¿Imamantan kanman qhepaman allinta kausanaykipaq?
Askha runakunan creenku suertepi, destinopi jujkunapipas, jinaspa chaykunawan yanapachikunankupaq imaymanata ruwanku.
IMAKUNAPIN CREENKU
CH’ASKATA QHAWAQKUNAPI. Askha runakunan ninku: “Ima killapichus nacesqaykiman jinan kausayniykiqa kanqa”, nispa. Chaypaqmi horoscopota leenku chay p’unchaykunapi imachus paykunata pasananta yachanankupaq, jinaspa chayman jina imatapas ruwanku.
WATUQKUNATA TAPUNKU. Askha runakunan watuqkunata layqakunatapas tapunku qhepaman allin kanankupaq. Paykunaqa ninkun: “Chayta ruwallaqtinchismi allin kasunchis”, nispa. Watuqkunaq nisqanman jinataqmi imatapas ruwanku.
WAÑUQKUNATA YUPAYCHANKU. Jujkunaqa wañuqninkumanta jujkunamantawanmi mañakunku yanapachikunankupaq. Vietnam llaqtamanta Vanmia nin: “Noqaqa piensarani wañuqniykunata yupaychaspa allin kanaypaq, chaymantapas niranin chayta ruwaqtiyqa wawaykunapas allillanmi kanqaku”, nispa.
JUJ CUERPOPI NACEMUNANKUPAQ CREENKU. Askha runakunan ninku: “Wañupuspaqa jujmantan juj cuerpopiñataq nacemunchis”, nispa. Chaymantapas ninkun: “Imaynatachus ñaupaq vidanchispi kausaranchis chaymantan kanqa kunan vidapi allin mana allin kananchispaqqa”, nispa.
Askha runakuna manaña chaykunapi creenkuchu chaypas, leenkun horoscopota, watuqkunamanmi rinku, cartakunata makita leeqkunamanpas rillankutaq. Paykunaqa ninkun: “Yaqapaschá imallapipas yanapawasunman”, nispa.
¿YANAPANCHU CHAYKUNA RUNAKUNATA?
¿Allintachu kausashanku chaykunata ruwaqkuna, jamuq tiempopipas allin kausayniyoqchu kankuman?
Chaypaq yachasun Vietnam llaqtamanta Hào runawan imachus pasasqanmanta. Payqa watuqkunaq nisqantan kasukuran, chaymantapas wañuqninkunamantan sapa kutilla mañakuq. Ichaqa manan chaykunaqa yanaparanchu, paymi nin: “Negocioypin fracasapurani, askha qolqetan deberani, familiaypipas manan allintachu kausarayku, jinan sinchi llakisqa kasharani”, nispa.
Taiwán llaqtamanta Qiumin runapas horoscopopin creeq, chaymantapas creellaqtaqmi juj cuerpopi jujmanta nacemunanpaq, wañuqninkunatapas yupaychaqmi. Ichaqa chaykunapi creesqanta allinta qhawarispan niran: “Chaykunapi creesqayqa mana entiendenapaq jinan karan. Horoscopota leespan repararani chaypi nisqan mana junt’akusqanta”, nispa. Chaymantapas niranmi: “Sichus juj cuerpopi jujmanta nacemuyman karan chayqa, yuyaymanchá ñaupaqpi ruwasqaytaqa”, nispa.
“Chaykunapi creesqayqa mana entiendenapaq jinan karan” (QIUMIN, TAIWÁN)
Hàopas Qiuminpas juj runakunapas sut’itan repararanku destinopi, horoscopopi, wañuqkunapi, juj cuerpopi jujmanta nacemuypi creeyqa yanqapaq kasqanta, chaykunaqa manan yanapawasunmanchu jamuq tiempopi allin kananchispaqqa. Chhaynaqa, ¿manachu imapas yanapawasunman?
Askha runakunan ninku: “Jamuq tiempopi allin kananchispaqqa profesionniyoq, qhapaqmi kananchis”, nispa. Ichaqa, ¿imaninkun profesionniyoq qhapaq runakunapas?
a Kay revistapi wakin sutikunaqa cambiasqan kashan.
b Chay yachachikuyqa Bibliapin kashan, Gálatas 6:7 textopi. Chay rimaytan juj llaqtakunapi runakuna nillankutaq: “Mana allin ruwasqaykiqa qanllamantaqmi kutimusunki”, nispa.