Allinninchispaq estudiasun ama aburrikuspalla
¿Munasunmanchu Bibliata estudiaspa kusikuy tariyta allinninchispaq kanantapas? Chayta ruwanapaqmi kinsa yanapaykuna kan.
1 MAÑAKUY. Ñawpaqtaqa Diosmantan mañakunanchis (Sal. 42:8). Bibliata estudiaspapas Diostan hatunchanchis. Chayraykun Diosmanta mañakunanchis espiritunta qowananchispaq, yachachikuyninkunata allin yuyaywan chaskikunapaqpas (Luc. 11:13). Barbaraqa askha watañan misionera, paymi nin: “Manaraq Bibliata leeshaspa estudiashaspan Diosmanta mañakuni. Chhaynapin Diospa yanapayninta reparani, ruwasqayta allinpaq qhawarisqantapas”, nispa. Mañakuyqa yuyayninchistan preparan Diospa yachachikuyninkuna sonqonchisman haykunanpaq.
2 YUYAYMANAY. Wakinqa imaymana ruwanayoq kaspan hawan-ukhunta Bibliata leenku, chhaynapin allinninkupaq yachachikuykunata mana tarinkuchu. Carlosmi 50 wata masña Diosta servishan, paymi allinpaq qhawarin yuyaymananapaq tiempo t’aqayta, ninmi: “Kunanqa Bibliataqa manan tukuruy yuyaychu estudiani, aswanpas iskay paginallatan sapa p’unchay. Chhaynapi yachasqay sonqoyman haykun, maskhanitaq allinniypaq yachachikuykunata”, nispa (Sal. 77:12). Yachasqanchispi yuyaymanaspaqa aswan allintan entiendesun Diospa munayninta (Col. 1:9-11).
3 YACHASQAYKIMAN HINA KAWSAY. Imachus allinninchispaq kaqtaqa aswan allintan utilizanchis, chhaynallataqmi suceden estudiasqanchiswanpas. Chhaynatan yuyaykun Gabriel cristiano waynapas, ninmi: “Bibliata estudiaspayqa allin preparasqan kashani sasachakuykunata atipanaypaq, hukkunata yanapanaypaqpas. Ichaqa kallpachakunaymi sapa p’unchay yachasqayman hina kawsanaypaq”, nispa (Deu. 11:18; Jos. 1:8). Arí, Diosmanta yachananchispaqqa askha qelqakunan kan, chaykunatan allinta t’aqwinanchis chayman hinataq kawsananchis (Pro. 2:1-5).
YUYARINAPAQ. ¡Ancha kusikunapaqmi Diospa yachachikuyninkunata t’aqwiyqa, paymantan yachayqa hamun! (Rom. 11:33.) ¿Iman yanapawasun Biblia allinta estudianapaq? Ñawpaqtaqa, Diosmantan mañakunanchis santo espiritunta qowananchispaq, yachachikuyninkunata allin yuyaywan chaskikunapaqpas; hinaspapas estudiaspan samarinanchis yuyaymananapaq, chaymantataq kallpachakunanchis yachasqanchisman hina kawsanapaq. Chaykunaq yanapayninwanmi allinta estudiasun mana aburrikuspalla.