Leeqkunaq tapukusqan

¿Cristianokuna wañusqakunarayku bautizakuymantachu 1 Corintios 15:29 rimashan?

Manan, manan Bibliapas juj librokunapas chaymantaqa rimanchu.

Wakin Bibliakunapi chay textomanta rimaspan willan Pabloq tiemponpi runakuna wañusqakunaraykupas bautizakunkuman jinata. Jujninmi Nueva Traducción Viviente nisqa Biblia, chaypin nin: “Manataq wañusqakuna kausarimunqakuchu chayqa, ¿imapaqñataq runari wañusqakunarayku bautizakunkuman?”, nispa.

Ichaqa, Bibliamanta yachaqkuna chhaynata qelqaranku, jujninmi Gregory Lockwood, paymi niran: “Pipas wañusqakunarayku bautizakuymantaqa manan Bibliapi rimanchu ni ñaupa tiempo librokunapipas”, nispa. Chhaynallatataqmi Gordon Fee sutiyoq profesorpas qelqaran: “Manan chhayna bautismomantaqa Bibliapi ni juj willakuykunapipas willakunchu. Griego rimay qelqakunapipas manan chaymantaqa imaninpaschu; apostolkunaq wañupusqan qhepamanpas manan wañusqakunarayku bautismomantaqa rimakuranchu mayqen iglesiapipas”, nispa.

Jesusmi yachachishaspa niran: “Llapa nacionmanta runakunaman riychis, jinaspa yachachimuychis discipuloykuna kanankupaq, jinaspa [...] bautizamuychis. Qankunaman llapa kamachisqaykunata paykunaman yachachimuychis kasukunankupaq”, nispa (Mat. 28:19, 20). Chhaynaqa, pipas Jesuspa discipulon kananpaqqa ñaupaqtan yachanan Jehová Diosmanta Jesusmanta ima, jinaspa paykunapi iñispa bautizakunanpaq. Manan chaytaqa ruwayta atinmanchu wañuq runaqa, nitaqmi juj cristianoqa rantinpi bautizakuyta atinmanchu (Ecl. 9:5, 10; Juan 4:1; 1 Cor. 1:14-16).

Chhaynaqa, ¿ima nisharanmi apóstol Pablo 1 Corintios 15:29 nisqanpi?

Corinto iñiq t’aqapiqa, manan wakinqa kausarimpuypi iñirankuchu (1 Cor. 15:12). ¿Imaynatan paykunata Pablo yanaparan? Paymi niran: “Noqapas sapa p’unchaymi wañuy patapi rikukushani”, nispa. Payqa imaymana sasachakuykunapiña tarikuran chaypas, yacharanmi wañupusqan qhepaman Jesús jina espiritupi kausarimpunanta (1 Cor. 15:30-32, 42-44).

Corinto llaqtapi cristianokunaqa janaq pachaman rinankupaq ajllasqan karanku, paykunaqa imaymana sasachakuykunapi tarikuspan wañunanku karan, chhaynapi janaq pachapi kausarimpunankupaq. “Cristo Jesuspi llapa bautizasqa kaqkunaqa wañuyninpi bautizasqan” karanku (Rom. 6:3). Chhayna bautizasqa kaqkunaqa Jesús jinan, imaymana sasachakuykunapi tarikuspa ñaupaqta wañunanku, chhaynapi janaq pachapi kausarichisqa kanankupaq.

Iskay wata bautizakusqan qhepamanmi Jesús apostolninkunaman niran: “Bautizakushasqay bautismowanpas bautizakunkichismi”, nispa (Mar. 10:38, 39). Jesusqa manan chay ratochu bautizakusharan aswanpas chaypiqa rimasharan Diospaq junt’aq sonqo runakuna wañunanmantan. Pablopas qelqaranmi ajllasqa cristianokuna Jesús jina sufrispa jatunchasqa kanankupaq (Rom. 8:16, 17; 2 Cor. 4:17). Ajllasqa cristianokunaqa Jesús jinan ñaupaqta wañunanku janaq pachapi kausarinankupaq.

Chaymi apóstol Pabloq nisqanqa khaynata t’ijrakun: “Manataq wañusqakuna kausarimunqakuchu chayqa, ¿imataq kanqa wañusqa kanankupaq bautizakushaqkunawanri? Yanqapaqchá riki paykunapas bautizakushanku”, nispa.