Wasikunapi kaq arañaq llikan

WASIKUNAPI kaq arañaq (Parasteatoda tepidariorum) llikanpiqa kanmi huk pegamento, chaywanmi perqakunapi llikanta allinta k’askachin, ichaqa pampapiqa lloqsipunanpaq hinallan k’askachin chhaynapi ratolla chayninta pasaqkunata hap’inanpaq. ¿Imaynatan chay araña huk pegamentollawan perqapi llikanta allinta k’askachin pampapitaq lloqsipunanpaq hinalla?

¿Imaynatan k’askachin? Chay arañaqa perqakunapi, wasikunaq techonpi hukkunapi iman llikanta k’askachin. Perqakunapi kaq llikanqa allin k’askachisqan kashan, chaymi huch’uy phalaq animalkuna chayman chocaspaqa mana urmachinchu. Ichaqa pampapiqa manan chhaynatachu llikanta k’askachin, chaytan Akron universidadmanta (Ohio, Estados Unidos) estudiaqkuna yacharqanku. Pampapiqa karu-karullapin churan ruwasqan pegamentota, chaymi animalkuna chayman chocaqtinqa chay k’askachisqankuna lloqsipun hinaspan chay animaltaqa llikanwan hap’in.

Akron universidadmanta chay arañaq ruwasqanmanta estudiaqkunaqa, “wasikunapi tiyaq arañaq ruwasqanta hinan huk pegamentota ruwayta munashanku”. Chhaynapi kasqan pegamentollawan p’akisqa tullukunata churasqanku vendakunatapas k’askachinankupaq.

¿Ima ninkin chaymanta? Wasikunapi kaq arañaqa huk pegamentollawanmi perqakunapi llikanta allinta k’askachin pampapitaq lloqsipunanpaq hinalla k’askachin, ¿kikillanmanta paqarimuspachu chayta ­ruwanman, icha kamasqa kaspachu?