BIBLIAMANTA TAPUKUYKUNA
¿Yanapawasunmanchu angelkuna?
Imaynan Danielta yanaparqanku chay hinatan kunanpas angelkuna runakunata yanapashanku Diosmanta hamuq allin willakuykunata uyarinankupaq
Manaraq runakunata kamashaspan Diosqa angelkunata waranqanpi kamarqan (Job 38:4, 7). Paykunaqa Diostan servinku. Ñawpa tiempopin Diosqa wakin angelkunata kay pachaman kachamurqan Dios kasukuq runakunata yanapanankupaq hark’aykunankupaq ima (Salmo 91:10, 11). Kay tiempopipas angelkunan runakunata yanapashanku Diosmanta hamuq allin willakuykunata yachanankupaq (leey Apocalipsis 14:6, 7).
Chhaynaqa, ¿angelkunamantachu mañakunanchis? Manan, mañakuyqa Diosta yupaychay hinan, chaymi angelkunamanta mañakuspaqa paykunata yupaychashasunman (Apocalipsis 19:10). Hinaspapas angelkunaqa Diostan servinku, payllatan kasukunkupas, chaymi mana ñoqanchistaqa uyariwasunmanchu. Chayraykun Diosllamanta mañakunanchis Jesuspa sutinpi (leey Salmo 103:20, 21; Mateo 26:53).
¿Kanchu millay angelkuna?
Runakuna hinan angelkunapas akllakuyta atinku allin kaqta mana allin kaqtapas. Hinan askha angelkuna Diosta mana kasukurqankuchu (2 Pedro 2:4). Satanasmi ñawpaqtaqa Dios contra hatarirqan chay qhepamantaq huk angelkuna, chay angelkunatan sutichakun supaykuna nispa. Yaqa pachak wata ñawpaqllatan paykunaqa kay pachaman wikch’uykamusqa karqanku (leey Apocalipsis 12:7-9).
1914 watamantapachan millay kawsay astawan yapakurqan. Chaymi rikuchin pisi tiempollamanta Satanasta supayninkunatapas Dios chinkachipunanta, kay hallp’ata paraisoman tukuchinantapas (leey Apocalipsis 12:12; 21:3, 4).