‘Ñak’ariykunapiña’ kashaspapas qaqatan sayarqanku

BIBLIA Estudiaqkuna guerrapi mana chakrukusqankutan llapa runakuna repararqanku 1914 watapi primera guerra mundial qallariqtin (Is. 2:2-4; Juan 18:36; Efes. 6:12). ¿Imakunapin Gran Bretaña nacionpi Dios serviqkuna rikukurqanku chay watakunapi?

Chay nacionpin 1916 watapi huk ley lloqsimurqan 18-40 watayoqkama solterokuna guerraman rinankupaq. Ichaqa “religionninkurayku” mana riyta munaqkunapaqpas karqanmi ley. Huk tribunalpin decidekunan karqan pikunalla guerraman mana rinankuta.

Pisi tiempollamantan 40 iñiqmasikunata aparqanku cárcel militar nisqaman, pusaqtataq Francia nacionpi guerraman. Chay ruwasqankuqa manan chaninchu karqan, chaymi iñiqmasikuna Herbert Asquith ministroman huk cartata apachirqanku 5.500 iñiqmasikunaq firmantawan.

Chay qhepamanmi huk sentencia lloqsimurqan Francia nacionman apasqa pusaq iñiqmasikuna mana maqanakusqankumanta wañuchisqa kanankupaq. Ichaqa filapi churaruspa wañuchinankuña kashaqtinmi huk sentencia lloqsiramurqan. Chay sentenciaman hinan iñiqmasikunata Inglaterra nacionman aparqanku chunka wata carcelpi kanankupaq.

Chay qhepamanmi huk ley lloqsimurqan llapa casado qharikunapas guerraman rinankupaq. Chaymi Inglaterra nacionpi Manchester llaqtapi Biblia Estudiaq Henry Hudson iñiqmasita huchacharqanku guerraman mana riy munasqanmanta. 1916 watapi 3 agosto killapin multarqanku, militarkunaq makinpitaq saqerqanku. Chaymi sucederqan Escocia nacionpi Edinburgh llaqtapi, 25 watayoq colportor (precursor) James Frederick Scott iñiqmasiwan, ichaqa kacharipurqankun. Chaymi chay llaqtapi gobierno yapamanta juiciota ruwayta munarqan, ichaqa Londres llaqtapi chay hina juicio kasqanta qhawarispan saqepurqan. Chay llaqtapin Herbert Kipps iñiqmasita huchacharqanku, multarqanku, militarkunaq makinpitaq saqerqanku.

1916 wata setiembre killakaman 264 iñiqmasikuna gobiernota mañakusqaku guerraman rinankumanta exonerasqa kanankupaq, ichaqa phisqallan exonerasqa karqanku. 154 iñiqmasikunatan sasa llank’anakunapi llank’achirqanku, 23 iñiqmasikunata cuartelpi llank’anakunaman aparqanku, 82 iñiqmasikunatataq militarkunaman entregarqanku, wakintaq sinchi castigasqa karqanku. Chaykunapi mana allin tratasqa kasqankutan askha runakuna mana allinpaq qhawarirqanku, chaymi gobiernoqa huk campamentokunaman paykunata apachirqan huk llank’anakunata ruwanankupaq.

Edgar Clay, Pryce Hughes (payqa Gran Bretaña sucursalpin superintendente kapurqan) iñiqmasikunan Gales llaqtapi huk represa nisqapi llank’arqanku. Herbert Senior iñiqmasipas qanchis iñiqmasikunawan kuskan Francia nacionmanta kutimpurqan. Paytan Wakefield (Yorkshire, Inglaterra) llaqta carcelpi wisq’arqanku. Huk iñiqmasikunataqmi Dartmoor llaqtapi carcelman apasqa karqanku sasa llank’anakunata ruwanankupaq. Chay carcelpiqa guerraman mana riy munaqkunan askhapuni karqan.

Frank Platt iñiqmasipas cuartelpi llank’anakunatan ruwarqan, paytan unay tiempo sinchita ñak’arichirqanku guerraman mana riy munasqanmanta. Atkinson Padgett iñiqmasin guerraman rinan kashaqtin Bibliamanta yacharqan, paytapas autoridadkunan sinchita ñak’arichirqanku guerraman mana riy munasqanmanta.

Chay tiempopi cristianokunaqa manaraqmi allintachu entienderqanku imakunapi mana chhaqrukunankuta. Chaywanpas kallpachakurqankun Diospa sonqonta kusichinankupaq. Kaypi willakusqan iñiqmasikunaqa ‘ñak’ariykunapi’ kashaspan iñiyninkupi qaqata sayarqanku. ¡Paykunaqa allin ejemplon karqanku! (Apo. 3:10.) (Yuyarinanchispaq: Gran Bretañapi.)