wakin runakunaqa manan kusikunchu imatapas mana allinta ruwaspaqa. ¿Imaraykutaq mana allintachu ruwanku? Manapaschá kallpachakunkuchu allin llank’aq kanankupaq.
Sichus kallpachakunki imatapas allinta ruwanaykipaq chayqa, kusisqan kanki mayqen llank’anamanpas haykuspa. Williammi nin: “Tukuy sonqowan llank’aspaqa imatapas allintan ruwanki, chaywantaqmi kusikunki. Qellaykachakuspa ruwanki chayqa manan kusikunkichu”, nispa.
LLANK’ASQAYKIN HUKKUNATA YANAPAN
Huk llank’anaman haykuspaqa manan hayk’a qolqe ganasqallaykipichu piensanayki. Aswanpas allinmi kanman kaykunata tapukuy: ¿Imaraykun llank’anay? ¿Iman pasanman pipas chay llank’anata mana ruwaqtin? ¿Iman pasanman llank’anayta mana allin ruwaqtiy? ¿Imaynapin hukkunata yanapanman?
Qhepaq kaq tapuyman kutichiymi astawanqa yanapawasun llank’ananchiswan kusikunapaq. Jesucriston nirqan: “Aswan kusisamiyoqqa qoqmi chaskiqmantaqa”, nispa (Hechos 20:35). Chaypi nisqan hina, llank’asqanchiswanmi yanapashanchis jefenchista, clientenchiskunata, pisichikuypi tarikuq runakunatapas, astawanqa yanapashanchis familianchista.
Familianchista. Sichus tayta-mamakuna kallpachakunku familiankutan uywanankupaq chayqa, Diospa nisqantan hunt’ashanku, chayta ruwaspan familiankuta yanapashanku (1 Timoteo 5:8). Hinaspapas ejemplonkuwanmi wawankuta yachachishanku allin llank’aq kanankupaq. Shane nin: “Papayqa allintan llank’ananta ruwan. Payqa honrado runan, carpinteriapin astawanqa llank’arqan. Ruwasqanta qhawarispan yacharqani makiwan llank’aykunata allinpaq qhawariyta”, nispa.
Pisichikuypi tarikuqkunata. Apóstol Pablon cristianokunata nirqan allin llank’aq kanankupaq. ¿Imarayku? Chhaynapi ‘pisichikuqkunaman imallatapas qoykunankupaq’ (Efesios 4:28). Sichus kallpachakusun familianchista uywanapaq chayqa, atisunmanmi pisichikuypi tarikuqkunatapas yanapayta (Proverbios 3:27). Arí, tukuy sonqowan llank’aspaqa hukkunata yanapaspan kusikusun.
RUWANAYKIMANTA MASTARAQ RUWAY
Jesusmi orqo patapi yachachishaspa qatikuqninkunata nirqan: “Pipas kuskan leguata riysinaykipaq pusachikuqniykitaqa, huk leguata riysiy”, nispa (Mateo 5:41). ¿Imatan chaymanta yachanchis? Imachus kamachiwasqallanchista ruwanamantaqa mastaraqmi ruwananchis. Kallpachakuy allinta ruwanaykipaq ratolla ruwanaykipaqpas. Ama imatapas yanqa-yanqallataqa ruwaychu.
Chhaynata llank’aspaqa kusikunkin. ¿Imarayku? Manan hukkunaq obligasqanchu ruwashanki aswanpas qanllamantapuni ruwashanki. Chhayna kaytaqa qanllan decidiwaq (Filemón 14). Biblian nin: “Llank’aqqa kamachikunqan, qellan ichaqa kamachina kapunqa”, nispa (Proverbios 12:24). Kunan tiempopiqa manan pipas esclavo kanmanchu, ichaqa sichus kamachisqalla imatapas ruwasun chayqa esclavopas kasunman hina kanman. Kusisqa sientekunaykipaqqa imachus ruwanaykimanta mastaraq ruway.
ALLIN YUYAYWAN LLANK’ANATA QHAWARIY
Allin llank’aq kayqa allinpunin, ichaqa manan chayllapaqñachu kawsana. Bibliaqa allintan riman allin llank’aq runamanta, ichaqa willanmi llank’anaman ama nishuta qokunapaq (Proverbios 13:4). Biblian nin: “Aswan allinqa samarikuymi nishuta llank’anamantaqa”, nispa (Eclesiastés 4:6, NM). ¿Imatan chaywan nishan? Nishuta llank’anaman qokuqpaqqa manan tiempon kanchu huk ratollapas kusirikunanpaq. Bibliaq nisqan hina, chhayna runakunaqa wayratapas hap’iyta munankuman hinan kanman.
Bibliaqa yanapasunkin llank’anata allin yuyaywan qhawarinaykipaq, yanapasunkitaq ‘allin kaqtapuni akllakunaykipaq’ (Filipenses 1:10). ¿Mayqenkunataq chayri? Tiempotan horqonanchis familianchispaq, amigonchiskunapaq, astawanqa Diosman asuykunapaq. Chaytan ruwanchis Bibliata leespa, leesqanchispi piensaspa ima.
Allin yuyaywan llank’anankuta qhawariqkunaqa kusisqan kanku. Williammi nillantaq: “Ñawpaq jefeyqa allin yuyaywanmi llank’ananta qhawariq. Allinta llank’asqanraykun clientenkunaqa paywan kusikuqku. Ichaqa imachus chay p’unchaypaq ruwananta tukuspaqa, familianpaq, religionninpaq tiempota horqollaqtaq. Chaymi paytaqa kusisqallata rikuq kani”, nispa.