8 CAPÍTULO
Espiritukunaqa atiyniyoqmi kanku
¿YACHARANKICHU espiritukuna runakunamanta aswan atiyniyoq kasqankuta? ¿Pikunan paykuna?... Jujninmi Jehová Dios. Wawan Jesusri, ¿noqanchismanta aswan atiyniyoqchu?... Arí, paypas atiyniyoqmi.
Jesusqa Dioswanmi janaq pachapi tiyaran. Juj espíritu otaq angelmi karan. Ichaqa, ¿payllatachu Dios kamaran icha kanchu juj angelkunapas?... Arí, kanmi. Diosqa waranqanpin angelkunata kamaran. Chay angelkunapas noqanchismanta aswan atiyniyoqmi kanku (Hebreos 1:13, 14; Daniel 7:10).
¿Yuyashankichu Mariawan rimaq angelpa sutinta?... Sutinqa Gabrielmi. Paymi Mariaman willaran Jesuspa maman kananta. Jehová Diosqa milagrota ruwaspan Mariaq wijsanman Jesusta churaran. Chaymi Jesusqa kay allpapi naceran (Lucas 1:26, 27).
¿Imatan Josepas Mariapas Jesusman willankuman karan?
¿Cheqaqtachu Jesús janaq pachapi Jehová Dioswan tiyaran?... Arí, Jesuspunin chaytaqa willakuran. ¿Imaynapin pay chayta yacharan? Wawallaraq kashaqtinmi maman willanman karan ángel Gabrielpa nisqanta. Jinaspapas José kikinchá willaran papanqa Jehová Dios kasqanta.
Jehová Diospunin Jesús bautizakushaqtin janaq pachamanta nimuran: “Kaymi Churiyqa”, nispa (Mateo 3:17). Jesuspas manaraq wañupushaspan papanta niran: ‘Yayáy, ladoykiman apawaspa jatunchaway, manaraq kay pachapi runakuna kashaqtin jatunchasqa kasqay jatunchaywan’, nispa (Juan 17:5). Chaypin Jesusqa papanta valekusharan janaq pachaman apapunanpaq. ¿Atinmanchu janaq pachaman kutipuyta?... Arí, chaypaqqa papanmi yapamanta espíritu cuerpota qonan karan.
Ichaqa, ¿llapallankuchu allin angelkuna kanku?... Qallariypiqa llapallankun allin angelkuna karanku. Jehová Diosqa allin angelkuna kanankupaqmi kamaran. Ichaqa juj p’unchaymi juj ángel millayman tukupuran. ¿Imaynapin chay sucederan?
Chaypaq yuyarisun Adán Evaq tiemponpi sucedesqanta. Wakin runakunan ninku: “Paykunamanta willakuyqa cuentollan”, nispa. Ichaqa Jesuspunin paykunamantaqa willaran.
Jehová Diosmi Adanpaq Evapaq juj sumaq paraisota ruwapuran, chay paraisoq sutinmi karan Edén huerta. Chaypin paykunapas familiankupas wiñaypaq tiyananku karan. Ichaqa chhaynata tiyanankupaqqa Diospa kamachisqantan kasukunanku karan. ¿Imatan Dios kamachiran? Chayta kunan yuyarisun.
¿Imatan Adán Eva ruwananku karan wiñayta kausanankupaq?
Jehová Diosmi niran juj sach’aq frutanta ama mijunankupaq. Niranmi: ‘Chayta mijunkichis chayqa, wañunkichismi’, nispa (Génesis 2:17). ¿Imaraykun Dios chayta kamachiran?...
Kasukuq kayta yachanankupaqmi. Diosta kasukuyqa ancha importanten. Chaymi Adanpas Evapas kasukuq kasqankuta rikuchinanku karan. Chaypin rikuchinkuman Dios munakusqankuta reyta jina rikusqankutapas. Chayta ruwaspaqa paraisopin wiñaypaq tiyankuman karan. Chay sach’aq frutanta mijuspari, ¿imatan rikuchinkuman?...
Arí, mana agradecekuq kasqankutan. Qanri, ¿imatan ruwawaq karan chaypi kaspa?... Adanpas Evapas qallariypiqa Diostan kasukuranku. Ichaqa juj angelmi Evata engañaran, chaymi payqa Jehová Diosta mana kasukuranchu. ¿Pin karan chay ángel?...
¿Mach’aqwaychu Evawan rimasharan?
Evataqa juj mach’aqwaymi rimaykuran. Ichaqa mach’aqwaykunaqa manan rimankuchu ¿riki?... Bueno, manan mach’aqwaychu rimasharan, juj angelmi rimasharan. Payqa Dios jinan kayta munaran. Munaranmi Adanpas Evapas adorananta paypa munasqanta ruwanankutapas.
Chay angelmi Evata mana allinkunata piensachiran. Niranmi: ‘Diosqa manan cheqaq kaqtachu willasunkichis. Chay frutata mijuspaqa manan wañunkichischu. Aswanmi Dios jina yachayniyoq kapunkichis’, nispa. Chaypi kaspa, ¿creewaqchu karan chay angelpa nisqanta?...
Chay angelta creespan Evaqa chay frutata mijuran. Chay qhepamantaq qosanman qoran. Adanqa manan creeranchu chay angelpa nisqanta. Ichaqa esposanmanta mana t’aqakunanraykun paypas chay frutata mijuran, chhaynapin Diosta mana kasukuranchu (Génesis 3:1-6; 1 Timoteo 2:14).
¿Iman chay qhepaman pasaran?... Arí, juchayoq runamanmi tukupuranku, chaymi qhepamanqa machuyaspa wañupuranku. Wawankupas juchayoqmi naceran, chaymi paykunapas machuyaspa wañupuranku. Diosqa cheqaqllatan rimaran. Chaymi Diosta kasukunanchis (Romanos 5:12). ¿Yachankichu chay millay angelpa sutinta? Sutinqa Satanás nisqan, pay jina millayman tukupuq angelkunatataq nikun supaykuna nispa (Santiago 2:19; Apocalipsis 12:9).
¿Iman pasaran Adanwan Evawan juchallikusqankurayku?
¿Imaraykun chay ángel millayman tukupuran?... Dios jina kayta munaspan. Chaymi payqa munaran Adanpas, Evapas, wawankunapas adoranankuta. Kunanpas manan munanchu Dios kasukunanchista. Chaymi mana allinkuna piensananchista munan (Santiago 1:13-15).
Satanasqa khaynatan nin: “Manan pipas Diostaqa munakunchu. Runaqa manan tukuy sonqomantachu Diosta kasukun. Ima sasachakuypipas tarikuspaqa manan Diosta kasukunqakuchu”, nispa. ¿Cheqaqchu chay nisqan? ¿Cheqaqtachu qanpas noqapas Diosta mana munakunchis?
Jesusmi niran Satanás llulla kasqanta. Jesusqa tukuypin Diosta kasukuran. Sasachakuykunapiña tarikuspapas jujkunaña jark’aqtinpas kasukuranmi. Jesusqa wañupunankaman kasukuran. Chaypin rikuchiran papanta tukuy sonqowan munakusqanta, Satanás llulla kasqantapas. Chaymi Jehová Diosqa Jesusta wañusqanmanta kausarichiran manaña jayk’aqpas wañunanpaq.
Chhaynaqa, ¿pin enemigonchis?... Arí, Satanasmi. ¿Rikusunmanchu payta?... Manan ¿riki? Payqa runakunamanta aswan atiyniyoqmi. Ichaqa, ¿pin Satanasmanta aswan atiyniyoq?... ¡Arí, Jehová Diosmi! Paymi Satanasmanta cuidawasun.
Biblian nin Jehová Diosllata adorana kasqanta, chaypaq leesun Deuteronomio 30:19, 20; Josué 24:14, 15; Proverbios 27:11; Mateo 4:10.