¿Imaynatan Jehová Dios pakaykuwanchis?

1. ¿Imaraykun Jesús qatikuqninkunarayku mañakuran?

JESUSQA yacharanmi Jehová Diosta llapa serviqkunaqa qatiykachasqa kanankuta. Chaymi manaraq wañupushaspa Jesusqa taytanmanta mañakuran, qatikuqninkunata Saqramanta cuidananpaq (Juan 17:14, 15). Chaymi llapanchispas necesitanchis Jehová Dios pakaykuwananchista.

2. ¿Uyarinchu Jehová Dios mañakusqanchista?

² Jehová Diosqa anchatan wawan Jesusta munakuran, chaymi mañakusqantapas uyariran. Sichus noqanchispas kallpachakusunchis Jehová Diospa kamachikuyninkunata kasukunanchispaq chayqa, payqa pakaykuwasunmi. Chaymantapas munakuwasqanchisraykun Jehová Diosqa mañakusqanchista uyariwasunchis. Munakuq papanchisqa sutinraykun cuidawasunchis.

3. ¿Imaraykun necesitanchis Jehová Dios pakaykuwananchista?

³ Jesusqa Saqra Satanastan kay pachaman wijch’uykamuran. Chaymi Satanasqa sinchi phiñasqa kashan, payqa yachanmi pisillaña tiempon kasqanta (Apo. 12:12). Chaymi Saqraqa runakunata tanqashan Diosta serviqkuna contra sayarinankupaq (Juan 16:2). Chaymantapas runakunaqa cheqnikuwanchis mana paykuna jinachu kasqanchisraykun, chaywanpas manan manchakunanchischu. Bibliapin nin: “Señorqa junt’aqpunin, paymi kallpachasunkichis, Satanasmantapas pakaykusunkichis”, nispa (2 Tes. 3:3). Kunanmi yachasunchis ima iskay yanapaykunatan Jehová Dios qowanchis pakaykuwananchispaq chayta.

JEHOVÁ DIOSMI ARMAKUNATA QOWANCHIS PAKAYKUWANANCHISPAQ

4. Efesios 6:13-17 nisqan jina, ¿imakunatan Jehová Dios qowanchis pakaykuwananchispaq?

⁴ Jehová Diosqa imaymana armakunatan qowanchis iñiyninchispi ama pisipananchispaq, chhaynapi Saqraq trampankunamanta pakaykuwananchispaq (leey Efesios 6:13-17). Chay armakuna pakaykuwananchispaqqa llapa armakunawanmi churakunanchis. ¿Imakunan chay armakuna? Kunanmi chaymanta yachasunchis.

5. ¿Iman cheqaq kay chumpi? ¿Imaraykun chay chumpiwan churakunanchis?

⁵ Cheqaq kay chumpi. Chay cheqaq kay chumpiqa Jehová Diospa siminmi. Chaypin kashan Jehová Diospa llapa yachachikuyninkuna. Chay yachachikuykunan yanapawasunchis Saqra ama engañawananchispaq (Juan 8:44). Saqraqa watan-watanmi imaymana yachachikuykunawan runakunata engañashan (Apo. 12:9). Chayraykun Bibliapi kaq yachachikuykunata allinta yachananchis, chhaynapi Saqrawan ama engañachikunanchispaq. Chaymantapas Diospa santo espirituntan mañakunanchis “cheqaq kaywan” payta adorananchispaq, ‘tukuy imapi honrado’ kananchispaqpas (Juan 4:24; Efes. 4:25; Heb. 13:18).

6. ¿Iman chanin kay qhasqo jark’ana? ¿Imaraykun chaywan churakunanchis?

⁶ Chanin kay qhasqo jark’ana. Chayqa Bibliapi Jehová Diospa chanin kamachikuyninkunan. Ñaupa tiempopi soldadokunaqa churakuqkupunin qhasqo jark’anawanqa. Chhaynatan noqanchispas kasukunanchispuni Jehová Diospa kamachikuyninkunataqa. Chaykunan yanapawasunchis kay pachapi imaymana kaqkunata ama munapayananchispaq, aswanpas Jehová Diosllata tukuy sonqonchiswan munakunanchispaq (Prov. 4:23; Mat. 22:36, 37). Saqraqa maytan munashan kay pachapi imaymana mana allinkunata munakunanchista, chhaynapi Jehová Diosmanta karunchawananchispaq. Chayraykun noqanchisqa qhasqo jark’anawanpas churakushasunman jina Jehová Diospa kamachikuyninkunata kasukunanchispuni (Sant. 4:4; 1 Juan 2:15, 16).

7. ¿Imata ruwaspan qhasqo jark’ana p’achata churakunchis?

⁷ Sichus Jehová Diospa kamachikuyninkunata kasukusunchis chayqa, qhasqo jark’ana p’achawanpas churakushasunman jinan kanqa. Chaymi yanapawasunchis Jehová Diospa cheqnikusqan ruwaykunata cheqnikunanchispaq, allin kaqkunatataq munakunanchispaq (Sal. 97:10). Runakunaqa Diospa kamachikuyninkunatan sasa junt’aypaq jina qhawarinku, chaymi mana kasukunkuchu. Noqanchispaqmi ichaqa Diospa kamachikuyninkunaqa mana sasa junt’aychu (1 Juan 5:3). Sichus juj soldado guerrapi kashaspa qhasqo jark’anan p’achanta ch’utirukunman chayqa, faciltan wañuyta tarinman. Chhaynan kanman sichus Jehová Diospa kamachikuyninkunata mana kasukusunmanchu chayqa.

8. ¿Imata ruwananchispaqmi allin usut’asqa kananchis?

⁸ Apóstol Pabloq nisqan jina, allin usut’asqas kananchis allin willakuykunata runakunaman willananchispaq. Chaytaqa ruwanchis runakunaman Jehová Diosmanta yachachispan, chayta ruwasunchis chayqa allin iñiyniyoqmi kasunchis. Hermanonchiskunapas chayta ruwanankupaqmi kallpachakushanku. Paykunaqa llank’anankupipas, familiankumanña visitaq rishaspapas, onqosqaña kashaspapas, manaña wasinkumanta lloqsiyta atinkuchu chaypas Diosmantaqa willashallankun. Chhaynaqa mana manchakuspan runakunaman willashanallanchis. Sichus juj soldado guerrapi kashaspa usut’anta ch’utirukunman chayqa, manan atinmanchu maqanakuyta, chakintapas k’irikunmanmi. Sichus noqanchispas Diosmanta willayta manchakusunman chayqa iñiyninchispin pisipapusunman.

9. ¿Imaynatan iñiyninchis jatun escudo jina pakaykuwanchis?

⁹ Iñiyninchisqa jatun escudo jinan. Chaymi yanapawanchis ‘Satanaspa llapa raurashaq flechankunamanta’ cuidakunanchispaq. Iñiyninchisqa jatun escudo jinan pakaykuwanchis Diospa llaqtan contra rimaqkunamanta, burlakuwaqninchis runakunamanta, pisichawaqninchis runakunamantapas. Sichus allin iñiyniyoq kasunchis chayqa mana manchakuspan escuelanchispipas llank’ananchispipas Jehová Diosmanta willasunchis (1 Ped. 3:15). Chaymantapas yaqapaschá llank’ananchispi niwasunman astawan llank’ananchispaq, chhaynapi astawan qolqeta ganananchispaq. Jehová Diospi confiasunchis chayqa manan piensasqanchisman jinallachu imatapas ruwasunchis, aswanpas Jehová Diospa munasqanman jinan (Heb. 13:5, 6). Chaymantapas allin iñiyniyoq kasunchis chayqa Jehová Diospin confiasunchis piña noqanchis contra jatarinman chaypas (1 Tes. 2:2).

10. ¿Iman suyakuyninchis casco? ¿Imaraykun chay cascota churakunanchis?

¹⁰ Salvasqa kananchis suyakuywan cascowan jina churakusun. Jehová Diosqa pisi tiempollamantan wañuyta chinkachinqa, llapa kasukuqkunamantaq sumaq kausayta qonqa. Chaytan noqanchisqa suyakushanchis, chaymi noqanchispaqqa juj casco jina (1 Tes. 5:8; 1 Tim. 4:10; Tito 1:1, 2). Imaynan juj cascoqa yanapawanchis umanchista ama takakunanchispaq, chhaynatan suyakuyninchispas yanapawanchis Jehová Diospa promesankunapi piensananchispaq, pay jina ima sasachakuykunatapas qhawarinanchispaq. Chaymi noqanchisqa mana kay pacha qhapaq kaykunamanchu jap’ipakunanchis, aswanpas Jehová Diosmanmi jap’ipakunanchis (Sal. 26:2; 104:34; 1 Tim. 6:17).

11. ¿Iman espada? ¿Imaraykun chaywanpuni runakunata yanapananchis?

¹¹ Espirituq espadantapas allinta jap’iychis. Chay espadaqa Diospa siminmi. Chaywanmi runakunata yanapasunman amaña engañasqachu kanankupaq, mana allin ruwashasqankutapas saqepunankupaq (2 Cor. 10:4, 5; 2 Tim. 3:16, 17; Heb. 4:12). Chaypaqmi ichaqa Bibliata allinta estudiananchis, Diospa llaqtanpi yachachiwasqanchisman jinataqmi runakunata yachachinanchis (2 Tim. 2:15). Jehová Diosqa manan chay armakunallatachu qowanchis pakaykuwananchispaqqa, juj yanapaykunatawanmi qowanchis. Chaykunamantan yachallasuntaq.

MANAN SAPALLANCHISCHU MAQANAKUSHANCHIS

12. ¿Pikunaq yanapayninwanmi Saqratapas supayninkunatapas atipasunchis?

¹² Juj soldadoqa manan sapallanqa enemigonkunata atipayta atinmanchu. Chhaynallatataqmi noqanchispas sapallanchisqa mana atipayta atisunmanchu Saqratapas supayninkunatapas. Chay maqanakuytaqa hermanonchiskunaq yanapaynillanwanmi atipayta atisunchis, chayraykun Diospa llaqtanpiqa juj nisqalla kananchis (1 Ped. 2:17).

13. Hebreos 10:24, 25 nisqan jina, ¿imaynatan juñunakuykuna yanapawanchis?

¹³ Juñunakuypiqa jujkuna-jujkunawanmi kallpachanakunchis, chaymi juñunakuykunamanqa rinanchispuni. Sichus juñunakuykunaman risunchis chayqa allin kallpachasqan kasunchis (leey Hebreos 10:24, 25). Kay pachapi imaymana kasqanwanmi mayninpiqa llakisqa kasunman, ichaqa juñunakuykunaman rispaqa kusisqan kanchis. Chaypiqa sumaqtan iñiqmasinchiskunaqa kallpachariwanchis. Jinaspapas chaypin yachanchis imaynata runakunaman Diosmanta willananchista, yanapawallanchistaqmi Jehová Diosta servishanallanchispaqpas (1 Tes. 5:14). Chaymantapas juñunakuykunapiqa jujkuna-jujkunawanmi sumaqta kallpachanakunchis (Hech. 20:35; Rom. 1:11, 12). Chaymi manaraq juñunakuykunaman rishaspaqa allinta preparakunanchis. Chaymantapas tukuy yuyaywanmi juñunakuykunapi yachachikamusqanta uyarikunanchis. Chaymantapas imachus juñunakuykunapi yachasqanchistapas kasukunanchismi, chaykunata ruwasunchis chayqa allin preparasqan kasunchis (2 Tim. 2:3).

14. ¿Pikunawanmi Jehová Dios yanapachiwallanchistaq?

¹⁴ Jehová Diosqa millonninpi angelninkunawanmi yanapachiwallanchistaq. Angelkunaqa atiyniyoqmi kanku, chaymi juj kutinpas waranqanpi soldadokunata juj angel-lla wañurachiran (Isa. 37:36). Chhaynatan Jehová Diospas angelninkunawan noqanchista yanapawallasuntaq. Jehová Dioswan angelninkunawan imataq kashanchis chayqa manan imatapas manchakunanchischu (Juec. 6:16). Familianchisña llank’ananchispi compañeronchisña noqanchismanta burlakunkuman chaypas, Jehová Diosmi angelninkunawan yanapawasunchis, kallpachawasunchis ima.

JEHOVÁ DIOSQA MANAN JAYK’AQPAS SAQERPARIWASUNCHU

15. Isaías 54:15, 17 nisqan jina, ¿imaraykun Diosmanta willananchista mana pipas jark’ayta atiwasunchu?

¹⁵ Noqanchisqa manan kay pachapi mayqen gobiernomanpas sayapakunchischu. Aswanpas noqanchisqa Diospa gobiernonmantan llapa runakunaman willamushanchis, chaymi kay pacha runakunaqa cheqnikuwanchis. Chaymantapas Saqraqa llulla kasqantan runakunaman willamushallanchistaq, chaymi Saqraqa sinchi phiñasqa kashan, upallachiytataqmi munawashanchispas (Juan 8:44). Saqraqa manan munanchu Jehová Diosmanta runakunaman willananchista, ichaqa manan jayk’aqpas upallachiytaqa atiwasunchu. Chaymi kunanpas pachantinpi Diosmanta runakunaman willakushan, chhaynapin rikunchis Jehová Diosqa noqanchiswanpuni kashasqanta (leey Isaías 54:15, 17).

16. ¿Imaynatan Jehová Dios pakaykuwasunchis manchay ñak’ariy tiempopi?

¹⁶ ¿Imaynatan Jehová Dios manchay ñak’ariy tiempopi pakaykuwasunchis? Manchay ñak’ariy tiempopin gobiernokunaqa pantasqa religionkunaman phawaykuspa chinkachipunqaku. Chay qhepamantaq Diospa llaqtanta chinkachiyta munanqaku, ichaqa Jehová Diosmi pakaykuwasunchis (Apo. 17:16-18; 18:2, 4). Chaymantapas Armagedón guerrapin Saqratapas llapa gobiernokunatapas chinkachipunqa. Noqanchistan ichaqa pakaykuwasunchis (Apo. 7:9, 10; 16:14, 16).

17. ¿Imaraykun Jehová Diosmanta manapuni t’aqakunanchischu?

¹⁷ Imaymanataña Saqra ruwanqa Jehová Diosmanta t’aqawananchispaq chaypas, manapunin Jehová Diosmantaqa t’aqakunanchischu. Jehová Diosmi manchay ñak’ariy tiempopi salvawasunchis, Saqratapas wiñaypaqmi chinkachipunqa (Rom. 16:20). Chhaynaqa, Jehová Diospa qowasqanchis llapa armakunawanmi churakunanchis, manataqmi jayk’aqpas chaykunataqa ch’utikunanchischu. Noqanchisqa manan sapallanchischu kashanchis. Noqanchiswanmi kashanku Jehová Diospas, angelkunapas, hermanonchiskunapas (Isa. 41:10).