Leeqkunaq tapukusqan

¿Imaraykun mana comuntachu celularpi mensajekunata apachinanchis?

Llapanchispas celulartaqa necesitanchispunin amigonchiskunawan familianchiskunawan rimananchispaq, ichaqa chaytaqa allin yuyaywanmi jap’inanchis. Chaymi Bibliapas nin: “Yuyayniyoqqa mana allin kaqtan reparan jinaspan pakakun, pisi yuyayniyoqkunan ichaqa pasallanku jinaspan k’irisqa rikukapunku”, nispa (Prov. 27:12).

Jehová Diosqa anchatan munakuwanchis, chaymi cuidawanchis. Payqa manan munanchu llaqtanmanta qarqosqa runakunawan juñukunanchista. Paykunamanta wakinqa Jehová Dios contra, llaqtan contran mana allinta rimanku (Rom. 16:17; 1 Cor. 5:11; 2 Juan 10, 11). Chaymantapas Jehová Diosqa manan munanchu kamachikuyninkunata mana kasukuq hermanonchiskunawan purinanchistaqa (2 Tim. 2:20, 21). Mayqen iñiqmasinchiswanpas amigontin kananchispaqqa allintan paytaqa reqsinanchis, manan celularpi reqsispallachu nisunman: “Payqa amigoymi”, nispaqa.

Wakin wayna-sipas hermanonchiskunaqa celularpin grupokunata kichanku juj hermanonchiskunawan reqsinakunankupaq. Chay grupokunapiqa manan reqsisqanku hermanokunallawanchu rimanku. Chaymanqa Diospa llaqtanmanta qarqosqa runakunapas jaykunkun. Chaymi manapuni chay grupokunamanqa jaykunanchischu. Noqanchisqa manan yachanchischu chay grupopi wakin runakuna imayna kasqankuta. Chaymantapas manan yachanchischu wakin hermanonchiskunapas allin iñiyniyoqchus kashanku icha manachus chaytapas. Salmos 26:4 nin: “Manan ch’achu runawan tiyanichu, manan iskay uyakunawanpas juñunakunichu”, nispa.

Bibliapi nisqan jina, reqsisqanchis runakunallawanmi celularpiqa rimananchis. Ichaqa yaqapaschá reqsisqanchis hermanokunallawan celularpi grupota kichasunman. Chhaynaña kaqtinpas allin yuyaywanmi paykunawanqa rimananchis, ichaqa manan llapa rimasqankumanchu chapukunanchis. Apóstol Pabloq nisqan jina, manan ‘cuento q’epichu kananchis’ nitaqmi ‘jujkunaq ruwanankumanpas chapukunanchischu’ (1 Tim. 5:13). Chaymantapas kay tiempopiqa askha runakunan imaymana mana allinkunata internetpi churanku.

Chaymantapas millaytan jujkunamanta rimanku, chaykunamantan noqanchisqa cuidakunallanchistaq (Sal. 15:3; Prov. 20:19). Jinaspapas manan internetpi llapa rikusqanchistachu nitaq llapa uyarisqanchistapaschu creenanchis (Efes. 4:25). Jehová Diospa llaqtanqa jw.org, JW Canal nisqa programakunawanmi yachachiwanchis.

Wakin hermanonchiskunaqa chay grupokunatan kichanku juj hermanokunawan kallpachanakunankupaq. Ichaqa chay tumpallan imatapas vendenku, llank’anatapas munachinku. Chay ruwayqa manan allinchu, chaymi chaykunamanta cuidakunanchis. Biblian nin: “Aman qolqe sonqoqa kankichischu”, nispa (Heb. 13:5).

Yaqapaschá mayqen iñiqmasinchispas ima sasachakuypipas tarikushanman, jinaspa qolqewan yanapananchispaq celularpi juj grupota kichasunman, chayta ruwayqa allinpaschá kanman (Sant. 2:15, 16). Ichaqa chaytaqa pisi hermanonchiskunallawanmi ruwayta atisunman. Chaywanpas manan noqanchischu chaykunamantaqa encargakunanchis. Chaytaqa Diospa llaqtanpi umalliqkunan qhawarinanku, paykunan aswan allintaqa hermanonchiskunata yanaparinqaku (1 Tim. 5:3, 4, 9, 10, 16).

Sichus hermanonchiskunata yanapayta munashanchis chayqa, manan chaykunamantaqa alabakunanchischu. Ima ruwasqanchispas Jehová Diospa munayninman jinan kanan (1 Cor. 10:31). Chayrayku celularpi ima grupotapas kichaspaqa, allin yuyaywanmi chaypi mensajekunata apachinanchis.