QALLARIYPI KAQ | ¿KANCHU SAQRA?
¿Manchakunachu Saqrata?
Saqraqa monóxido de carbono hinan, manan rikukunchu sinchi millaytaqmi
Monóxido de carbono sutiyoq gasqa manan rikukunchu nitaq q’apanchu, sinchi peligrosotaqmi kanpas. Venenasqa runakunaq wañusqanmantas kuskan masraq chay gaswan wañunku. Ichaqa manan manchakunachu, ¿imarayku? Kunanqa imaymana aparatokunan kan chay gasta reparanapaq, chaymi runakunata yanapan chay gasta reparaspa ayqenankupaq.
Saqrapas chay monóxido de carbono hinan; paytaqa manan rikunchischu, sinchi dañotataqmi ruwawasunman. Ichaqa manan manchakunachu, ¿imarayku? Diosmi askha yanapaykunata qowanchis paymanta cuidakunapaq. Wakinmanta yachasun.
Ñoqallanchismantan decidisunman. Santiago 4:7 texton nin: ‘Saqraq contranpi qaqata sayaychis, chaymi payqa qayllaykichismanta ayqekapunqa’, nispa. Atiyniyoq espirituña chaypas manan obligawasunmanchu munayninta ruwanapaq. Ñoqallanchismantan ima ruwananchistapas decidisunman. Sichus Saqraq contranpi qaqata sayasun chayqa ayqerinqan (1 Pedro 5:9). Jesuspas manan urmarqanchu kinsa kutipiña Saqra tentarqan chaypas (Mateo 4:11). Ñoqanchispas chhaynatan ruwasunman.
Diospa amigonmi kasunman. Santiago 4:8 texton nin: “Diosman asuykuychis”, nispa. Arí, Dios kikinmi invitawashanchis amigon kananchispaq. ¿Imatan chaypaq ruwana? Bibliatan estudiana (Juan 17:3). Chaypin Diosmanta yachasun, hinan payta munakusun tukuy sonqowantaq servisun (1 Juan 5:3). Sichus Diospa amigon kananchispaq kallpachakusun chayqa, ‘paypas asuykamuwasunmi’.
Jehová Diosmi pakaykuwaqninchis
Diosmi pakaykuwasunman. Proverbios 18:10 texton nin: ‘Señor Diospa [“sutinqa”, NM] qaqa sayaq pukara hinan, chaymanmi chanin runaqa phawan, allin hark’aykusqataqmi kashan’, nispa. Chaypiqa rimashan pakaykusqa kanapaq Diosmanta respetowan waqyakunamantan, manan amuleto hina Diospa sutinta rikuymantachu.
Hukkunaq ruwasqantan qatikusunman. Hechos 19:19 texton willashan Éfeso llaqtapi wakin cristianokunamanta, ninmi: “Wakin iñiqkunapas layqakunanku libronkuta apamuspa llapankuq qayllanpi kanaykurqanku, paykunan ñawpaqqa layqa kasqaku. Chay kanasqa librokunaq precionmi karqan phisqa chunka waranqa jornal qolqe”, nispa. Arí chay cristianokunaqa llapa layqakunanku librokunatan ruphachirqanku askha qolqeña valerqan chaypas. Kunanpas imaymanapin espiritismo nisqa rikhurimushan, askha runakunataqmi imaymana amuletokunata hap’inku, chaywanmi supaykunata waqyashanku. Wakinqa allinpaqmi chaykunata qhawarinku, ichaqa manan reparakunkuchu supaykunaq trampanman urmashasqankuta. Chaymi chay ruwaykunamanta ayqekunanchis (Deuteronomio 18:10-12).
Rogelion 50 watanpiña yacharqan Saqra cheqaqpuni kasqanta. ¿Imaynapi yacharqan? Paymi nin: “Ñoqaqa manan hayk’aqpas Bibliata leerqanichu, ichaqa qhepamanmi Bibliata estudiarqani, chaymi yanapawarqan Saqra cheqaqpuni kasqanta yachanaypaq, trampanmanta cuidakunaypaqpas”, nispa.
‘Biblia estudiasqay yanapawarqan Saqra cheqaqpuni kasqanta yachanaypaq, trampankunamanta cuidakunaypaqpas’
Biblian nin: ‘Saqraqa azufreyoq nina qochamanmi wikch’uykusqa kanqa’, nispa (Apocalipsis 20:10). Azufreyoq ninamanta rimaspaqa manan ninapi ruphaykusqa kananmantachu rimashan, chayqa manan imananmanpaschu Saqrata espíritu kasqanrayku. Aswanmi pasaqpaq ch’usaqyachisqa kananmanta willashan. Arí, Saqraqa wiñaypaqmi wañuchisqa kanqa, manataqmi pitapas mana allin ruwaykunaman tanqaykunqañachu. ¡Maytan llapa runakunapas munasunman chay p’unchay chayamunanta!
Chay p’unchay chayamunankama, yachashallay Jehová Diosmanta munayninmantawan.a Sichus chayta ruwanki chayqa qhepa tiempomanmi qanpas ninki: “Saqraqa manan kapunñachu”, nispa.
a Saqramanta espiritismomantawan astawan yachayta munanki chayqa, qhaway ¿Imatapunin Biblia yachachin? libropi 10 capitulota. Chaytaqa Jehová Diospa testigonkunamantan mañakuwaq otaq www.pr2711.com/quz nisqapi leewaq.