¿Imaraykun santo espiritumanta huk-hukta yachachinku?
¿IMATAQ santo espirituri? Askha runakunan mana sut’inchayta atinkuchu. Papa Benedicto XVI nisqapas khaynatan nirqan Australia llaqtapi askha runakunaman rimaykushaspa: “[Santo espiritumantaqa] manan ancha allintaqa yachayta atisunmanchu”, nispa.
Santo espiritumantaqa huk-huktan yachachinku, chaymi yachachiqkunapas mana imayna sut’inchayta atinkuchu.
• Wakinmi ninku: “Santo espirituqa Jesuspa qatikuqninkunapi huk kawsaqmi”, nispa.
• Wakintaq ninku: “Trinidad nisqamanta huknin kaqmi”, nispa.
¿Imaraykun chhaynata ninku? 1700 watakuna ñawpaqtan wakin teólogo nisqa runakuna yachachiyta qallarisqaku: “Santo espirituqa Dios hinan, paymanmi rikch’akunman”, nispa. Ichaqa manan Bibliapas nitaq ñawpa tiempopi cristianokunapas chay hinata yachachirqankuchu. New Catholic Encyclopedia nisqa libron nin: “Diospa espiritunqa paypa kallpallanmi”, nispa. Chay librollataqmi nin: “Nuevo Testamento nisqapiqa hukllapas kanman hinan rimashan santo espiritumanta Diospa kallpanmantawan”, nispa.
Chaychá wakinqa ninku: “Manachus hina santo espirituqa Dios hina kawsaqchu kanman”, nispa. Askha teólogo runakunan ichaqa ninku: “Santo Espirituqa sapaqmi Yaya hina, Churi hina”, nispa. ¿Imaynatan yachasunman pichus cheqaq kaqta yachachishan chayta?
Bibliallan chaytaqa allinta willawasunman. Apóstol Pabloq nisqan hina, Bibliaqa “Diospa yuyaychasqan[mi], chayraykun allinpuni yachachinapaq, wanachinapaq” (2 Timoteo 3:16).
Ichaqa, ¿imaraykun ancha allinpuni santo espiritumanta cheqaq kaqta yachay? Jehová Diospa yanapayninta chaskinapaqmi. Mayninpiqa mana kallpayoq tarikuspan manaña imatapas ruwayta atinchischu. Chhaynapi tarikuspaqa Jesuspa nisqantan kasukunanchis, paymi nirqan: “Mañakuychis qosunkichismi [...]. Qankunapas [...] wawaykichisman allin kaqkunataqa qoyta yachankichismi, chaymantapas astawanraqmi hanaq pachapi kaq Yayaykichisqa mañakuqninkunaman Santo Espiritunta qonqa”, nispa (Lucas 11:9, 13).
Kunanqa astawanmi yacharisun imaninmi Biblia santo espiritumanta chayta, imapaqchus chaymanta yachay ancha allin kanman chaytapas.
[19 paginapi willakuy]
Bibliaqa willanmi imachus santo espíritu kasqanta