Jesuspa yachachiyninkuna
¿Imaynapin kusisqa kawsasunman?
¿Imatan necesitanchis kusisqa kawsanapaq?
▪ Orqo patapi ancha sumaq yachachisqanpin Jesús kusisqa kawsaymanta rimaspa qallarirqan. Nirqanmi: “Kusisamiyoqmi huch’uyyaykukuspa Diosta maskhaqkunaqa”, nispa (Mateo 5:3). ¿Imamantan chaypi rimashan?
Llapallanchismi kawsananchispaq necesitanchis mikhunata, wayrata, unutapas. Chaytan llapa animalkunapas necesitanku. Ichaqa huktawanmi runakuna necesitanchis kusisqa kanapaq, ¿imata? Imapaq kawsasqanchistan yachananchis. Chaytaqa Kamawaqninchis Diosllan yachachiwasunman. Chaymi Jesús nirqan: “Manan t’antallawanchu runaqa kawsanqa, aswanpas Diospa llapa siminwanmi”, nispa (Mateo 4:4). Arí, kusisqa kananchispaqqa imapaq kawsasqanchistan yachana, chaypaqmi ‘kusisqa’ Jehová Diosman asuykunanchis (Salmo 104:31). Hinaspapas kusisqa kawsananchispaqmi hamuq tiempopi sumaq kawsayta prometewanchis.
¿Imaynapin sumaq suyakuyta qowarqanchis?
▪ Jesusmi nillarqantaq: “Kusisamiyoqmi llamp’u sonqoyoqkunaqa, paykunaqa kay pacha hallp’atan herenciapaq chaskinqaku”, nispa (Mateo 5:5). Onqosqakunata hampispa, wañupuqkunata kawsarichispan Jesús rikuchirqan qhepaman sumaq kawsay chayamunanta. Chay sumaq suyakuytan yachachisqanpipas rikuchirqan, nirqanmi: “Diosqa anchatapunin runakunata munakurqan, chaymi sapan Churinta kachamurqan, pipas paypi iñiqqa ama wañunanpaq, aswanpas wiñay kawsayniyoq kananpaq”, nispa (Juan 3:16). Kay Hallp’api chay sumaq kawsayta chaskinapaqqa Diospin iñinanchis kasukuqtaqmi kanapas. ¿Yuyaykurqankichu hayk’aqllapas wayna-sipaslla llamp’u sonqo runakuna ukhupi kawsayta? Biblian chaymanta nin: “Suyakuypiqa kusisqalla kawsaychis”, nispa (Romanos 12:12). Ichaqa Jesuspa nisqan hina kay tiempopipas kusisqan kawsasunman, ¿imatan chaypaq ruwana?
¿Imakunatan Jesús yachachirqan kusisqa kawsanapaq?
▪ Jesusmi yachachirqan runakunawan imayna kawsanamanta, casado kawsaymanta, pisillawan kawsaymanta, huch’uyyaykukuq kaymanta, hukkunamantawan (Mateo 5:21-32; 6:1-5, 19-34). Chay yachachisqanman hina kawsaspaqa kusisqan kasun.
Yacharisun qoykukuq kayta yachachisqanmanta (Hechos 20:35). Huk kutinmi nirqan: “Hatun mikhuyta wakichispaykiqa wakchakunata, ñuk’ukunata, wist’ukunata, ñawsakunatawan waqyanki, chaymi kusisamiyoq kanki. Paykunaqa manan kutichipuyta atisunkimanchu”, nispa (Lucas 14:13, 14). Chaypin yachanchis kusisqa kanapaq hukkunaq allin kananta maskhananchis kasqanta.
¿Imapin aswan kusikuyta tarisunman?
▪ Ichaqa imamantapas astawanqa Diosta serviymi kusichiwanchis. Jesuspa nisqan hina, chay kusikuyqa manan wawankuq allinkuna ruwasqankumanta kusikuq tayta-mamaq kusikuyninwanpas tupanmanchu. Huk kutinmi huk warmi Jesusta kunkawan nirqan: “Kusisamiyoqmi wachakuqniyki, ñuñuqniyki warmiqa”, nispa. Jesusmi ichaqa nirqan: “Aswan kusisamiyoqqa Diospa siminta uyarispa hunt’aqkunan”, nispa (Lucas 11:27, 28).
Jesusqa Yayanpa munayninta ruwaspa wiñay kawsaymanta willaspan anchatapuni kusikurqan. Chay sumaq kawsaymanta huk warmiman willasqan qhepamanmi nirqan: “Mikhunayqa kachamuwaqniy Yayaq munayninta ruwaspa paypa ruwananta hunt’anaymi”, nispa (Juan 4:13, 14, 34). Ñoqanchispas Jesús hina Diospa munayninta ruwaspa runamasinchisman Bibliamanta yachachispan kusisqa kasun.
Astawan yachayta munaspaqa kay libropi maskhay 1 capitulota, chaytaqa Jehová Diospa testigonkunan ruwan.
[31 paginapi foto]
Kusisqa kawsanapaqqa imapaq kawsasqanchistan yachananchis