¿Allin profesionniyoq qolqeyoq kaspachu allin kasunman?

Askha runakunan ninku: “Profesionniyoq kaspaqa allillanmi kasunchis, familianchistapas juj runakunatapas atisunmi yanapayta”, nispa. Chaymantapas ninku: “Profesionniyoq kaspaqa allin llank’anayoqmi kasunchis, askha qolqetan ganasun, jinan kusisqa kausasunchis”, nispa.

ASKHA RUNAKUNAN CHAYTA RUWARANKU

China nacionmanta Zhang Chen runan nin: “Noqaqa niranin universidadman jaykuspayqa manañan wajchachu kasaq, allin llank’anayoqmi kasaq, kusisqataqmi kausasaqpas”, nispa.

Askha runakunan juj nacionkunataraq viajanku allin reqsisqa universidadkunapi estudianankupaq. Ichaqa coronavirus onqoy kasqanwanmi pisillaña chayta ruwayta atiranku. 2012 watamanta Organización para la Cooperación y el Desarrollo Económico nisqan kayta niran: “Asia ladomanta wayna-sipakunan astawanqa juj nacionkunapi estudiashanku”, nispa.

Askha tayta-mamakunan astawan llank’ashanku wawanku juj nacionkunapi estudianankupaq. Taiwán nacionmanta Qixiang runan nin: “Tayta-mamayqa mana qolqeyoqmi karanku. Chaywanpas tawantin wawankunatan kachawaranku Estados Unidospi estudianaykupaq”, nispa. Chayta ruwaspan tayta-mamaykuqa askha qolqeta jujkunaman deberanku.

¿IMAYNAN PAYKUNA KASHANKU?

Kuska tuta horasta jinataq, jujnin kaq sipas sayk’usqa computadoranpa ñaupaqenpi tiyashan. — Askha runakunan profesionniyoq qolqeyoq kayta munaspa imaymana llakipi tarikunku

Allin educacionniyoq kasqanchisqa yanapawasunmanmi vidanchispi, ichaqa manan piensasqanchisman jinapunichu kanman. Askha runakunan mana munasqanku llank’anapichu llank’ashanku profesionniyoqña kaspapas. Juj investigaq runan niran: “Askha profesionniyoq runakunan mana llank’anata tarinkuchu”, nispa. Taiwán nacionmanta Jianjien nin: “Askha profesionniyoq runakunan llank’anata mana tarispanku juj llank’anakunapi llank’apushanku”, nispa.

Wakinqa estudiasqanku profesionpin llank’ashanku, chaywanpas manan piensasqankuman jinachu kausashanku. Tailandia nacionmanta Niconmi Inglaterra nacionman riran estudiaq. Llaqtanman kutimpuqtinmi estudiasqan profesionpi llank’aran. Paymi nin: “Llank’anaypiqa allintan pagawaqku, ichaqa askha horakunatan llank’anay karan. Qhepamantaq llank’asqay empresapiqa askha llank’aqkunata qarqopuranku, noqatapas qarqopuwarankun. Chaypin yacharani ima llank’anapas mana segurochu kasqanta”, nispa.

Askha runakuna qhapaqña kanku chaypas, paykunaqa manan kusisqachu kausanku, jujkuna jinan onqoyniyoq kashanku, familiankupipas problemakunapin tarikunku, chaymantapas nishutan llakikunku qolqenkuta pierdenankumanta. Japón nacionmanta Kasutoshin nin: “Askha qolqeyoqña karani chaypas, manan kusisqachu kausarani, juj empresariokunan noqamanta envidiakuspa imaymanata ruwaqku fracasanaypaq”, nispa. Vietnam nacionmanta Lammi nin: “Askha runakunatan rikurani allin llank’anayoq qolqeyoq kanankupaq kallpachakusqankuta, ichaqa wajchayapurankun, paykunaqa nishuta llakikuspan onqopurankuraq”, nispa.

MANAN QOLQEYOQ EDUCACIONNIYOQ KASPACHU ALLINQA KASUN

Imallatapas estudiayqa allinmi, qolqetapas necesitanchismi familianchista noqanchistapas mantenekunanchispaq. Ichaqa manan allin educacionniyoq qolqeyoq kaspachu nisunman: “Jamuq tiempopiqa allillanmi kasaq”, nispaqa. ¿Imanaqtinmi chayta ninchis? Chaypaq qhawasun imatachus Diospa Simin Qelqapi nisqanta.

PROFESIONNIYOQKUNAPAS WAJCHAYAPUSHANKUN

‘Manan allin phawaqkunachu phawaspaqa llallinku, manan allin yuyayniyoqkunachu qhapaqkunapas, manan allin yachaqkunachu sumaq chaskisqapas, aswanpas sapankan imapipas rikukunku’ (ECLESIASTÉS 9:11).

Askha nacionkunapin profesionniyoq runakunapas wajchayapushanku llaqtanku wajchayapusqanrayku, chay pasasqanwanmi chay llaqtakunapi tiyaq runakunaqa mana munasqankuman jinachu kausashanku.

KAQNINCHISKUNAQA TUKUKAPUQLLAN

“Qhapaqyanaykipaq ama afanakuychu, chaymanta waqaychakunaykipaq yuyayniyoq kay. Juj ratollan chaytaqa qhawarinki, manataq kapunchu, chaykunaqa ankakuna jinan rafrachakun, jinaspa phalaripun” (PROVERBIOS 23:4, 5).

Qolqeyoqña kasunman chaypas llaqtanchis wajchayapuqtinqa mana imayoqmi qonqaylla qhepakapusunman, chaymantapas terremotokuna, jatun wayrakuna kaqtinmi qonqaylla mana imayoq qhepakullasunmantaq.

QHAPAQKUNAQA LLAKIKUNAPIN TARIKUNKU

‘Qhapaqtan askha kaqninkuna mana puñuchinchu’ (ECLESIASTÉS 5:12).

Hong Kong llaqtamanta Franklinmi chhaynapi tarikuran. Payqa profesionniyoqmi karan, llank’ananpipas allintan pagaqku. Paymi ichaqa nin: “Nishu sayk’usqan kasharani, chaymi manaña allintañachu puñuqpas kani. Jinan tapukurani: “¿Imaraykutaq onqonaykamaraq llank’ashani, allintachu kayta ruwashani?”, nispa.

“Qhapaqyanaykipaq ama afanakuychu” (PROVERBIOS 23:4)

Franklin jinan jujkunapas repararanku mana profesionniyoq qolqeyoq kaspachu allin kanankuta. Chaymi wakin runakunaqa chaykunata maskhanankumantaqa kallpachakunku allin runakuna kanankupaq, runamasinkuta yanapanankupaqpas. Ichaqa, ¿chayta ruwaspachu jamuq tiempopi allinta kausasunman? Chaymanta kunan yachasun.