QALLARIYPI KAQ | ¿IMARAYKUN JESÚS WAÑURAN?
¿Cheqaqtapunichu pasaran?
33 watapin Nazaret llaqtayoq Jesús wañuchisqa karan. Tumparankun “gobiernoq contranpin kashan” nispa, mana khuyapayaspan maqaranku, k’aspipitaq warkuranku ñak’arispa wañunanpaq. Ichaqa Diosmi kausarichimpuran, 40 p’unchay qhepamantaq janaq pachaman ripuran.
Tukuy chay willakuyqa tarikun tawantin evangelio qelqakunapin. ¿Cheqaqtapunichu chaykuna pasaran? Sichus chaykuna cuento jina willakuykunalla kanman chayqa cristianokunaq iñiyninqa yanqan kanman, juj sumaq paraisopi tiyanapaq suyakuypas yanqachá kanman (1 Corintios 15:14). Ichaqa cheqaqtapuni chaykuna pasaran chayqa ancha munay kausaymi jamuq tiempopi suyawashanchis. Chayrayku, ¿evangelio qelqakunaq willasqan cheqaqpunichu icha yanqallachu?
MANAN BIBLIALLACHU JESUSMANTAQA RIMAN
Evangelio qelqakunaqa manan cuentopi jina yanqa willakuykunachu, cheqaqmi willasqankunaqa. Ejemplopaq, willanmi runakunaq sutinta, paykunamantaqa juj qelqaqkunapas rimankun; willallantaqmi llaqtakunaq sutintapas, wakin chay llaqtakunaqa kunankamapas kashanraqmi (Lucas 3:1, 2, 23).
Manan Biblia qelqaqkunallachu Jesusmantaqa riman.a Jesusta imaynata wañuchisqankuta evangelio qelqakunaq willasqanqa tupanmi chay tiempopi romanokuna imaynata wañuchisqankuwan. Mana pimanpas favorecespallan sut’illanta qelqaranku, Jesuspa wakin discipulonkunaq pantasqankutapas willanmi (Mateo 26:56; Lucas 22:24-26; Juan 18:10, 11). Chaykunawanmi yachanchis evangelio qelqaqkunaqa sut’illanta willasqanta, Jesusmanta willasqanpas manan yanqachu.
¿KAUSARIRANCHU JESÚS?
Askha runakunaña creenku cheqaqtapuni kay pachaman Jesús jamusqanpi chaypas iskayankun kausarichisqa kasqanmanta. Kikin apostolninkunapunin qallariypiqa mana creerankuchu (Lucas 24:11). Ichaqa apostolninkunaqa kausarisqan qhepamanmi Jesusta rikuranku, jinallataq juj discipulonkunapas, chaywanmi manaña iskayapurankuñachu. Juj kutipipas 500 más runakunan Jesusta rikuranku (1 Corintios 15:6).
Paykunaqa vidankuta peligroman churasparaqmi Jesuspa kausarisqanmanta willaranku, chaytaqa Jesusta wañuchiqkunamanpas willarankun (Hechos 4:1-3, 10, 19, 20; 5:27-32). ¿Vidankuta chhaynata peligroman churankumanchu karan sichus mana segurochu kankuman karan Jesuspa kausarimpusqanmanta chay? Manapunin. Jinaspapas Cristopi iñiyqa runaq kausaynintan cambiaran, kay tiempopipas kaqllataqmi, chaymi rikuchin Jesuspa kausarisqanqa cheqaqpuni kasqanta.
Jesuspa wañupusqanmanta kausarisqanmantapas evangelio qelqakunaq willasqanqa confianapaqpunin. Chay qelqakunata estudiaspaqa seguron kanki chaypi willakuykuna cheqaqpuni kasqanmanta. Ichaqa aswan seguro kanaykipaqqa entiendenaykin imarayku chaykuna pasasqanmanta. Chaytan qatiqninpi willashan.
a Tácito sutiyoq runaqa 55 watapi jinan naceran. Niranmi: “Cristopi iñisqankuraykun ‘cristiano’ nispaqa sutichakunku, Cristoqa Tiberio rey kashaqtinmi wañuchisqa karan Poncio Pilatoq kamachisqan”, nispa. Juj qelqaqkunaqa karanku: Historiador romano Suetonio, historiador judío Josefo (siglo I), Plinio el Joven Bitinia llaqtapi gobernador (siglo II qallariyninpi).