¿Imatan ruwana Bibliata entiendenapaq?

2. Manan kasunachu Biblia contra rimasqankuta

¿Hayk’aqllapas huk amigoyki mana allinkunata willarasunkichu mana reqsisqayki runamanta? Chhayna kaqtinqa manapaschá allintachu rikuranki chay runata. Chhaynallatataqmi askha runakunapas Bibliata mana allinpaq qhawarinku.

RUNAKUNAQ mana allin rimasqanta uyarispa Bibliata leeyqa manan allinchu. Chaytan apóstol Pablopas yacharan, chaymi wakin judío runakunamanta niran: “Tukuy sonqon Diosta serviyta munashanku, ichaqa manan imayna servinata hinachu”, nispa (Romanos 10:2).

Hebreo qelqakunapi (Antiguo Testamento nisqapi) Mesiasmanta willaq profeciakunaqa llapallanmi Jesuspi hunt’akuran. Chhaynaña kaqtinpas chay judío runakunaqa manan Jesusta Mesiasta hina chaskirankuchu. ¿Imarayku? Pantasqa yachachikuykunata uyarisqankurayku.

¿Imatan chaymanta yachasunman? Bibliaq yachachikuyninkunata allinta entiendenanchispaqqa, manan uyarinanchischu pantasqa yachachikuykunata, aswanmi astawan yachay yuyaywan leenanchis.

Carolina del Norte (Estados Unidos) llaqtayoq religionkunata estudiaq profesormi nin: “Bibliaqa runakunaq yuyayninman hinan qelqasqa kashan, imamantapas manan kaqllatachu yachachin, chaymi mana allintapunichu yanapawasunman”, nispa. Sichus chay runaq nisqanman hina Bibliata leesun chayqa, manapaschá allinpaqchu qhawarisun Bibliapi mana gustawasqanchis kamachikuykunata.

Bibliapin ichaqa kallpachawanchis Berea llaqtapi kaq wakin runakuna hina Bibliata allinta estudianapaq. Paykunaqa manan ‘Diospa siminta tukuy sonqowan chaskikullarankuchu’, aswanpas chaykunaqa hinapunichus kasqanta yachanankupaqmi “Diospa Simin Qelqakunapi sapa p’unchay t’aqwirqanku” (Hechos 17:11). Ñoqanchispas paykuna hinan Bibliata allinta t’aqwinanchis, manataq uyarinanchischu pantasqa yachachikuykunata; chhaynapin Bibliaq yachachisqanta allinta entiendesun. Chhaynaqa, kallpachakusun Bibliapi Diospa yachachikuyninta allinta reqsinanchispaq.