¿Imaynatan Diosmanta mañakuy yanapawasunman?

Pamelaqa cáncer onqoyniyoqmi kashan, jinan jampichikunanpaq doctorman riran. Chaymantapas Diostan niran: “Kallpata qoykuway kay onqoyniyta aguantanaypaq”, nispa. ¿Diosmanta mañakusqan yanaparanchu?

Pamelan nin: “Cáncer onqoyniymanta jampichikushaspaqa askha kutipin manchasqa kasharani. Jehová Diosmanta mañakuspaymi ichaqa sonqoy tiyaykuq, jinaspa manaña manchakuqchu kani. Cuerpoyqa nanawanraqmi, Diosmanta mañakuspan ichaqa manaña nishutachu onqoyniypi piensani. ‘Imaynan kashanki’ nispa niwaqtinkun, noqaqa nini: ‘Manan qhaliyaniraqchu, ichaqa allillanmi kashani’”, nispa

Manan sinchi llakikuykunapi tarikuspallachu Diosmantaqa mañakunanchis. Llapanchispaqpas kanpunin sasachayninchiskunaqa, manan pipas ninmanchu: “Noqaqa allillanmi kashani”, nispaqa. Chaymi yanapanata necesitanchis. Chhaynaqa, ¿imaynatan Diosmanta mañakuy yanapawasunman?

Bibliapin nin: “Señor Diosman llakipakuyniykikunata saqey, paymi qaqata sayachisunki, manan jayk’aqpas chanin runataqa urmachisqa kananta munanqachu”, nispa (Salmos 55:22). ¡Chaypi nisqanqa may sumaqmi riki! Chhaynaqa, ¿imaynatan Diosmanta mañakuy yanapawasunman? Diospa sonqonpaq jina mañakusun chayqa, payqa yanapawasunmi sasachayninchista atipananchispaq (qhaway “¿Imaynatan Diosmanta mañakuy yanapasunkiman?” nisqata).

¿Imaynatan Diosmanta mañakuy yanapasunkiman?

Thaj kaytan qosunki

“Ama imamantapas llakipakuychischu, aswanpas mañakuspa, rogakuspa, graciasta qospa ima Diosman willakuychis imachus necesitasqaykichista. Jinan Diosqa runaq mana entiendey atisqan thaj kayta qosunkichis, chhaynapin sonqoykichista yuyayniykichista ima Cristo Jesuswan waqaychanqa” (Filipenses 4:6, 7). Diosman llakikuyninchiskunata willakusun chayqa, payqa yanapawasunmi sonqonchis tiyaykunanpaq, allinta piensaykuspa imatapas ruwananchispaq.

Yachaytan qosunki

“Mayqenniykichispas yachayniyoq kayta necesitashankichis chayqa, Diosmanta mañakushallaychis, jinan Diosqa chay mañakusqaykichista qosunkichis. Payqa lliuman tukuy sonqowan askhatapuni qoq Diosmi, mana phiñarispataqmi payqa qonpas” (Santiago 1:5). Jatun llakipi tarikuspaqa mana allinta piensaykuspan imatapas ruwasunman. Ichaqa Diosmanta yachayta mañakusun chayqa, payqa yuyarichiwasunmi Bibliapi kaq sumaq yachachikuyninkunata.

Kallpatan qosunki

“Tukuy imapaqmi kallpa qowaqniyqa kallpata qowan” (Filipenses 4:13). Jehová Diosninchisqa tukuy atiyniyoqmi, chaymi payqa kallpanta qowasunman ima llakikuyninchistapas atipananchispaq otaq aguantananchispaq (Isaías 40:29). Bibliapin nillantaq Diosqa pay sonqo runakunata tukuy llakikuyninkupi kallpachasqanta (2 Corintios 1:3, 4).