KAWSAYNINMANTA WILLAKUY
Wakchaña kaspapas qhapaqmi kayku
Abueloywan papaywanqa wakcha wasipi tiyarqanku Cotiujeni llaqtapi, chayqa tarikurqan Moldavia nacionpi. Chay llaqtapin nacerqani 1939 watapi diciembre killapi. Manaraq naceshaqtiymi abueloywan papaywan Jehová Diospa testigonkuna kapurqanku. Abueloyqa chay llaqtapi sacerdotemantan aswan allinta Bibliamanta yacharqan, chayta reparaspan mamitaypas Testigo kapurqan.
Kinsa watayoq kashaqtiymi papayta, tioyta, abueloytawan presota aparqanku sasa llank’ana campoman politicaman mana chhaqrukusqankurayku. 1947 watapitaq Segunda Guerra Mundial qhepatan, papallayña kutimpurqan wasa nanaywan, chhaynaña kutimpurqan chaypas iñiyninpin qaqata sayarqan.
HUKMANTAN SASACHAKUYPI TARIKUYKU
9 wataypi kashaqtiyqa askha Testigokunata familiaytawan Moldavia nacionmanta Siberia llaqtaman apawarqanku. 1949 watapitaq 6 julio killapi trenpi apawarqanku ichaqa uywa apanapi, chhaynapi mana sayaykuspa 12 p’unchayta viajayta qallarirqayku 6.400 kilometrota Lebyazhe llaqtaman, chayman chayaqtiykutaq autoridadkunan suyashawarqanku. Hinaspan huch’uy grupokunapi t’aqawaspanku munasqanku ladoman apawarqanku. Grupoytaqa huk huch’uy escuelamanmi apawarqanku, sinchi sayk’usqa llakisqan sientekurqayku. Hinaspan huknin kurak iñiqmasiyku Segunda Guerra Mundialpi Testigkunaq ruwasqanku takita takiyta qallarirqan, hinan paywan kuska takillarqaykutaq:
“¡Askha iñiqmasinchiskunan wak llaqtaman apasqa karqanku!
Wakinta wichayman wakinta urayman.
Diospa munayninta ruwasqankuraykun imaymanapi tarikurqanku, wañuy patapi tarikuspapas aguantarqanku”.
Tiempo pasasqanman hina domingonpi huñunakuyta qallarirqayku ichaqa 13 kilometrota hinan purinayku karqan. Tutayllamantan sinchi chiripi lloqsiq kayku, rit’ipas cinturaykukaman chayarqan. Chayaspaykutaq huk huch’uy cuartopi 50 más iñiqmasikuna huñukurqayku, hinaspa iskay otaq kinsa takikunata takispayku sonqomanta mañakurqayku, huk hora mastan Bibliata estudiaq kayku. Chay ruwasqaykun allinta yanapawarqanku.
HUK SASACHAKUYKUNAPIN TARIKULLAYKUTAQ
1974 watapi tiyasqa llaqtapi trenkunaq chayananpi kashani
1960 watapin Testigokuna manaña hark’asqachu kapurqanku. Chaymi wakchaña karqani chaypas Moldavia nacionman rirqani. Chaypin esposay Ninata reqsirqani. Papanpas abuelonpas Testigollataq karqanku. Pisi tiempomantataq casarakapurqayku hinaspa Siberia llaqtaman ripurqayku, chay llaqtapin 1964 watapi Dina ususiyku nacerqan, 1966 watapitaq Viktor nacerqan. Iskay wata qhepamantaq Ucrania nacionman astakurqayku.
Tiyasqayku llaqtapipas Unión Soviética nacionpi hinan predicayniyku hark’asqa karqan. Ichaqa manan sinchi hark’asqachu nitaq qatiykachasqapaschu karqayku, chaymi wakin iñiqmasikunaqa chiriyapuyta qallarirqanku. Paykunaqa sinchitataq Siberia llaqtapi ñak’arirqanku chayqa, manan huchapaqchu qhawarirqanku sinchita llank’anaman qokuyta.
ANCHA KUSIKUNAPAQ RUWAYKUNA
1991 watapin 27 marzo killapi Unión Soviética nacionpi autoridadkuna manaña hark’arqankuñachu huñunakunaykuta predicanaykutapas. Chaymi decidirqanku qanchis hatun huñunakuykuna aparikunanpaq. Chay huñunakuykunaqa iskay p’unchaymi kanan karqan. Ñoqaykuqa Odesa llaqtamanmi rinayku karqan. Chaypiqa 24 agosto killapin qallarinan karqan. Ñoqaqa huk killa ñawpaqtan rirqani hatunkaray estadiota sumaqta allichanaykupaq.
Chay p’unchaykunaqa ch’isiyaqmi llank’arqayku, tutayaqtintaq gradakunallapiña puñurqayku. Warmikunaqa estadioq parquenkunatan allicharqanku. Askha q’opatan wikch’urqayku. Chaypiqa 15.000 runakunan huñunakunanku karqan, chaypaqmi alojakunapaq encargakuqkuna wasikunata maskharqanku. Chayllamanmi llakikunapaq noticiata willawarqanku.
Phisqa p’unchayllaña huñunakunaykupaq kashaqtinmi Unión Soviética nacionmanta presidenteta presota aparqanku Yalta llaqtaq qayllanpi vacacionpi kashaqtin. Chay hawan manaña permisota qoyta munawarqanchu. Chaymi huk llaqtakunamanta hamuqkunaqa waqyamuyta qallarirqanku chay huñunakuyta apariq iñiqmasikunaman, hinaspa tapukurqan pasaje rantisqankuwan imata ruwanankupaq. Chaymi tukuy sonqowan Diosmanta mañakuspa huñunakuyta apariq iñiqmasikunaqa nirqanku: “Hamullaychis”, nispa.
Chay huñunakuy aparikunanpaqqa imaymanatan ruwakushallarqan Diosmantapas mañakushallarqankun. Unión Soviética nacionmanta llapallan chayamuq iñiqmasikunatan alojamientonkuman aparqanku. Chay huñunakuymanta encargakuqkunan sapa tutamanta autoridadkunaman riqku, hinaspan ch’isintaña kutimpurqanku mana allin noticiata apamuspa.
MAÑAKUSQAYKUQA UYARISQAN KARQAN
22 agosto killapin iskay p’unchayllaña huñunakunaykupaq kashaqtinmi huñunakuymanta encargakuqkuna allin noticiawan kutimurqanku. ¡Autoridadkunan permisota qomusqaku! Sabado p’unchaypi huñunakuyta qallarinapaq takiyta qallariqtiykun kusikuymanta sonqoyku llanllarirqan. Huñunakuy tukuqtinpas tutayanankaman qhepakurqayku ñawpaq tiempomanta amigokunawan rimaspayku. Chay iñiqmasikunaqa unayñan sinchi sasa pruebakunapi Diosta kasukurqanku.
Odesa llaqtapi hatun huñunakuy 1991 watapi
Chay huñunakuymantaqa 22 watakunañan pasarqon. Kunanqa askhan kapuyku. Huñunakunaykupaq wasikunatapas askhatañan hatarichikun. 1991 watapiqa 25.000 predicaqkunan karqayku, kunantaq 150.000 masña kashayku.
QHAPAQLLAN KASHAYKU DIOS SERVIYNIYKUPI
Familiayqa kaq llaqtallapin tiyashan kaq wasillapitaq. Chay llaqtapiqa 40.000 runakunan tiyanku. 1968 watapi llaqtaykuman kutimpuqtiykuqa pisillan Testigokunaqa karqanku, kunanmi ichaqa 6 iñiq t’aqakunaña kashan.
Ñoqaykupas askhan kapuyku, llapallaykutaqmi Diosta servishayku: wawaykuna, nietoykuna, nietoykuq wawankunapas.