Mana allin ruwaykunawan ama samaykachikuychu

SASACHAKUY

“Escuelaypiqa llapallankun pisichawaqku. Chayraykun qhepa watamanqa rikch’ayniyta imayna kasqaytapas cambiarqani, chayqa manan allinniypaqchu karqan. Anchatan munarqani amigokunayoq kayta, chaymi allin qhawarisqa kanaypaq munasqankuta ruwarqani” (Juana, 16 watayoq)a.

¿Qantapas compañeroykikunachu nisunkiku mana allinkunata ruwanaykipaq? Chhayna kaqtinqa kaypi yachachikusqanta leey.

KAYTAN YACHANAYKI

Pipas mana allinkunata ruwananpaq tanqasqa kaspaqa allin runaña kaspapas chaytan ruwanman.

“Mana allin runakunawan huñukuspaqa samaykachikunkun” (1 Corintios 15:33)

“Mana allinkunata ruwanaykipaq tanqasuqtiykikuqa chaytan ruwanki mana allin kasqanta yachashaspapas, chhaynapin hukkunaq muñeconman hina tukupunki” (Rut)

¿Imaynapin mana allin ruwayman urmallawaqtaq?

‘Allinkaqta ruwayta munaqtiymi mana allinkaq ñoqapi kashan’ (Romanos 7:21)

“Compañeraykunaqa kusisqan rimanku imapas ruwasqankumanta, chaymi ñoqapas kikillaymanta chaykunata ruwayta munani” (Diana)

Compañeroykikunaq munasqanta mana ruwayqa kusichinasuykin.

“Allin concienciayoq kaychis” (1 Pedro 3:16, Mosoq Rimanakuy)

“Ñawpaqpiqa ratollan urmaq kani mana allin ruwayman tanqawaqtinku, kunanmi ichaqa manaña manchakuniñachu hukniray kayta, decidikusqayman hinapunin ruwani. Allin concienciayoq kayqa manan imawanpas tupanmanchu” (Carla)

KAYTAN RUWAWAQ

Ima mana allintapas ruwanaykipaq nisuqtiykikuqa kayta ruway:

Qhepaman imakunapi tarikunaykipi yuyaykuy. Kaykunata tapukuy: “¿Imapin rikukuyman chay ruwasqayta hukkuna yachaqtinku? ¿Imatan tayta-mamay ninman chay ruwasqaymanta? ¿Imaynan sientekuyman?”, nispa (Bibliaq yachachikuynin: Gálatas 6:7).

“Tayta-mamayqa kaytan tapuwan: ‘¿Imapin rikukuwaq compañeroykikunaq nisqasuykikuta ruwaspa?’, nispa. Paykunaqa imakuna mana allin kasqantan reparachiwanku” (Olivia)

Ama iskayaychu. Kayta tapukuy: “Ima ruwaytapas mana allinpaq qhawarispay, ¿imaraykun seguro kani chay ruway mana allinchu ñoqapaqpas hukkunapaqpas kasqanta?” (Bibliaq yachachikuynin: Hebreos 5:14).

“Erqellaraq kaspayqa “manan” nispalla kutichiq kani ima mana allintapas ruwanaypaq niwaqtinkuqa. Kunanmi ichaqa allinta kutichini, yachanin imachus allin imataqchus mana allin kasqanta. Ñoqan decidini imatapas ruwanaypaqqa manan hukkunachu” (Anita)

¿Imayna runan kanki? Kayta tapukuy: ¿Imayna runa kaytan munani? Chay imayna kayta munasqay runa, ¿imatan ruwanman mana allinta ruwananpaq tanqaqtinku? (Bibliaq yachachisqan: 2 Corintios 13:5).

“Kusisqan kashani imayna runa kasqaywan, chaymi mana nishutachu llakikuni ñoqamanta rimasqankuwan. Hinaspapas yaqa llapa runakunan imayna kasqayman hina munakuwanku” (Alicia)

Hamuq tiempopi yuyaykuy. Compañeroykikunaq nisqanta ruwayqa yanqapaqmi kanqa, paykunataqa pisi watakunamanta otaq killakunamantan manaña hayk’aqpas rikunkiñachu.

“Ñawpaq p’unchaykunallan escuelaypi kasqaymanta huk fotota qhawarqani, askha compañeroykunaq sutintan mana yuyarirqanipaschu. Paykunataqa aswan allinpaqmi qhawariq kani ima yuyaykusqaymantapas. ¡Chaytaqa mana allintan ruwarqani!” (Fernanda, 22 watayoq)

Preparakuy. Biblian nin: ‘Yachaychis imaynatachus sapankamanpas allinta kutichinaykichista’ (Colosenses 4:6).

“Tayta-mamayqa ñañaytapas ñoqatapas ensayachiwankun mana allinkunata ruwanaykupaq niwaqtinku imaynata kutichinaykupaq. Chhaynapi sasachakuykunapi tarikuspa atipanaykupaq” (Cristina)