¿Allin runa kaspachu qhepaman allin kasunman?

Ñaupaqmantapachan runakuna niqku: “Allin runa kanki chayqa, allillanmi qhepamanqa kanki”, nispa. Ñaupa tiempopi kausaq Confucio runan kayta niran: “Manan munawaqchu mana allinta ruwanasuykikutaqa ¿riki? Chhaynaqa qanpas ama mana allintaqa jujkunata ruwaychu”, nispa.a Asia ladopi askha runakunan chhaynata piensanku.

ASKHA RUNAKUNAN CHAYTA RUWANKU

Kunan tiempopipas askha runakunan ninku: “Allin runa kanki chayqa, qhepamanqa allillanmi kanki”, nispa. Chaymi juj runakunata respetowan tratanku, llaqtankupipas allinta portakunku, manataqmi ima mana allintapas ruwankuchu. Vietnam llaqtamanta Linmi nin: “Noqaqa niranin sichus honrada kasaq allintapas portakusaq chayqa, allillanmi kasaq”, nispa.

Chay señorallataqmi mijunata wajcha runakunaman servishan.

Wakin runakunaqa religionninkuq yachachisqanta kasukuspan allinta portakunku. Taiwán nacionmanta Hu-Yun runan nin: “Religionniypin niwaranku allin runa karanki chayqa wañupuspaykiqa wiñaypaqmi kusisqa kanki, millay runa karanki chaytaq wiñaypaq ñak’arinki”, nispa.

¿IMAYNAN KASHANKU?

Chay señorallataq tardenta llakisqa, sayk’usqa ima wawanta marq’aykushan.

Jujkunata yanapayqa allinpunin, ichaqa wakin yanapaq runakunan ninku: “Jujkunataña yanapani chaypas manan llapankuchu yanapasqaytaqa valoranku”, nispa. Hong Kong llaqtamanta Shiu Ping sutiyoq warmin nin: “Allinkunata ruwaqkunaqa manan ruwasqankuman jinachu imatapas chaskinku. Noqaqa imaymanatan ruwarani familiayta cuidanaypaq, kallpachakuranitaqmi imatapas allinta ruwanaypaq, chaywanpas qosayqa noqatawan wawaytawanmi wijch’upuwaranku”, nispa.

Religionniyoqña askha runakuna kanku chaypas manan chayraykuchu allin runakuna kanku. Japón nacionmanta Etsuko sutiyoq warmin nin: “Juj religionpin kasharani, chaypin noqaqa wayna-sipaskunata umallirani. Chay qhepamanmi ichaqa manaña chay religionpi kayta munaranichu, rikuranin religionniypi runakuna millaykunata ruwasqankuta, chaypi umallinankupaq atipanakusqankuta, qolqetapas suwakusqankuta”, nispa.

“Noqaqa imaymanatan ruwarani familiayta cuidanaypaq, kallpachakuranitaqmi imatapas allinta ruwanaypaq, chaywanpas qosayqa noqatawan wawaytawanmi wijch’upuwaranku” (SHIU PING, HONG KONG)

Wakin religionniyoq runakunaqa religionninkuta kasukuspan kallpachakunku allinkunata ruwanankupaq, chaywanpas imaymana llakipin tarikunku. Vietnam llaqtamanta Van sutiyoq warmin niran: “Sapa p’unchaymi frutata, t’ikata, mijunakunata wañupuq familiaykunaman aparani bendeciwanankupaq. Imaymana allinkunatan jujkunapaq ruwarani, diosniykunatapas sapa kutillanmi yupaychaq kani. Ichaqa qosaymi nishuta onqopuran, ususiytaq 20 watallanpi kashaspa karu llaqtapi wañupuran”, nispa.

ALLIN RUNAÑA KASPAPAS LLAKIKUNAPIN TARIKUSUNMAN

Jujkunata yanapayqa allinmi, ichaqa manan chayraykuchu jamuq tiempopiqa allin kasunman. ¿Imaraykun chayta ninchis? Chayta yachanapaq Diospa Simin Qelqapi nisqanta qhawarisun.

MANAN LLAPA RUNACHU ALLIN KAQTA RUWANKU

“Juj runaq pantasqallanmi ancha allin kaqta waqllichin” (ECLESIASTÉS 9:18).

Allin runa kanaykipaq imaymanataña ruwawaq chaypas, jujkunaq mana allin ruwasqankuraykun mana allinpi tarikuwaq. Coronavirus kasqanraykun autoridadkuna niranku juj runakunamanta chikanta karunchakunanchispaq, ichaqa wakillanmi kasukuranku, chaymi jujkunaq mana kasukusqanrayku kasukuq runakunapas mana allinpi tarikuranku.

ASKHAN MANA YACHANCHU IMACHUS ALLIN MANA ALLIN KASQANTA

“Runapaqqa kanmi cheqanman rijch’akuq ñan, p’uchukayninmi ichaqa wañuna ñan” (PROVERBIOS 14:12).

Askha runakunan piensaranku allinta imatapas ruwanankupaq, ichaqa qhepamanmi reparakuranku pantasqankuta, jinan imaymana llakikunapi tarikuranku.

IMAPI TARIKUNANCHISTAQA MANAN YACHASUNMANCHU

“Qankunari yachankichischu paqarin imachus vidaykichis kananta” (SANTIAGO 4:14).

Allin runaña kasunman chaypas qonqayllan wañupusunman. Coronavirus onqoy kasqanwanmi askha yanapakuq runakuna wañupuranku. China nacionpi Liting sutiyoq warmiwan imachus pasasqanta yachasun, papanmi juj accidentepi wañupuran. Paymi nin: “¿Imanaqtintaq papayri allin runa kashaspa wañupuran? Payqa allin llank’aq runan karan, sumaqtan jujkunatapas yanapaq, chay carropi kaqkunamantaqa payllan wañupuran”, nispa.

Yachamusqanchis jina manan allin runa kasqanchisraykuchu nisunman noqaqa kusisqan kausasaq nispaqa. Chhaynaqa, ¿imatan ruwananchis jamuq tiempopi allinta kausananchispaq? ¿Maypin tarisunman yanapayta allinta kausananchispaq?

a Confucio runaq nisqanmanta astawan yachayta munanki chayqa, leewaqmi El hombre en busca de Dios libropi 7 capitulota, 31 parrafomanta 35 parrafokama, chaytaqa Jehová Diospa testigonkunan ruwanku, chaypaq jaykuy www.pr2711.com nisqaman.