45 YACHACHIKUY
¿Iman kay pachapi politicamanta t’aqasqa kay?
Jesusmi qatikuqninkunata nirqan: “Qankunan ichaqa mana kay pacha runakuna jinachu kankichis”, nispa (Juan 15:19). Chaywanmi nisharqan imaynas paykunaqa mana kay pachapi ima ruwaypipas ni politicapipas ni guerrapipas chhaqrukunankuchu karqan chayta. Chayta kasukuyqa yaqapaschá mayninqa sasa kanman, asipayasqa imapaschá kasunman. ¿Iman yanapawasunman chaykunamanta t’aqakunanchispaq, chhaynapi Jehová Diosllata tukuy sonqo servinanchispaqpas?
1. ¿Imaynatan Jesusta qatikuqkuna kay pacha gobiernokunata qhawarinanchis?
Diosta serviqkunaqa respetananchismi kay pacha gobiernokunataqa. Jesuspunin nirqan: “Roma reypa kaqtaqa Roma reyman qopuychis”, nispa (Marcos 12:17). Chaytan noqanchisqa ruwananchis, maypichus tiyasqanchispi autoridadkunaq leykuna churasqantan kasunanchis, impuestokunatapas pagananchismi. Bibliaq nisqanman jinaqa gobiernokunaqa Diospa churasqanmi kashanku (Romanos 13:1). Ichaqa, chay gobiernokuna ima leytapas orqonkuman Diospa kamachikusqan contrapi chayqa, Diostan ñaupaqtaqa kasukunanchis. Diospa gobiernollanmi kay pachapi sasachakuykunataqa allichanqa.
2. ¿Imaynatan rikuchisunman kay pachamanta t’aqasqa kasqanchista?
Jesús jinan noqanchispas mana politicapi chhaqrukunanchischu. Imaymana milagrokunata ruwasqanta rikuspan runakunaqa Jesusta rey kananpaq churayta munarqanku, Jesusmi ichaqa mana munarqanchu (Juan 6:15). ¿Imarayku? Pay kikinmi nirqan: “Gobiernoyqa manan kay pachamantachu”, nispa (Juan 18:36). Pay jinan mana chhaqrukunanchischu kay pacha ruwaykunamanqa. Manan guerramanpas rinanchischu (leey Miqueas 4:3). Respetanchisña nacionkunapi banderakunata chhayna imaymanakunata chaypas, manan chaykunamanqa k’umuykunanchischu, chayta ruwaspaqa chaykunatan yupaychashasunman (1 Juan 5:21). Manan ima partidotapas apoyananchischu, nitaqmi contrapipas kananchischu. Chaykunata ruwaspan rikuchisun Diospa gobiernollanta apoyasqanchista.
ASTAWAN YACHASUNCHIS
Kunanqa yachasunchis imakunas apawasunman kay pacha ruwaykunapi chhaqrukuyman chayta, imatas chhaynapi tarikuspa ruwasunman Diospa sonqonta kusichinapaq chaytapas.
3. Jesusta qatikuqkunaqa manan kay pachamanqa chhaqrukunanchischu
Jesús jina qatikuqninkuna jinan kananchis. Leeychis Romanos 13:1, 5-7; 1 Pedro 2:13, 14 textokunata, chaymanta VIDEOTA qhawaychis, jinaspa jamuq tapuykunaman jina parlariychis:
¿Imaraykun autoridadkunata respetananchis?
¿Imakunata ruwaspan autoridadkuna kasukusqanchista rikuchisunman?
Guerra kaqtinmi wakin nacionkunaqa ninku: “Manan mayqentapas apoyashaykuchu”, nispa. Ichaqa mana reparayllan apoyashanku. ¿Imatan Jesusta qatikuq runa ruwanan chhaynapi tarikuspa? Leeychis Juan 17:16 textota, chaymanta VIDEOTA qhawaychis, jinaspa jamuq tapuykunaman jina parlariychis:
¿Imaynatan rikuchisunman mana ima ruwaytapas apoyasqanchista ni contrapi kasqanchistapas?
Mayninpiqa Diospa kamachikuynin contrapi imatapas ruwananchistan autoridadkunaqa munanku. ¿Imatan ruwananchis chhaynapi tarikuspa? Leeychis Hechos 5:28, 29 textota, chaymanta VIDEOTA qhawaychis, jinaspa jamuq tapuykunaman jina parlariychis:
Kay pacha gobiernokunaq kamachikuynin Diospa kamachikuynin contrapi kanman chayri, ¿mayqentan kasukunanchis?
Piensarisqaykiman jina, ¿autoridadkunaq ima kamachisqantan mana kasukusunmanchu?
4. Ruwaypipas piensaypipas t’aqasqan kananchis kay pachamanta
Leeychis 1 Juan 5:21 textota, chaymanta VIDEOTA qhawaychis, jinaspa jamuq tapuykunaman jina parlaychis:
¿Imaraykun Ayenge mana munarqanchu gobierno apoyayta ni bandera napaykuytapas?
Piensasqaykiman jina, ¿allintachu chayta ruwasharqan?
¿Imakunapin rikuchinanchis kanqa kay pachapi politicamanta t’aqasqa kasqanchista? VIDEOTA qhawaychis, jinaspa jamuq tapuykunaman jina parlaychis:
Mayninpin aparikun juj nacionwan juj kaq nacionwan jatun bola jayt’aykuna, ¿imaynatan rikuchisunman ama mayqenmanpas sayapakusqanchista?
Gobiernokunaq ruwasqan allinninchispaqña kanman manaña chaypas, ¿imaynatan rikuchisunman mana pimanpas sayapakusqanchista?
Noticiapi rimamusqankupas, p’unchay-p’unchay tupasqanchis runakunapas, ¿apawasunmanchu política piensaykunaman? ¿Imatan ruwananchis cuidakunanchispaq?
¿Imakunapin Jesusta qatikuq runa rikuchinan mana kay pacha runakuna jinachu piensasqanta ruwasqantapas?
WAKIN RUNAKUNAN NINKU: “¿Imaraykutaq banderata mana napaykunkichu, himno nacionaltapas mana takinkichu?”, nispa.
¿Imanispan niwaq?
IMATAN YACHAMURQANCHIS
Jesuspa qatikuqninkunaqa tukuy atisqanchistan ruwananchis ama politicapi chhaqrukunanchispaq. Chayqa sut’itan reparakunan imayna piensasqanchispi, rimasqanchispi, ima ruwasqanchispipas.
Yuyarisun
¿Imaynatan gobiernokunata qhawarinanchis?
¿Imaraykun politicapi mana chhaqrukunanchischu?
¿Imakunan apawasunman politicapi kay pacha ruwaykunapi chhaqrukuyman?
ASTAWAN YACHANAYKIPAQ
¿Imakunatan mayninpi ruwananchis kanqa politicapi ama ima partidotapas apoyananchispaq? Kay videopin chayta juj hermano willakushan.
¿Imakunatan familiakuna ñaupaqmantaña ruwananku ima kaqtinpas ama Diospa gobiernonta qhepanchanankupaq? Chaymantan kay videopi willashan.
Diospa gobiernollanta apoyanapaqqa cuidakunanchismi wakin ruwaykunamanta (4:28)
Wakinqa llaqtanrayku maqanakuytan ancha jatun ruwayta jina qhawarinku. ¿Chhaynachu chay kanman? Kay videopin juj runaq willakusqanta yachanki.
Llank’ayta maskhaspa, ¿imaynatan rikuchisunman mana kay pacha runakuna jinachu kasqanchista? Chaypaq kay qelqata leey.
“Sapankan apanan q’epitaqa apanqa” (Qhawaq, 2006 watapi 15 marzo)