Familianchis onqoqtin
“Hospitalmanta papay lloqsinpunanña kashaqtinmi doctorta nirqani yawarninta revisasqanku allinchus kashasqanta. Doctorqa ‘allinmi kashan’ nirqanmi, chaywanpas revisarqanmi. Admirakurqanmi iskay resultadokunapi mana allin kashasqanmanta. Disculpakurqanmi, hukmantataqmi especialistawan revisachirqan. Kunanqa papayqa allinmi kashan. Allinchá doctorwan rimarqani” (Maribel)
Manaraq doctorman rishaspa anotay imayna sientekusqanta ima hampikuna tomasqantapas
Doctorman riypas, hospitalpi tarikuypas llakichikunmi. Ichaqa Maribel hina amigonchistapas familianchistapas yanapayqa ancha allinpunin. ¿Imaynatan yanapawaq familiaykita otaq amigoykitapas?
Manaraq doctorman rishaspa. Onqosqata tapuspa huk listapi churay imankuna nanasqanta ima hampikuna tomasqantapas. Anotay imakunatan tapukuyta munan doctorta chaytapas. Astawan yachay onqoyninmanta mayqen familianpas chaywan onqorqanchus chaytapas. Ama niychu “doctorqa llapantachá yachan imayna tarikusqanmanta, tapunqachá chaykunamantapas” nispaqa.
Uyariy, tapuy, makillataq anotay
Doctorwan kashaspa. Asegurakuy doctorpa nisqanta onqosqa llapantachus entiendeshan chayta. Doctorta tapukuy ichaqa ama yachawaqpas hinaqa rimaychu. Onqosqataqa dejallay rimananta, ima munasqantapas tapukullachun. Makilla uyariy allintataq anotay. Tapuy huk tratamientokunapas kanchus chayta. Yaqapaschá onqosqata niwaq huk doctormanñataq rinanpaq.
Yuyariychis doctorpa nimusqanta, qhawariychis rantimusqaykichis hampikunata
Doctorman risqaykichis qhepaman. Iskayniykichis yuyariychis doctorwan imakuna rimamusqaykichista. Qhawariychis llapa hampikunatachus rantimurqankichis chayta. Doctorpa nisqanman hinapuni tomachun, mal sientekuspaqa usqhaylla doctorman willachun. Onqosqata kallpachay ama sinchita llakikunanpaq, doctorpa nisqanta ruwananpaq, doctorman kutinanpaqpas. Onqoyninmanta astawan yachananpaq yanapay.
Hospitalpi kaspa
Asegurakuy imaynata hampichikunanpaq documenton allin hunt’asqachus kashan chayta
Thaklla makilla kay. Onqosqakunaqa manchasqan hospitalpiqa sientekunku, manan ima ruwaytapas atinkuchu. Sichus qan thaklla sientekunki makillataq kankipas chayqa yanapankin paypas thaklla sientekunanpaq, imapas allin ruwakunanpaq ima. Imaynata hampichikunanpaq decidisqanta respetay. Sichus nishu onqosqa kaspa mana ima ruwaytapas atinchu chayqa, respetay imaynata hampichikunanpaq qelqasqanta, familianpa decidisqanta, rantinpi rimaqpa decidisqantapas.a
Onqosqapi imakuna reparasqaykita doctorman willay, ichaqa respetowan
Doctorman willay. Ama manchakuychu rimayta. Sichus allin p’achasqa rinki respetowantaq rimankipas chayqa aswan allintan onqosqata yanapanqaku. Wakin hospitalkunapiqa askha doctorkunamantan onqosqakunata atiendenku, willay huk doctorkunapas atiendesqankumanta. Onqosqataqa reqsinkitaq chayqa, willay onqoyninpipas comportakusqanpipas imakunapi cambiasqanta.
Yanapay, ichaqa ama distraeq hinalla
Respetoyoq kay agradecekuq ima. Hospitalpi llank’ayqa sayk’uchikunmi. Chaypi llank’aqkunata tratay imaynatan tratanasuykikuta munawaq hinata (Mateo 7:12). Respetay yachayninkutapas experienciankutapas, confiay allin doctor kasqankupi, agradecekuy onqosqata yanapasqankumanta. Valorasqa kasqankuqa yanapanmi aswan allinta llank’anankupaq.
Lliwpas onqonchismi. Ichaqa onqosqakunata yanapanapaq preparasqa kaspaqa aswan allintan yanapasun onqosqa familianchista amigonchistapas (Proverbios 17:17).
a Onqosqakunaq derechonpas imakunata ruwanankupas manan kaqllachu sapanka nacionpiqa. Asegurakuy imaynata hampichikunanpaq documenton allin hunt’asqachus kashan chayta, vencesqachus kashan chaytapas.