Diospa Gobiernonmanta “allin willakuykunan” willasqa kanqa
“[Diospa Gobiernonmanta] allin willakuykunan kay pachantinpi willasqa kanqa llapa suyukunaq yachananpaq, hinaqtinmi p’uchukayqa chayamunqa.” (MATEO 24:14.)
¿Imamantan Jesús rimasharqan? Jesusqa ‘llapa llaqtakunata huch’uy llaqtakunatapas, Diospa qhapaqsuyunmanta allin willakuykunata willaspan’ purirqan (Lucas 8:1). Hinaspapas pay kikinmi nirqan: “Huk llaqtakunamanpas Diospa qhapaqsuyunmanta allin willakuykunataqa willamunaymi, chaypaqmi Diosqa kachamuwarqan”, nispa (Lucas 4:43). Qallariypiqa Jesusmi qatikuqninkunata kamachirqan llaqtakunaman predicaq rinankupaq. Qhepamanmi ichaqa nirqan: “Testigoykuna kankichis [...] kay pachaq k’uchunkunakamaraq”, nispa (Hechos 1:8; Lucas 10:1).
Ñawpa Cristianokunaq ruwasqanku. Jesuspa qatikuqninkunaqa usqhayllan predicaypi llank’arqanku. Chaymi Hechos 5:42 textopi nin: ‘Dios yupaychana wasipipas iñiqkunaq wasinkunapipas sapa p’unchaymi yachachishallaqkupuni Jesusqa Cristo kasqanmanta allin willakuykunata willashallaqkupuni’, nispa. Llapallankun chay llank’aytaqa ruwarqanku. Historiador August Neandermi nin: “Ñawpa tiempomanta cristianokunaq contranpi kaq Celso sutiyoq runapas asipayaqmi chay tiempopi predicaqkunata, millma cardadkuna, zapaterokuna, kutapakuqkuna, leeyta qelqaytapas mana yachaqkunaq kasqankurayku”, nispa. Les premiers siècles de L’Église (Iglesiaq qallariynin) nisqa librota qelqamuq Jean Bernardinin cristianokunamanta willarqan: “Llapa runamanmi predicaqku, ñankunapi, llaqtakunapi, plazakunapi, wasin-wasinta, allinpi mana allinpipas”, nispa. Arí, paypa nisqan hinapas ‘teqsimuyuntin llaqtakunamanmi’ chayananku karqan.
¿Pikunan chay hinata kunan ruwashanku? Sacerdote David Watson nirqan: “Iglesiaq mana yachachisqanraykun runakunaqa iñiyninkupi pisipashanku”, nispa. ¿Por qué se van los católicos? nisqa libronpi José Luis Pérez Guadalupe Jehová Diospa testigonkunamanta nirqan: “Sapa kutinmi wasin-wasinta predicaq rinku”, nispa. Chay hinataqa manan ruwankuchu adventistakuna, evangelistakuna, huk t’aqa religionkunapas.
Jonathan Turley sutiyoq runa Cato Institute nisqapi willan: “Pipas Jehová Diospa testigonkunamanta rimariqtinqa kaqpachan runakunaqa yuyaykunku wasin-wasinta predicaspa puriqkuna kasqankupi. Paykunaqa manan imachus creesqankuta willanallankupaqchu wasin-wasinta rinku, aswanpas iñiyninkuraykun”, nispa (Cato Supreme Court Review, 2001-2002).
[9 paginapi recuadro]
¿Ñachu cheqaq cristianokunata reqsinkiña?
Wakin qelqakunapiqa ñan yacharqanchisña imaynas Bibliaq nisqanman hina cheqaq cristianokuna kanku chayta. ¿Ñachu paykunata reqsinkiña? Kay tiempopiqa askha religionkunan kan “cristianon kayku” niqkuna. Ichaqa manan Jesuspa nisqanta qonqananchischu, paymi nirqan: “Manan llapa ‘¡Señor! ¡Señor!’ niwaqniychu hanaq pacha qhapaqsuyumanqa haykunqa, aswanpas hanaq pachapi kaq Yayaypa munayninta ruwaqllan haykunqa”, nispa (Mateo 7:21). Chaypi nisqan hina Diospa Gobiernonpi bendicionkunata chaskinapaqqa,Yayaq munayninta ruwaq cheqaq cristianokunatan reqsinanchis. ¿Munawaqchu Diospa Gobiernonmanta yachayta? ¿Imakunatan chay Gobierno apamunqa? (Lucas 4:43.) Chhaynaqa, kay leesqayki revistata apamuqniyki Testigokunawan parlariy.