Wasanchay huchamanta

¿Iman wasanchay hucha?

¿IMA NINKUN RUNAKUNA?

Wakin llaqtakunapiqa normal-llan casarasqa qharikuna wasanchay hucha ruwasqankuqa. Wakinkunataq piensanku casarakuyqa huk ratollapaq kasqanta.

¿IMA NINMI BIBLIA?

Bibliapiqa “wasanchay hucha” nispan nikun huk qhari otaq huk warmi casarasqa kashaspa hukwan yuyaypi pantaqtan (Job 24:15; Proverbios 30:20). Diosqa wasanchay huchataqa millakunmi. Chaymi Israel llaqtaman kamachirqan wasanchay hucha ruwaqkunata wañuchinankupaq (Levítico 18:20, 22, 29). Jesuspas qatikuqninkunatan nirqan ama wasanchay huchata ruwanankupaq (Mateo 5:27, 28; Lucas 18:18-20).

¿IMARAYKUN CHAYMANTA YACHANAYKI?

Wasanchay huchata ruwaqkunaqa casarakuspa compromiso ruwasqankutan p’akinku. Chaymantapas wasanchay huchaqa ‘Dios contra huchallikuymi’ (Génesis 39:7-9). Wawakunapas sufrinkun mamankumanta otaq papankumanta t’aqakapuspa. Chaymi Biblia kayta nin: “Qhelli huchapi puriqkunatan wasanchaqkunatawanmi Diosqa huchachanqa”, nispa (Hebreos 13:4).

“Casarakuytaqa lliwlla ancha allinpaq hap’ichunku, casarasqakunapas amataq wasanchanakuchunkuchu” (Hebreos 13:4)

¿Wasanchay hucha kaqtinchu casarakusqanku tukukapun?

¿IMA NINMI BIBLIA?

Bibliaqa ninmi wasanchay hucha kallaqtin divorciakunamanta (Mateo 19:9). Chaytaqa mana huchayoq kaqmi decidinan. Ichaqa manan pipas ninmanchu divorciakunanta otaq mana divorciakunantapas (Gálatas 6:5).

Diosninchisqa casarakuytaqa ancha valorniyoqtan qhawarin, manataqmi huk ratollapaqpaschu (1 Corintios 7:39). Payqa cheqnikunmi imaraykullapas otaq aburrikusqankuraykulla divorciakuytaqa. Chay hinaqa, manan pipas munasqanraykullachu divorciakunan (Malaquías 2:16; Mateo 19:3-6).

“Pipas t’aqanasqa warmiwan casarakuqqa wasanchay huchatan ruwan” (Mateo 5:32)

¿Wasanchay hucha mana perdonanapaq hinachu?

¿IMA NINMI BIBLIA?

Wasanchay huchaqa manan mana perdonanapaq hinachu. Jehová Diosqa perdonarqanmi wasanchay huchaman urmaq warmi qharikunata huchankumanta arrepientekusqankurayku qhelli hucha saqepusqankurayku ima (Hechos 3:19; Gálatas 5:19-21). Chay runakunaqa Diospa amigonmi kapurqanku (1 Corintios 6:9-11).

Yachanapaq rey Davidmanta yachasun. Payqa casadon karqan ichaqa wasanchay huchamanmi urmaykurqan (2 Samuel 11:2-4). Biblia nin: “Davidpa chay ruwasqanmi ichaqa Señor Diospa ñawpaqenpi mana chaninchu karqan”, nispa (2 Samuel 11:27). Huchanta reparachisqanku qhepamanmi Davidqa arrepientekurqan Diostaq perdonarqan. Chhaynaña karqan chaypas Davidqa huchan hawan ñak’arirqan (2 Samuel 12:13,14). Qhepamanmi rey Salomón nirqan: “Wasancha huchallikuqmi ichaqa mana yuyayniyoq, chayta ruwaqqa pay kikintan waqllichikun [k’irikun]”, nispa (Proverbios 6:32).

KAYTAN RUWAWAQ:

Wasanchay huchapi urmarqanki chayqa Diosmanta parejaykimantapas perdonta mañakuy (Salmo 51:1-5). Cheqnikuy wasanchay huchata imaynan Diospas cheqnikun hinata (Salmo 97:10). Ama qhawaychu pornografiata amataq piensaychu qhelli hucha ruwaypi, ama hukta thintipayaychu amataq imatapas ruwaychu huk runa munapayanasunkipaq hinaqa (Mateo 5:27, 28; Santiago 1:14, 15).

Qosayki otaq esposayki hukwan pantarqan chayqa, Diosqa chay hinapi tarikusqaykitaqa entiendenmi (Malaquías 2:13, 14). Yanapayta mañakuy, Biblian nin: “Diosman llakipakuyniykikunata saqey, paymi qaqata sayachisunki”, nispa (Salmo 55:22). Sichus perdonanki chayqa iskayniykichismi kallpachakunaykichis hukmanta sumaqta kawsanaykichispaq (Efesios 4:32).

“Huchaykikunatan Señor Dios pampachasunki” nispan nirqan profeta Natán rey Davidta wasanchay hucha ruwasqanmanta arrepientekuqtin (2 Samuel 12:13)