Cheqaq religionqa runakuna munakuytan yachachin

“MANA munakuqmi ichaqa Diosta mana reqsinchu. Diosqa munakuymi”, ninmi 1 Juan 4:8 texto. Chaypi nisqan hina, cheqaq religionqa paykunapura munanakuyta hukkuna munakuytawanmi yachachin.

Askha religionpi runakunan wakchakunata, kuraq runakunata, onqosqakunata yanapanku. Paykunaqa apóstol Juanpa yuyaychasqantan kasukunku, paymi niran: “Pipas kay pachapi qhapaq kashaspa iñiqmasinta pisichikushaqta rikuspa mana khuyapayanmanchu chayqa, ¿Diospa munakuyninqa sonqonpi kanmanchu? Manan. Wawallaykuna, ama simillawanchu rimayllawanchu munanakusun, aswanpas cheqaq munanakuyninchisqa ruwasqanchiswan sut’ita rikuchikuchun”, nispa (1 Juan 3:17, 18).

“Runamasiykitan qan kikiykita hina munakunki” nisqa kamachikuyta kasukuyqa manan sasachu thakpi kawsashaspaqa (Mateo 22:39). Ichaqa, ¿imatan ruwanku tiyasqanchis suyupi guerra kaqtin? ¿Kasukushallankuchu chay kamachikuyta?

Jesusqa sut’itan niran: “Chhaynapin ñoqaq yachachisqaykuna kasqaykichista llapa yachanqaku qankuna munanakuqtiykichis”, nispa (Juan 13:35). Kunanqa qatimuq tapuykunata allinta t’aqwiriy, chaykunan yanapasunki cheqaq religionta tarinaykipaq. Sapankata t’aqwirisqaykiman hina tapukuy: ¿kay religionpi runakuna simillankuwanchu munanakunku icha ruwasqankuwanchu sut’ita rikuchinku munanakusqankuta?

RIMASUN: Guerramanta.

¿IMANINMI BIBLIA? “Munakuychis awqaykichiskunata, saminchaychis ñakaqniykichiskunata, allinta ruwapuychis cheqnikuqniykichiskunapaq”, ninmi (Mateo 5:44).

Huk kutinmi soldadokuna Jesusta hap’ishaqtinku apóstol Pedro espadanta horqomuran defiendenanpaq. Jesusmi ichaqa niran: “Espadaykita waqaychay churananman, espadawan maqanakuqkunaqa espadawan wañuchisqallataqmi kanqaku”, nispa (Mateo 26:52).

Apóstol Juanpas niranmi: “Chaywanmi sut’i reqsisqa pikunachus Diospa wawankuna kasqan, pikunataqchus saqraq wawankuna kasqanpas. Pipas chaninkaqta mana ruwaqqa, iñiqmasintapas mana munakuqqa, manan Diospa wawanchu. Kaymi qallariymantapacha uyarisqaykichis willakuyqa: Hukkuna hukkunawanmi munanakunanchis. Ama Caín hinaqa kasunchu, paymi saqraq kasqanrayku wawqenta wañuchirqan”, nispa (1 Juan 3:10-12).

TAPUKUY: ¿Kallpachankuchu runakunata kay religionpi guerraman rinankupaq?

RIMASUN: Política nisqamanta.

¿IMANINMI BIBLIA? Huk kutinmi Jesusta kamachikuq kananpaq churayta munaranku milagrokuna ruwasqanta rikuspa, chaymi ‘Jesusqa payta, reyta churanankupaq hap’irqonankuta yachakuspa, wakmanta sapallan orqota kutirqan’ (Juan 6:15).

Huk wata qhepamanmi runakuna Jesusta tunparanku, kamachikuqpa contranpin runakunata sayarichin, nispa chaypin Jesús niran: “Qhapaqsuyuyqa manan kay pachamantachu, kay pachamanta kanman chayqa, serviqniykunachá maqanakunkuman, judío runakunaman mana entregasqa kanaypaq, aswanpas qhapaqsuyuyqa manan kay pachamantachu”, nispa (Juan 18:36).

Diosmanta mañakushaspan nillarantaq: “Ñoqaqa ñan paykunaman [otaq qatikuqniykunaman] simiykita willaniña, chaymi runakunaqa paykunata cheqnikun, mana kay pachamantachu kasqankurayku, ñoqapas manallataqmi kay pachamantachu kani”, nispa (Juan 17:14).

TAPUKUY: Wakin politicokunaq cheqnisqanña kankuman chaypas, ¿Jesús hinachu kay religionpi runakuna política nisqamanta karunchakunku icha chaqrukunkuchu?

RIMASUN: Huk llaqtayoq runakuna cheqnikuymanta.

¿IMANINMI BIBLIA? Huk llaqtayoq otaq qhari kaynin mana señalasqa runakunatapas cristianoman tukupuqtinku Jehová Dios allinpaq qhawarisqanta yachaspan apóstol Pedro niran: “Diosqa manan mayqen runatapas rikch’ayninta qhawaspachu akllan, aswanpas may suyupipas payta yupaychaspa chanin-kayta ruwaqtaqa chaskinmi”, nispa (Hechos 10:34, 35).

Ñawpa tiempopi cristianokunaman carta qelqasqanpin Santiago niran: “Wawqe-panallaykuna, musphana atiyniyoq Señorninchis Jesucristopi iñiyniyoq kaspaykichisqa, ama rikch’ayninta qhawaspachu runakunata allinpaq hap’iychis. Qankunaq huñukuyniykichisman huk runa qori sortijayoq, sumaq p’achayoq haykumunman, huk wakcha runapas haykumullanmantaq thanta p’achayoq chayqa, Sumaq p’achayoqkaq runata allinpaq qhawarispaykichistaq niwaqchis: Qanqa kay allinkaq tiyanapi tiyaykuy, nispa, wakcha runatataq ichaqa niwaqchis: Qanqa chayllapi sayaykuy, nispa, otaq: Kay pampapi chakiy qayllapi tiyaykuy, nispa. Chayta ruwaspaykichisqa, ¿manachu qankuna kikiykichis runakunata akllashankichis? ¿Manachu millay yuyayniyoq juezkunaña kankichis?”, nispa (Santiago 2:1-4).

TAPUKUY: ¿Yachachinkuchu kay religionpi Diospaq llapa runapas kaqlla kasqanta? ¿Yachachinkuchu wak llaqtayoqpas, wakchapas qhapaqpas mana cheqnikuna kasqanta?