QALLARIYPI KAQ | ¿DIOS QANPI PIENSANMANCHU?
Diosqa cuidashasunkin
“Runaq purisqanqa Diospa qhawasqallanmi, llapan purisqanpas reqsisqallanmi” (JOB 34:21)
Huch’uy wawakunan astawanqa cuidanata necesitanku
¿IMARAYKUN ISKAYANKU? Chayllaraqmi yachakun tiyasqanchis galaxia nisqapi 100 waranqa millón planetakuna kasqanta. Chayta yachaspan runakuna ninku: “¿Imataq runakunari kanchis Dios qhawariwananchispaq?”, nispa.
¿IMANINMI BIBLIA? Jehováa Diosqa manan Bibliallatachu qowarqanchis, aswanpas pay kikinmi sapankanchista cuidawashanchis. Paypunin nin: “Ñoqan maynin purinayki ñanta yachachisqayki”, nispa (Salmo 32:8).
Yuyarisun Egipto llaqtayoq Agar warmita. Payqa manan Sarai patronanta respetarqanchu, chaymi Saraiqa payta pisicharqan. Hinan Agarqa ch’inneqman ayqekurqan. ¿Imaynatan Dios Agarta qhawarirqan? Bibliaq willasqan hina, Diospa angelninmi ‘Agarta tarispa’ kallpacharqan: ‘Waqasqaykitan Señor Diosqa uyarisunki’, nispa. Chaymi Agarqa nirqan: “Qanmi ‘Rikuqniy Dios kanki’”, nispa (Génesis 16:4-13).
Diosqa qantapas qhawarishasunkin. Chayta entiendenapaq kaywan rikch’anachisun. Huk mamaqa llapa wawankunataña qhawan chaypas aswan huch’uy kaqkunatan astawanqa cuidan. Jehová Diospas peligropi kaq, pisi kallpa kaqkunatan astawanqa qhawarin. Pay kikinmi nin: “Ñoqaqa hanaqpin, ch’uya cheqaspin tiyani, chaypas huchanta reqsikuqwanmi k’umuykukuq sonqoyoqwanmi kashani, k’umuykukuqkunata kallpachanaypaq, huchankuta reqsikuqkunaq sonqontapas kawsarichinaypaq”, nispa (Isaías 57:15).
Chaywanpas yaqapaschá tapukushanki: “¿Imaynatan Dios qhawariwan? ¿Hawallaytachu qhawashan icha sonqoypi kasqantachu? ¿Entiendewanchu?”, nispa.
a Biblian willan Diospa sutin Jehová kasqanta.