Jehová Diospa yanapaynintapunin maskharani

Noqaqa 1940 watapin 19 mayo killapi Amiún llaqtapi nacerani. Chayqa Líbano nacionpin kashan. Pisi tiempollamantan ichaqa Trípoli llaqtaman astakapurayku. Tayta-mamayqa sumaq munakuqllañan karanku, Jehová Diostapas tukuy sonqonkuwanmi serviranku. Hermanoykunaqa tawan, noqan sullk’a kaq kani. Tayta-mamaypaqqa Bibliata estudiay, juñunakuykunaman riy, Diosmanta runakunaman willaymi aswan importante karan qolqe ganaymantaqa.

Juñunakusqayku iñiq t’aqapiqa askhan janaq pachapaq ajllasqa hermanokuna karanku. Jujninmi karan Michel Aboud, paymi Bibliamanta estudianapaq juñunakuyta apariq. Payqa Estados Unidos nacionpis Jehová Diosta reqsisqa, chaymantapas 1921 watapis Líbano nacionta risqa Diosmanta willaq. Payqa sumaqtan respetowan Anne, Gwen Beavor hermanakunata yanapaq, chay hermananchiskunaqa Galaad escuelamanta graduasqan karanku. Noqapas familiaypas paykunawanqa allin amigontinmi kapurayku. Askha watakuna qhepamanmi Anne hermanawan Estados Unidos nacionpi tuparayku. Chay qhepamanpas Gwen Beavor hermanawanmi tupallaraykutaq, payqa Wilfred Gooch hermanowanmi casarakapusqa. Paykunaqa Inglaterra sucursalpin Jehová Diosta servishasqaku.

LÍBANO NACIONPI DIOSMANTA WILLASQAYKU

Erqellaraq kashaqtiyqa Líbano nacionpiqa pisillan karanku Jehová Diospa testigonkunaqa, chaywanpas Diosmantaqa willashallaraykun juj religionkunamanta umalliqkunaña jark’awaranku chaypas. Chay kutipi Diosmanta willasqaykupiqa imaymanan pasawaranku.

Juj kutinmi panay Sanawan juj wasipi Diosmanta willasharayku, chaypi runakunawan rimashaqtiykun juj sacerdote jamuran. Payqa sinchi phiñasqan panayta k’amiyta qallariran, jinaspan tanqarpariran, chaymi panayqa escaleranta pasaykamuran. Chayllamanmi ichaqa juj policía jamuran, jinan panayta yanaparan, payqa sinchi k’irisqan kasharan. Chay sacerdotetaqa policiakunan puestoman aparanku, payqa juj armayoqmi kasqa. Chaymi juj policía tapuran: “¿Iman kanki juj sacerdotechu icha suwakunaq umallinchu?”, nispa.

Juj kutinpas iñiq t’aqaykuwanmi carrota alquilakuspa juj karu llaqtata Diosmanta willaq rirayku. Chaypiqa allintan Diosmanta willasharayku, chayllamanmi juj sacerdote juj runakunapiwan jamuranku, jinan rumiwan ch’aqeyta qallariwaranku. Chaypin papayta umanpi k’iriranku, jinan yawar uyantin kasharan. Chaymi papaywan mamitaywanqa carroman kutipuranku, noqaykupas paykunaq qhepantan llakisqa rirayku. Chaypin mamitayqa papaypa uyanta limpiashaspa niran: “Jehová Diosníy chay runakunata perdonaykuy, manan yachankuchu imatachus ruwashanku chayta”, nispa.

Juj kutinmi soqta watachayoq kashaqtiy familiaykuta visitaq llaqtaykuman kutirayku. Abueloykuq wasinta chayaqtiykun juj sacerdote chaypi kashasqa, payqa yacharanmi tayta-mamayqa Jehová Diospa testigon kasqanta. Chaypin sacerdoteqa tapuwaran: “¿Imaraykun mana bautizakunkiraqchu?”, nispa. Jinan nirani: “Wawallaraqmi kani, bautizakunaypaqqa allintaraqmi Bibliamanta yachanay allin iñiyniyoqtaqmi kanaypas”, nispa. Chhaynata kutichisqayqa manan chay sacerdoteman gustaranchu, jinan abueloyta niran: “Chay nietoykiqa mana respetoyoqmá”, nispa.

Chhayna mana allinkuna pasawasqankuqa pisillan karan. Líbano nacionpi tiyaq runakunaqa sumaqtan chaskiwaqku, Diosmanta willasqaykutapas allintan uyarikuqku, chaymi askha runakunaman Bibliamanta yachachirayku.

JUJ NACIONMANMI ASTAKAPURAYKU

Escuelallapiraq kashaqtiymi juj hermano Venezuela nacionmanta llaqtaykuta jamuran. Payqa juñunakusqayku iñiq t’aqapin juñukuran, chaypin panay Wafawan reqsinakuran jinaspa casarakapuranku. Paykunaqa casarakusqanku qhepamanmi Venezuela nacionman tiyaq ripuranku. Panayqa cartata qelqamuspan niwaqku: “Manachu Venezuela nacionman jampuwaqchis noqaykuwan tiyanaykichispaq”, nispa. Tiempowanqa chay nacionmanmi ripurayku.

Venezuela nacionmanqa 1953 watapin ripurayku, jinan Caracas llaqtapi tiyarayku. Chay cercallapitaqmi Venezuela nacionmanta presidentepas tiyaran, payqa munay carropin puriq. Waynachallaraqtaq karani chayqa admirasqan chayta qhawaq kani. Tayta-mamaypaqpas noqaykupaqpas manan facilchu karan chaypi tiyayqa, jujmantan imaymanaman yachakunayku karan. Chayllaraq yachakushaqtiykun qonqaylla juj jatun llakikuypi tarikurayku.

JATUN LLAKIPIN TARIKURAYKU

Papaymi qonqaylla onqopuran, payqa kallpasapan karan manan jayk’aqpas onqoranchu, ichaqa wijsanpin cancerta tariranku, jinan operaranku. Papayqa juj semana operasqanku qhepallamanmi wañukapuran.

Papaypa wañukapusqanwanqa sinchi llakisqan kasharayku. Chay kutipiqa 13 watachallaypiraqmi kasharani, llapaykupas sinchi manchasqan kasharayku, manan ima ruwaytapas atiraykuchu. Mamitaypaqqa aswan sasaraqmi karan, sapallanñan imatapas ruwanan karan. Ichaqa Jehová Diospa yanapayninwanmi chay llakikuyniykuta atiparayku. Noqaqa 16 wataypi kashaqtiymi colegioyta Caracas llaqtapi tukurani, jinan llank’ayta munarani familiayta yanapanaypaq.

Chay qhepamanmi Sana panayqa Rubén Araujo hermanowan casarakapuran, payqa Galaad escuelamanta graduakuspan Venezuela nacionman kutimpuran. Paykunaqa Estados Unidos nacionman ripunankupaqmi decidikuranku. Noqapas paykunawan kuskan ripurani universidadpi estudianaypaq. Paykunaqa yanapawarankun Jehová Diosta astawan munakunaypaq. Chaypin iñiq t’aqapi allin iñiyniyoq hermanokunata reqsirani. Paykunamanta wakinmi karanku: Milton Henschel hermano, chaymantapas Frederick Franz hermanopiwan. Paykunaqa Brooklyn Betelpin Jehová Diosta servisharanku.

Yaqa juj wataña universidadpi estudiashaspaymi tapukurani: “¿Imatataq vidaywanri ruwasaq?”, nispa. Juj kutinmi Qhawaq revistata leerani, chay leesqaymi kallpachawaran Jehová Diosta servinaypaq. Iñiq t’aqaypiqa karanmi precursorkuna Betelpi llank’aq hermanokuna ima. Paykunaqa kusisqan Jehová Diosta servisharanku, chaymi noqapas paykuna jina kayta munarani. Chay kutipiqa manaraqmi bautizasqaraqchu karani, chaymi tukuy atisqayta kallpachakurani bautizakunaypaq. Jinan 1957 watapi 30 marzo killapi bautizakapurani.

TUKUY TIEMPOYWANMI DIOSTA SERVIYTA MUNARANI

Bautizakusqay qhepamanmi Jehová Diosta tukuy tiempoywan serviyta munarani. Ichaqa universidadpiraqtaq estudiasharani chayqa manan facilchu karan. Chaymi tapukurani: “¿Tiempoy aypawanqachu precursor kanaypaq?”, nispa. Chaymi mamitayman juj cartata qelqarani, chaypin nirani: “Mamitáy universidadta saqepuspan Venezuelaman kutimpusaq, noqaqa precursor jinan Jehová Diosta serviyta munani”, nispa.

Venezuela nacionmanmi 1957 watapi junio killapi kutimpurani. Familiayqa qolqe pisichikuypin tarikushasqa, chaymi paykunata imallapipas llank’aspa yanapayta munarani. Jinan juj bancopi llank’anaypaq niwaranku, ichaqa precursor kaytan munarani. Chaymi iskayninta ruwanaypaq decidikurani. Askha watakunan bancopi llank’arani precursor imataqmi karanipas, imaymana ruwanayoqña karani chaypas kusisqan kasharani.

Chaymantapas kusisqan karani Sylvia hermanata reqsispay. Payqa Alemania nacionmantan karan, Jehová Diostapas tukuy sonqonwanmi munakuran. Payqa tayta-mamanwanmi Venezuela nacionman tiyaq jamuranku. Tiempowanmi paywan casarakapurani iskay wawayoqtaqmi kapuraykupas. Juj kaq wawaypa sutinmi Michel juj kaqtaq Samira. Chaymantapas rimaraykun mamitaywan kuska tiyanaykupaq. Noqaqa familiayta uywanayraykun precursor kasqayta saqepurani, ichaqa munashallaranin precursor kaytaqa. Chaymi llank’anaymanta vacacionpi kaqtiyqa esposaywan kuska precursor auxiliar jina Diosta serviq kayku.

LLANK’ANAYTA SAQEPUNAYPAQMI DECIDIKURANI

Noqaqa allin llank’anayoqmi kasharani, wawaykunapas escuelallapiraqmi kasharanku. Llank’anaypiqa allintan qolqeta ganarani, llank’aqmasiykunapas anchatan respetawaqku. Chaywanpas manan munaranichu chhayna qhawariwanankutaqa, aswanpas Diosta serviqta jinan qhawariwanankuta munarani. Chaymi esposaywan parlarayku llank’anayta saqepunaypaq. Llank’anayta saqepuqtiyqa askha qolqetan qowananku karan, jinan esposayta nirani: “Noqanchisqa manan pimanpas debenchischu, qolqe chaskisqayqa aypawasunmanmi juj tiempollapas necesitasqallanchiswan kausananchispaq”, nispa.

Chayta decidiyqa manan facilchu karan, ichaqa esposaymi mamitaypiwan kallpachawaranku. Chaymi nirani: “Kunanqa atiymanñan jujmanta precursor kayta”, nispa. Chaymi ancha kusisqa kasharani, ichaqa chayllamanmi juj noticiata willawaranku.

ALLIN NOTICIATAN WILLAWANKU

Doctormi willawaranku esposay onqoq kashasqanta. Chaytaqa manan yacharaykuchu, ichaqa kusisqan kasharani. Chaywanpas precursor kaytaqa munashallaranin. Chay ratopiqa wawaykuq nacenanpin piensasharayku kusisqataqmi chaytaqa suyakusharaykupas. Ichaqa tapukushallaranin: “¿Atiymanraqchu Diosta tukuy tiempoywan serviyta?”, nispa.

Esposaywan parlarispan ñaupaqpi rimasqaykuta junt’anaykupaq decidikurayku. Waway Gabrielqa 1985 watapin abril killapi naceran, chay watallapitaqmi llank’anaytapas saqepurani precursor jina jujmanta Diosta servinaypaq. Tiempowanqa Venezuela sucursalmanta jujnin kaq encargakuq kanaypaqmi niwaranku, chay sucursalqa tiyasqaykumanta 80 kilómetros jina karupin karan, semanapin iskay kutita otaq kinsa kutita jina sucursalman riq kani.

JUJ LLAQTAMAN ASTAKAPUYKU

Venezuela sucursalqa La Victoria llaqtapin kasharan, chayraykun chay llaqtaman astakapurayku. Ichaqa chay llaqtaman astakuyqa manan facilchu karan, chaywanpas llapa familiaymi yanapawaran. Chhayna kasqankumantaqa maytan agradecekuni. Juj kaq panaymi mamitayta uywaran, Michel wawaytaq casarakapuran. Samirawan Gabrielwanmi ichaqa noqaykuwanraq tiyaranku, paykunaqa amigonkutan saqepunanku karan. Esposaypas chay llaqtapi tiyananpaqmi yachakunan karan. Wasiykupas juch’uyllan karan, ichaqa chhayna kausaymanmi yachakunayku karan.

Tiempowanqa wawayku Gabrielmi casarakapuran, wawayku Samirataq juj ladota tiyaq ripuran. Chaymantapas 2007 watapin noqata esposaytawan Betelpi tiyanaykupaq niwaranku, kunankaman chaypi Jehová Diosta servishayku. Wawayku Michelqa umalliqmi precursor jinataqmi esposanpiwan Jehová Diosta servishanku. Wawayku Gabrielpas umalliqmi, payqa Italia nacionpin esposanwan Jehová Diosta servishanku. Samira wawaypas precursora jinan Jehová Diosta servishan, jinaspapas wasinmantapachan Betelta yanapakushan.

DIOSTA SERVINAYPAQ DECIDISQAYQA ALLINPUNIN KARAN

Vidaypiqa imaymanatan ruwarani Jehová Diosta servinaypaq, chaykuna ruwasqaymantaqa manan arrepientekunichu, jujmantapas chaytaqa ruwaymanmi. Anchatan agradecekuni Jehová Diospa llaqtanpi imaymanakunata ruwaspa yanapakusqaymanta. Askha watakuna Diosta servisqaymi yanapawaran astawan payta munakunaypaq. Imataña ruwanapaqpas Jehová Diospa yanapaynintan maskhananchis, paymi ‘runaq mana entiendey atisqan thaj kayta qowasunchis’ (Filip. 4:6, 7). Noqaykuqa kusisqan Jehová Diosta Betelpi servishayku, imataña ruwanaykupaqpas Jehová Diospa yanapaynintan maskharayku.