Diosta allinta reqsiy
Diosqa allinkuna ruwasqanchistan qhawarin
“SEÑOR Diosqa llapan runakunaq sonqontan t’aqwin, yachantaq pakasqa lliw yuyaykusqakunatapas.” (1 Crónicas 28:9.) Chay textota leeqtinchismi astawan Jehová Diosta agradecekunchis ñoqanchispi interesakusqanmanta. Pantaq runaña kanchis chaypas, payqa allinkuna ruwasqanchistan qhawarin. Chaytan rikuchin 1 Reyes 14:13 texto, chaypin riman Abías sutiyoq waynachamanta.
Abiaspa familianqa Jehová Diosmantan karunchakurqanku. Taytan rey Jeroboammi chay tiempopi ñawpaqta Dios contra hatarirqan.a Chaymi llapa familianta Dios wañuchinan karqan, nirqanmi: “Mirayniykitaqa llapantan tukusaq, q’opata hinaraqmi pichasaq”, nispa (1 Reyes 14:10). Abiastan ichaqa khuyapayarqan (payqa sinchitan onqosharqan) chaymi kamachirqan paylla p’ampasqa kananpaq.b ¿Imarayku? ‘Jeroboampa ayllunmanta [familianmanta] pay sapallan Señor Diospa qayllanpi allinpaq qhawarisqa kasqanrayku’ (1 Reyes 14:1, 12, 13). ¿Imatan chaypi yachanchis Abiasmanta?
Bibliaqa manan willanchu Abías Dios serviq kasqanta. Ichaqa willanmi ‘Señor Diospa qayllanpi allinpaq qhawarisqa kasqanta’, yaqapaschá chaytaqa rimashan cheqaq yupaychayta allinpaq qhawarisqanmanta. Bibliamanta rimaq qelqakuna nisqan hina, yaqapaschá Abiasqa Jerusalenpi yupaychana wasita rirqan, otaq runakuna Jerusalén llaqtata mana rinankupaq taytanpa churasqan guardiakunata horqochirqan.
Imaynaña kaqtinpas Jehová Diosqa Abiastan sumaqta qhawarirqan. ¿Imaraykun chayta ninchis? Allin ruwasqanta sonqomanta rikuchisqanrayku. Hinaspapas chaykunataqa ruwarqan ‘Jeroboampa ayllunpin’. Bibliata estudiaq runan nirqan: “Millay familia ukhupi wiñaspa allinkuna ruwaq runaqa ancha allinpaq qhawarisqan”, nispa. Chhayna familiapi tiyashaspa Abías ruwasqanmantan huk runa nillarqantaq: “Llapa runaq reparananpaqmi karqan [...], imaynan laqhayaq tutapi ch’askakuna astawan rikukun otaq mana raphiyoq sach’akuna ukhupi cedro sach’akuna astawan reparakun hinata”, nispa.
1 Reyes 14:13 textoqa Dios imayna kasqanmantan astawan yachachiwanchis, imata ñoqanchispi qhawarisqanmantawan. Chay texton willan Abías “allinpaq qhawarisqa” kasqanta. Yaqapaschá Jehová Diosqa sonqonta allinta t’aqwispa allin ruwasqanta tarirqan. Bibliamanta yachaq runan Abiasta familianwan tupachispa nirqan: “Payqa rumi-rumi ukhupi sumaq perla hinan karqan”, nispa. Diosqa manan qonqarqanchu millay familia ukhupi tiyashaspapas Abiaspa allin ruwasqanta, chaymi khuyapayaspa p’ampasqa kananpaq kamachirqan.
Jehová Diosqa allinkuna ruwasqanchistan qhawarin manan pantasqanchistachu chayta yachayqa sonqonchistan kusirichin (Salmo 130:3). Arí, sonqonchispi Dios allin kaqta t’aqwisqanta yachaymi yanapawanchis payman astawan asuykunanchispaq.
[Uranpi willakuykuna]
a Jeroboammi kamachisqan chunka ayllukunapi ídolo yupaychayta rikhurichirqan, kamachisqan runakuna manaña Jerusalenpi Dios yupaychana wasita rinankupaq.
b Ñawpa tiempopiqa Diospa mana allin qhawarisqan runakunatan mana p’ampaqkuchu (Jeremías 25:32, 33).