Jueces
1 Josuepa wañupusqan+ qhepamanmi Israel runakunaqa* Jehová Diosta tapurqanku:+ “¿Mayqenniykun ñaupaqta seqasaqku Canaán runakunawan maqanakuq?”, nispa. 2 Jehová Diostaq nirqan: “Judá ayllun+ rinqa, paymanmi entregani chay jallp’ata”, nispa. 3 Jinan Judá ayllu runakunaqa wayqenku Simeón ayllu runakunata nirqanku: “Qowasqanku jallp’aman+ riysiwayku Canaán runakunawan maqanakuq, chaymantataq chaskisqaykichis llaqtakunamanñataq risunchis”, nispa. Jinan Simeón ayllu runakunaqa riysirqanku.
4 Judá ayllu runakuna maqanakuq riqtinkun Jehová Diosqa Canaán runakunata perizita runakunatawan paykunaq makinman entregarqan,+ jinan paykunaqa Bezecpi chunka waranqa runakunata wañuchirqanku. 5 Chaypin Adoni-Bézec runawan tuparqanku, paywan maqanakuspataq Canaán runakunata+ perizita runakunatawan+ atiparqanku. 6 Jinan Adoni-Bezecqa ayqekurqan, qhepanta phawaspataq jap’irqanku, jinaspa chaki mama dedonkunata maki mama dedonkunatawan wit’urqanku. 7 Jinan Adoni-Bézec runaqa nirqan: “Qanchis chunka reykunaq chaki mama dedonta maki mama dedontawanmi wit’urqani, paykunan mesaypa ukhunmanta mijunata pallaqku. Imaynan noqapas ruwarqani chhaynatan Diospas ruwallawantaq”, nispa. Chaymantataq Jerusalenman+ aparqanku, chaypin wañupurqan.
8 Chaymantataq Judá ayllu runakunaqa Jerusalén+ llaqtata maqanakuq rirqanku, llaqtaman jaykuspataq llapa runakunata espadawan wañuchirqanku jinaspa chay llaqtata ninawan kanaykurqanku. 9 Chaymantataq orqo-orqokunapi, Négueb ladokunapi, Sefelá+ ladokunapi tiyaq Canaán runakunawan maqanakuq jaykurqanku. 10 Jinamantaq Judá ayllu runakunaqa Hebrón llaqtapi tiyaq Canaán runakunawan maqanakurqanku, chaypin wañuchirqanku Sesái, Aimán, Talmái+ runakunata. (Ñaupaqqa Quiryaj-Arbá nispan Hebrón llaqtataqa suticharqanku).
11 Chaymantataq Debir+ llaqta runakunawan maqanakuq rirqanku. (Ñaupaqqa Quiryaj-Séfer nispan Debir llaqtataqa suticharqanku).+ 12 Chaypin Calebqa+ nirqan: “Pipas Quiryaj-Séfer llaqtata jaykuspa chay llaqtata atipaqmanmi ususiy Acsata qopusaq esposan kananpaq”,+ nispa. 13 Jinan Quenazpa+ churin Ojnielqa+ chay llaqta runakunata atipamurqan, chaymi Calebqa ususin Acsata Ojnielman qopurqan esposan kananpaq, Quenazqa Calebpa sullk’a wayqenmi karqan. 14 Wasinkuman ripushaqtinkun Acsaqa Ojnielta rogarqan papanmanta jallp’ata mañakunanpaq. Jinan Acsaqa asnonmanta uraykurqan,* Calebtaq nirqan: “¿Imatan munashanki?”, nispa. 15 Acsataq nirqan: “Papáy, ama jinachu kay, juj regalotawan qoykuway. Uray ladopi* ch’aki jallp’allatan qowarqanki, manachu Guloj-Main* pampakunatawan qowankiman”, nispa. Jinan Calebqa Wichay Gulojta Uray Gulojtawan qorqan.
16 Moisespa suegron+ quenita runaq+ wawankunaqa Judá ayllu runakunawan kuskan askha palmera sach’akunayoq llaqtamanta*+ rirqanku Araj+ llaqtaq uray ladonpi Judá ch’inneqman. Chaypin paykunaqa tiyapurqanku.+ 17 Judá ayllu runakunawan Simeón ayllu runakunawanmi ichaqa Zefaj llaqtawan maqanakuq rirqanku, jinan chaypi Canaán runakunata chinkachirqanku.+ Chay llaqtatataq suticharqanku Ormá*+ nispa. 18 Chaymantataq Judá ayllu runakunaqa Gaza+ llaqtata, Asquelón+ llaqtata, Ecrón+ llaqtatawan atiparqanku, jinaspa llapa jallp’akunantinta jap’ikapurqanku. 19 Jehová Diospa yanapayninwanmi Judá ayllu runakunaqa orqo-orqopi llaqtakunata atiparqanku. Pampa uraykunapi tiyaq runakunatan ichaqa mana atipayta atirqankuchu, paykunaqa guerrapaq fierro carretakunayoqmi karqanku, llantanpi cuchillokunayoq.+ 20 Moisespa prometesqanman jinan Calebman Hebrón llaqtata qorqanku,+ jinan payqa chay llaqtamanta Anacpa kinsantin churinkunata qarqorqan.+
21 Benjamín ayllu runakunaqa manan Jerusalén llaqtamanta Jebús runakunata qarqorqankuchu. Chaymi Jebús runakunaqa kunan p’unchaykama Benjamín ayllu runakunawan kuska tiyashanku Jerusalén llaqtapi.+
22 Josepa wawankunataq+ Betel llaqta runakunawan maqanakuq rirqanku, Jehová Diosqa paykunawanmi kasharqan.+ 23 Paykunan wakin runakunata Betel llaqta qhawaqta kacharqanku. (Ñaupaqqa Luz+ nispan chay llaqtataqa suticharqanku). 24 Chaypin chay runakunaqa llaqtamanta juj runa lloqsimushaqta rikurqanku, jinan payta valekurqanku: “Ama jinachu kay, willaykuwayku, ¿maynintan kay llaqtaman jaykuruykuman? Niwankiku chayqa manan imanasaykikupaschu”,* nispa. 25 Jinan chay runaqa paykunaman rikuchirqan maynintachus jaykunankuta. Jinaspan Josepa familianmanta kaqkunaqa chay llaqtaman jaykuspa lliuta wañuchirqanku. Chay runata familiantawanmi ichaqa mana wañuchirqankuchu.+ 26 Chay runaqa Het runakunaq jallp’anman rispan juj llaqtata chaypi sayarichirqan, suticharqantaq Luz nispa. Chay llaqtaqa kunan p’unchaykaman chhayna sutiyoq.
27 Manasés ayllu runakunaqa manan qarqorqankuchu Bej-Seán llaqtapi runakunata, Tanac+ llaqtapi runakunata, Dor llaqtapi runakunata, Iblean llaqtapi runakunata, Meguidó llaqtapi runakunata, ni chay llaqtakunaq muyuriqninpi kaq juch’uy llaqtakunapi runakunatapas.+ Chay llaqtakunapi tiyaq Canaán runakunaqa manan lloqsiyta munarqankuchu. 28 Israel runakunaqa atiyniyoq llaqtaman tukupuspan Canaán runakunata esclavota jina llank’achirqanku,+ ichaqa manan llapantachu qarqorqanku.+
29 Efraín ayllu runakunapas manan Guézer llaqtapi tiyaq Canaán runakunataqa qarqorqankuchu. Guézer llaqtapin paykunaqa Efraín ayllu runakunawan kuska tiyashanku.+
30 Zabulón ayllu runakunapas manan qarqorqankuchu Quitrón llaqtamanta Najalol+ llaqtamanta Canaán runakunata. Chay runakunaqa Zabulón ayllu runakunawan kuskan tiyarqanku esclavo jina llank’aspa.+
31 Aser ayllu runakunapas manan qarqorqankuchu Akó llaqtapi, Sidón+ llaqtapi, Alaf llaqtapi, Aczif+ llaqtapi, Elbá llaqtapi, Afic+ llaqtapi, Reof+ llaqtapi tiyaq runakunataqa. 32 Chaymi Aser ayllu runakunaqa Canaán runakuna ukhupi tiyarqanku mana qarqosqankurayku.
33 Neftalí ayllu runakunapas manan qarqorqankuchu Bej-Semes llaqtapi tiyaq runakunata ni Bej-Anaj+ llaqtapi tiyaq runakunatapas. Aswanmi chay Canaán runakuna ukhullapi tiyarqanku.+ Ichaqa Bej-Semes llaqta runakunapas Bej-Anaj llaqta runakunapas esclavo jinan paykunapaq llank’arqanku.
34 Dan ayllu runakunaqa orqo-orqo wichayllapin qhepakurqanku, amorreo runakunan paykunataqa mana jaykuchirqankuchu uray pampakunaman.+ 35 Amorreo runakunaqa mana kuyurispan tiyarqanku Jeres orqo-orqokunapi, Ayalón+ llaqtapi, Salbin+ llaqtapipas. Josepa wawankuna atiyniyoqman tukuspan ichaqa chay runakunata esclavota jina llank’achirqanku. 36 Amorreo runakunaq jallp’anqa Acrabin qhatamantapacha+ Selamantapachan wichayman rirqan.