¿Imaraykun wakinkuna ninku: “Diosqa mana khuyapayakuqmi”, nispa?

YAQAPASCHÁ chay tapuyqa abmirachisunki ichaqa askha runakunan chayta tapukunku, hinaspa ninku: “Diosqa mana khuyapayakuqmi”, nispa. ¿Imarayku chhaynata yuyaykunku?

Kay pachapi imaymana pasasqanta rikuqkunan tapukunku: “¿Imaraykun Dios hinallata qhawan? ¿Manachu Diosman interesan khaynapi tarikusqanchis? Icha, ¿mana khuyapayakuqchu?”, nispa.

Noepa tiemponpi Millp’uq Para pasasqanmanta hukkunamantapas Bibliapi leespan ninku: “Runakunata munakuq Dios, ¿imaraykun askhanpi wañuchirqan? ¿Mana khuyapayakuq kasqanraykuchu?”, nispa.

¿Hayk’aqllapas chaykunata tapukurqankichu? ¿Sasapaqchu qhawarinki chay tapukuykunaman kutichiyta? Imaynaña kaqtinpas, allinmi kanman chaykunamanta yachay.

¿IMARAYKUN CHEQNIKUNCHIS MANA CHANIN KAQTA?

Runakunaqa reparanchismi allin kaqta mana allin kaqta, ¿imarayku? Dios payman ‘rikch’akuqta’ kamawasqanchisraykun (Génesis 1:27). Chaymi pay hina reparanchis allin kaqta mana allin kaqta yachanchistaq imayna Dios kasqanta imayna kawsanapaq kamachikuyninkunatapas. Chayraykun cheqnikunchis mana chanin kaqta chhaynaqa, ¿manachu Dios aswantaraq cheqnikunman?

Chaykunaqa Bibliapi nisqanwanmi tupan, ninmi: “Ruwayniykunaqa qankunaqmantaqa aswan hatunraq, yuyayniykunapas qankunaqmantaqa aswan hatunraqmi”, nispa (Isaías 55:9). Sichus Diosta mana khuyapayakuq hinata qhawarisunman chayqa, ñoqanchismi aswan hatun yuyayniyoq hina qhawarichikusunman. Chaymi aswan allin kanman chaykunamanta allinta t’aqwiriy. Diosta mana khuyapayakuq hinata qhawarishanamantaqa, kaytan tapukunanchis: “¿Imaraykun wakin ruwasqankuna mana khuyapayakuqta hina qhawarichin?”, nispa. Chayta allinta entiendenapaq ñawpaqta qhawarisunchis ima ninantaq mana khuyapayakuq kay chayta.

Pitapas mana khuyapayakuqta hina qhawarinchis chayqa imachus ruwasqanta otaq rimasqanta juzgashanchis. Mana khuyapayakuq runaqa kusikunmi ñak’ariqkunata rikuspa, manataq sientenpaschu. Yachananchispaq qhawarisun, huk tayta wawanpa sonqonta k’irinanpaq castigan chayqa mana khuyapayakuq kasqantan rikuchin. Ichaqa sichus wawanta munakuspa castigan chayqa allinninpaqmi kanqa. Mayninpin ratolla ima ruwasqatapas otaq rimasqatapas mana allinpaq qhawarisunman; hinaspapas yaqapaschá ima ruwasqaykita otaq rimasqaykita mana allinpaq qhawarirqanku.

Bibliapin tarinchis pacha chhaphchiykuna hukkunamantapas, Diospa castigonkunamantapas willakuykunata, ¿chay willakuykuna rikuchinchu Dios mana khuyapayakuqta hina? Chaytan kunan astawan yachasunchis imaraykus wakin runakuna chhaynata yuyaykunku chayta.